Khawvela footballer piang chhuak tawh zinga mi tam takin player ropui bera an ngaih, FIFA Player of the Century-a thlan pahnih zinga pakhat zawk, Pelé-a’n khelmuala ball a pet hnuhnung ber chu October 1, 1977 kha a ni.

United States-a New Jersey khawpui, Giants Stadium-a mi sang tam tak hmaa a lo khelh tawhna thin pahnih, New York Cosmos leh Santos te amah thlah nana an inkhelh kha a ni a. Pelé hian first half chu American team kawr haa inlanin second half-ah Brazilian team. tan a khel ve thung.

Pelé-a hun hnuhnung hi boxing legend Muhammad Ali pawhin a hmunah a en a, inkhelh bânah an pahnih hian khelmualah an inlan nghe nghe.

A hnu kum eng emaw zat a liam hnuah Pelé chuan Ali nena an inkar hi sawiin, “Ka thian a ni a, ka entawn leh hero a ni a. Ani nen khan hriat reng tawh tur hun tam tak kan hmang dun a, kan inkar a tha em em reng a. Pa hlim thei, fiamthu duh tak a ni a. Fiamthuin kei aia a lar zawk thu pawh a sawi fo thin. 

“UNICEF nena thawkhovin naupangte tan pawh hna kan thawk dun zui leh a. Ali-a’n a sawi ka hriat reng pakhat chu, ‘Football hi boxing aiin a mawi zawk,’ a tih kha a ni a, a sawi zawmnaah erawh, ‘Nang aiin ka hmel tha zawk,’ a ti,” tiin a sawi.

A hming pum, Edson Arantes do Nascimento ni deuh duah, Pelé hi an ram sanaa December 29, 2022 tlai 3:27 khan kum 82 mi niin cancer kaihhnawih avangin a thi a. Kum 1999-a Sports Illustrated-in Sportsman of the Century leh BBC-in Sports Personality of the Century atana an thlan, Ali (a hming tak Cassius Marcellus Clay Jr.) ve thung hi June 2, 2016 khan kum 74 mi niin a thi ve thung.