Russian forward Oleg Salenko kha a thiam lo ni lovin, ‘football thiam tak’ tia sawi an tam kher lo mai thei a, a thiamna zawnga teh chuan tute hriat vak mah a hlawh lutuk bik lo mai thei a; mahse, ‘mi vannei tak a ni’ kan ti dawn nge, ‘chanchin danglam tak a nei thei’ kan ti zawk dawn ni, football khawvela hriat reng tawh tur thil tam tak thlentirtu a ni ve tlat thung si.

Russia tan vawi riat chiah a inlan a; mahse, a goal thun zat ang zawng chuan pui tak a ni, goal ruk zet a thunsak.

An ram tana a goal thun zawng zawng hi Fifa World Cup-ah ngat a ni lehnghal a, a danglam nghal phawt.

USA-in kum 1994-a an thlen tuma a thun kha niin hetih hun laia khawvel huapa lar, Bulgarioan forward Hristo Stoichkov nen goal thun tam ber (top scorer) an ni dun nghe nghe a. Heng a goal-te hi inkhel vawi hnih chauhva a thun a ni a, a danglam leh angreng viau mai.

Tuna kum 53 mi ni tawh, Salenko hian goal ruk zet thun mah se Russia chu group stage a pelhpui thei ta chuang lo a, tun thlengin World Cup-a knockout stage kai phak lo chunga top scorer ni thei awm chhun a la ni ta reng nghe nghe. Hei pawh hmingchherna danglam tak a ni ve hrim hrim.

Russia hian group stage inkhel hmasa berah si hnih faiin Brazil an hneh lo va, a dawtah Sweden lakah 3-1 a tlawmin an goal neih chhun hi hetih hun laia Spanish club Logroñés-a khel lai, Salenko thun a ni a. Group stage inkhel tawp bera 6-1 a Cameroon an sawp tumin goal nga zet a thun zui leh ta a ni.

Inkhel vawi hnih leka a goal thun hmang hian Russian forward hi World Cup meuhvah top scorer a nihtir der a ni.

Salenko-a hi a pa Ukrainian niin a nu hi Russian a ni thung a. Russia tana World Cup-a a inlan hma, kum 1991-a Soviet Union a kehdarha Ukraine a pian hnu lawk, April 29, 1992 khan Ukraine tan Hungary a hmachhawn hman a, he inkhel hi Fifa hriatpuina hnuaia Ukraine a inkhelh hmasak ber a ni a, hei pawh hmasa ber record a neihna a ni leh bawk.

Hei lo pawh chanchin danglam tak a la nei a, 1989 Fifa World Youth Championship-ah khan Soviet Union under-20 team tan a inlan a, he tournament-ah hian goal nga thunin top scorer a ni a. Kum 2022 thleng khan Fifa U-20 World Cup leh World Cup-a Golden Boot dawng kawp thei awm chhun a ni a, eng eng emaw record danglam angreng tak tak a nei thei riau a ni.