July 14, 2015 khan khatih laia kum 43 mi ni tawh, a hma lawka inkhelh chawlhsan tawh ni bawk, Brazil mi hrang, Rivaldo chu a fapa, kum 20 mi, Rivaldinho nen an rama second division, Serie B-ah Mogi Mirim tan an khel dun a, 3-1 a Macae an hneh. An khel dun satliah a ni mai lo va, goal an thun ve ve.

Hetih lai hian Rivaldo hi club president a nih lai a ni a, Serie B season kal mekah an club chu an che chhe hle a, thla 15 zet liam taa a khai tawh a ballboot chu bun chhuak lehin chhanchhuah tumin a a pen chhuak leh a ni.

Macae nen an inkhelh tum hian Rivaldo hi a che tha hle nghe nghe a, goal thum an thunah a inrawlh vek a. An goal hmasa ber chu minute thumna lekah a fapa, Rivaldinho chuan thunin a siamsak a ni a, minute 17-ah penalty an hlawh chu amahin a chhuih lut a, chawlhlawk hma hretin a fapa bawkin an goal thumna a thun leh a, hei pawh a thawhrah bawk a ni a. Hun tawp dawnah Macae tan Pipico chuan si khat a sut ve hram a ni. 

An inkhelh zawhah pawh hlim takin, “Tuma la tih ngaih loh kan ti niin ka hria. Pafaa inkhel rual hi chu ka hre tawh thin a; mahse, intihsiakna tak taka pafaa inkhel tum khata goal thun hi chu ka la hre ngai lo,” a ti nghe nghe.

Kum 1999-a Fifa World Player of the Year atana an thlan, Rivaldo Macae an tum hma chawlhkarah a boot a bun chhuak leh tan a, Nautico hmachhawnin minute 70 chhung a khel a, 2-1 in hnehna a chanpui tawh bawk.

A vanglaia Barcelona-a khel thin, Fifa World Cup final-a vawi hnih inlana vawi khat champion ni thei, Rivaldo hian Catalan club a chhuahsan hnuah AC Milan-ah kalin Uefa Champions League leh Super Cup a lakzui a ni.