Rual u-te chuan thlalak an hmuh hian an hre nghal ngei ang.

A vei lam atangin sawi ta ila, Brazil tana khel vek - Mazinho, Bebeto leh Romario te an ni a, football khelvela goal thun lawmna lar ber zinga mi, ‘Cradle Rock goal celebration’ an tih chu a ni.

Kum 1994-a US-a World Cup nghah a nih tuma mi kha a ni a, July 10-a quarterfinals-a 3-2 a Netherlands an hmachhawn hma lawk, July 7-ah Bebeto nupuiin fapa a hring a, he inkhelah hian Brazilian striker hian minute 62-ah an goal hnihna thunin a thiante pahnih hian a fapa neih thar lawm nan nau awi angin an che a, an larpui ta hle a ni.

Goal lawm dan dangdai leh hmuhnawm tak hian hriat a hlawhah hian a tawp mai lo va, heta inlan player pathum fate theuh hian an pate sulhnu chhuiin khelmualah an tlangnel em em theuh zui a ni.

An fate zinga khawvelin a hriat langsar ber chu Thiago Alcantara hi a awm e, a pa chu thlalaka lang zinga a vei lam ber, Mazinho hi a ni.

Thiago hi Barcelona leh Bayern Munich-ah pawh a lo khel tawh a, tunah Liverpool-a khel mek a ni a, mi ball pek a thiamna hi fak a hlawhna thin a ni.

Mazinho hian footballer fapa dang pawh a la nei a, Rafinha Alcantara a ni ve thung a, ani erawh Qatari club Al-Arabi-ah a khel mek thung.

Bebeto goal thun an lawmna, an larpui tak em ema piang pawh hi footballer tho a ni a, Matthieus Oliveira niin tunah hian Portuguese club Farense-ah a khel mek.

Romario ve thung hi Romarinho pa a ni a, a pa hnung zuiin tunah hian an ram club hlun, Vasco da Gama-ah a khel mek thung.