A thawhrimna leh defensive midfielder khawng, ball chan tuma um ngat ngat peih a nihna larpuitu, Owen Hargreaves-a kha a khel hmu hman chuan vawi tam tak England tan hna tangkai a thawk thin tih an hria ang a; mahse, ani hi England tana a khelh hma zawng kha chuan an ramah vawi khat mah a la khawsa ngai lo.

Calgary, Alberta, Canada-a piang niin a nu hi Welsh a ni a, a pa English a ni thung a. Canada-ah sei lianin a duh phawt chuan Canada, Wales leh England tana khel thei vek a ni.

A rawlthar chhuah, Under 19 level-ah chuan Wales tan a khel hial reng a, England tana khel tura koh a niha a ‘aw’ hnuah a vawi khat nan senior team tan August 15, 2001-ah Netherlands a hmachhawn ta a ni.

Hetih hun lai hian Hargreaves-a hi German club hlun leh lian, Bayern Munich tan khelin mi tam tak chuan ‘a German lutuk’ tiin an sawisel hial a; mahse, coach-in a ko tho va. Joe Baker-a hnua English league football-a vawi khat pawh ball la chhuih lo chunga an ram tana khel hmasa ber a ni ta a ni.

A tir lamah fan-ten duh lo hle mah se Hargreaves-a hi England tan khelmuala player tangkai ber pawl a ni zui thung a. Vawi 42 zet khelin 2002 World Cup, 2004 European Championship leh 2006 World Cup-ah te a inlan phak.

Kum 2006 phei hi chuan FA-in mipui ngaihdan an lakna atangin England Player of the Year leh England Player of the World Cup atan thlan a ni a, he chawimawina hi kum khata dawng kawp thei hmasa ber a ni ta hial a ni.