Kevin de Bruyne hi football pundit leh ‘dit ve kher lote pawhin tun laia midfielder tha berah an chhal thin a, a dik pawh a dik thawkhat ang. A nih leh, tu hriat hlawh tehchiam a nih hmaa Manchester City-a la luttu kha kan hria em? A chunga thlalaka mi khi a ni.

Chilean coach Manuel Pellegrini hi a sulhnu enin manager tha ber berte huanga dah ngam chu a ni kher lo thei a; mahse, ‘player tha, tha tur leh team tana tangkai tur hria’ ti erawh chuan a sawi ngam ngei ang.

de Bryne chauh a ni lo, Real Madrid a enkawl lai khan ‘mamawh tur’ tiin AC Milan atangin Kaka a la lut a, Manchester United atangin Cristiano Ronaldo a la lut bawk a. Hei chauh a la ni lo, tun thlenga an goal thun khawl la ni ta reng, Karim Benzema ngei pawh hi Lyon-a striker pangngai tak a nih laia a seng luh tho a ni. 

Khawvela long ball pet thiam ber pawl la ni reng, Xabi Alonso pawh kha Liverpool-a a vanglai takin Santiago Bernabeu-a ko luttu pawh Pellegrini tho hi a ni a sin.

Europe khawmualpuia hmelhriat a nih hmain Pellegrini hian Ecuador-ah LDU Quito chu league-ah a champion-pui a, Argentina-ah kalin San Lorenzo leh River Plate a champion-pui leh a, kum 2004 khan football hmunpui a pan zui.

Europe-ah hian hetih hun laia club vantlang tih tur, Spanish club Villarreal a enkawl hmasa ber a. A kaihhruaina hnuaiah hian 2004-05 khan La Liga-ah pathumna niin 2007-08 khan pahnihna a nihpui leh a, 2005-06-ah phei chuan Champions League semi-final a thlenpui hial.

La Liga club naran a enkawl dan a that em avangin June, 2009-a a vawi hnih nana Florentino Perez-a Real Madrid president a nih chiah khan a la lut nghal a. Kaka, Ronaldo, Benzema leh Alonso te a la lut nghal.

Hemi season-ah hian La Liga-ah point 96 zet a hmuhpui a, hetih hun laia an hmuh tam ber record thar a ni a; mahse, Barcelona chuan point 99 an hmuh phak ve avangin pahnihna an ni a, Pellegrini pawh a chhuak.

Malaga-in an la nghal chat a, a season hmasa berah palina a nihpui nghal a, an club chanchina a vawi khat nan Champions League a khelhpui hial.

Seasons thum chhung Malaga-a a awm hnuah football inpui, England panin City-in an chhawr a. Hetah hian hriat la hlawh lutuk lem lo, kum 24 mi chauh, de Bruyne chu Wolfsburg atanga la lutin Shakhtar Donetsk atangin Fernandinho leh Liverpool atangin Raheem Sterling a la lut bawk.

de Bruyne chu kan hria a, ‘tun lai player hmuhnawm ber’ ti pawhin sawi ila, a dikna chen a awm ang. Sterling pawh tunah Chelsea-ah kal tawh mah se Etihad Stadium-a a sulhnute kha ‘insawi theihna tham’ chu a ni tho tho.

City-ah hian a season hmasa ber, 2013-15 khan Premier League nomawi a lakpui nghal a, European ni lo zinga English champion coach ni thei hmasa ber a ni a. Hemi season-ah hian intihsiakna hrang hrangah goal 151 zet an thun a, England record thar an siam.

2015-16 khan a vawi khat nan Pellegrini hian City chu Champions League semi-finals a hruai thleng a, Real Madrid an ngam lo zui ta hlauh va. Hei hi City-a a season tawpna a ni ta rih.

China-ah kalin Hebei China Fortune a enkawl leh hnuah England-ah bawk let lehin West Ham a enkawl a. Pellegrini hnuaiah hian Hammers hian player man to lamah an club record vawi hnih siamin kum 2018 khan Lazio atangin Felipe Anderson a la lut a, a kum lehah Eintracht Frankfurt atangin Sebastien Haller a la lut bawk.

Mahse, a chet thatpui zui ta lo va, December, 2019 khan inthenin July, 2020-ah Spain-ah kirin Real Betis a enkawl ta a, 2021-22 Copa del Rey a lakpui leh tawh a, tunah Betis-ah hian a la awm mek.