Football khawvelah hian 3–3–3–1 formation hi tun hma leh tun hnu thlengin coach tam takin an lo hmang tawh thin a; mahse, a larpuitu, ta neihtua khawvelin a ngaih chu Marcelo Bielsa kha a ni thung.

Argentine coach duh rum ve thei tak, a hming lema ‘El Loco Bielsa’ (The Madman Bielsa) tia an sak, Bielsa hi a team enkawl a kheltir thin danah danglamna tam tak a nei a. A tlan tamtir lutuk thinte pawh sawi a hlawh thin a, thenkhat phei chuan ‘a out dawn tih a chian pawhin a um out-tir tho thin’ tiin an sawi hial.

3–3–3–1 formation hi Argentina, Chile leh Olympique de Marseille a enkawl thin laia a hman rim leh a hman thiam em em a ni.

Thil danglam tak tak a lo ti tawh thin a, chung zinga langsar tak pakhat chu Leeds United a enkawl laia an lama Aston Villa a pet goal-tir kha a ni a, amah leh a team-in 2019 FIFA Fair Play Award an dawn phah thung.

April 28, 2019 khan Championship-ah Leeds leh Villa hi inkhelin an chak chuan Premier League-a kai thei tur an ni a, inkhel pawimawh a ni a, thih tha tak meuhvin an tang.

Elland Road-a inkhelah hian minute 72-naah Villa forward Jonathan Kodjia chu hliamin khelmual chhungah a let reng a, referee-in a ham tawp si loh avangin mual neitu tan Mateusz Klich chuan goal a thun a, hma an hruai.

Villa player an thinrim a, lehlam an pawr bawk a, buaina tenau a chhuak,  Anwar El Ghazi pawh hnawh chhuah a ngai hial.

Bielsa a inrawlh ta a, a player-te hnenah Villa chu pet goal-tir ve mai turin a hrilh ta a, an pet goal-tir a, 1-1 in inkhel a tawp zui a. He inkhel result avang hian an elpui, Sheffield United chu automatic-in Premier League-ah an kai phah a, Leeds zawk chu play-off an khelh a ngaih phah ta a ni.

A tuartu ni mah se Bielsa leh a team chuan fak an hlawh a, an chet dan mawi tak avangin September 29, 2019 khan 2019 FIFA Fair Play Award an dawng ta hial a ni.

“Football khawvelah hian mi thenkhat chuan hnehna chan chauh an thlir a, chu chu sports-in a tum ber pawh a ni a. Mi thenkhatte erawh chuan hnehna an chan theihna tur aia hlu thil an ti thin,” tiin Fifa pawhin Bialsa leh a team chawimawina dawn chungchang hi an website-ah an tar lang.

Bielsa thutluknaah hian Villa manager, Dean Smith leh assistant John Terry pawh an pawimawh hle bawk. 

“Dik taka thil ti turin ka rawn a, ani pawhin a lo pawm a; mahse, a player zawng zawngin an zawm ang tih erawh ka hre bik lo,” tiin Smith chuan a hnuah a sawi a. “An hrehawm tihna ka hre thiam a; mahse, Marcelo chungah thutlukna dik tak a siam avangin ka lawm a, a chet dan a zahawm em em bawk,” a ti.

Bielsa leh a naute hi Premier League kai tur zawnna play-off-ah an dingchang zo ta lo zui a, division hniam zawkah season dang an awm leh phah.

Play-off khelh dawn pawh hian Argentine coach hi a che danglam lehpek tho va, Derby County nena inkhel tur an ni a, Rams training ground-ah hian enthla turin mi a lova tir a, man chhuah a ni ta nghe nghe.

‘Spygate’ tia an sawi zui tak he thil thleng chungchangah hian Bielsa chuan hemi season-ah hian Championship-a an khelhpui tur apiang chu an lo enthlak tawh thin thu a sawi zui nghe nghe a. English Football League pawhin Leeds chu £2,00,000 lai an chawitir phah a ni.