Europe-a kan hriat lar league lian tak taka club tha, intihsiakna khel tam leh tla har deuhte hian chawlhkar khatah vawi hnih an khel tlangpui a, vawi thum khelh zauh chang pawh an nei thin a. Hetiangah hian hah an inti a, an chak loh phei chuan fixture sawiselna anga ngaih theih thawm a ri leh zauh zauh thin.

Inkhelh tam lutuk hi manager leh player-te lu tihaitu a ni fo thin reng a. Hetih lai hian hman deuh chuan a player zawk an insiam rem mai thin a ni mai thei, a hun laia player tha ber pawl ni phak, Mark Hughes pawh kha kum 1987 khan inkhel pawimawh tak takah ni khatah vawi hnih a khel riap mai a, tun lai dinhmun atanga thlir phei chuan ‘pui tak’ a ni ringawt.

November 11, 1987 khan khatih laia Bayern Munich forward hi Prague khawpuiah Czechoslovakia hmachhawnin Wales ram tan a inlan a. He inkhel hi an ram tan phei hi chuan a pawimawh a, 1988 European Championship an khelh phak leh phak lo dinhmun hriltu a ni.

Chawhnu lama inkhel an ni a, Hughes-a leh a thiante hi a chak lo zawkah an tang nghe nghe a; mahse, a thiante pawh a hnem hman lo va, chak lo la na hman pawhin a awm lo, private jet-a phurh chhuah nghal a ni.

Thlawhna hian Hughes-a hian ramri kânin West Germany (hetih lai hian Germany pangngai la awm lovin East leh West tia ram hnih an nih lai a ni) a pan a, club tana inlan leh turin Munich khawpui a thlawk lut.

Chawhnu lama ram tana a fehchhuahna inkhel a pawimawh tluk zetin Bayern hian inkhel pawimawh em em tho an hmabak a, German Cup inchuhnaah Borussia Monchengladbach nen an inhmachhawn a ngai.

Ni khata vawi hnih ngawt mai a inkhelh chungchang hi a hnua Hughes-a’n a sawi leh dan chuan an chuanna thlawhna khan khelmual a thlawh kân a, thlawhna chhungah Wales ram thil a inbelte thlakin Bayern thuam a inbel zung zung a. Thlawhna tumhmunah car-in an lo nghak a, khawi dang mah peng lovin khelmual a pan nghal a ni.

Chawlhlawkah Bayern hian si khat an lo phur mek a, Hughes-a hi minute 60-ah khelmualah a tlan lut ve ta a. Ni khata a vawi hnih inkhelhnaah hian a vannei zawkah a tang ve ta thung bawk a, extra time an khelh hnuah 3-2 in a team chu a chakpui.

Hughes-a hi a vanglaia Manchester United player pawimawh ber zinga mi a ni a, PFA Players’ Player of the Year chawimawina vawi hnih dawng thei hmasa ber a ni bawk a. Old Trafford club-ah hian vawi hnih khelin Premier League-ah vawi hnih a champion-pui a, FA Cup pathum a lakpui bawk a. FA Cup hi Chelsea pawh a lakpui leh.

A vanglai hian German club lian bakah Barcelona-ah pawh a khel a, Southamton leh Everton-a a khelh leh hnuah Blackburn Rovers atangin kum 2002 khan inkhelh a chawlhsan a ni.

Coach ni zuiin tunah hian England-a League Two-a khel lai, Bradford City a enkawl mek a. An ram a enkawl tawh bakah a khelh tawhna pahnih, Blackburn leh Southamton a enkawl tawh a. Manchester City, Fulham, Queens Park Rangers leh Stoke City a kaihruai tawh bawk.