1986 Fifa World Cup kha khawvelin a hriat reng dan hi sawi ta ila, ‘Diego Maradona ropuina tournament’ tih a inhmeh viau mai thei a, ropui takin Argentina a champion-pui a, a mi mala a khelh ropuizia chu hmu ve hman lo tan pawh YouTube-ah en mai a tha ang.

Mexico-a nghah tournament-ah khan mi ropui dang pawh a lo awm ve reng mai a, khatih lai kha chuan hriat a la hlawh lutuk lo pawh a ni mai thei, amah chu khawvela football manager hlawhtling bera chhal ngam, Sir Alex Ferguson-a ni.

Kha tournament-ah khan Manchester United coach ropui hi Scotland manager a lo ni reng mai a. Hetih lai hi an ram club hlun, Aberdeen a enkawl lai niin Scottish national team-ah hian John ‘Jock’ Stein-a thachhangdawltu a ni bawk a, World Cup tan hma lawka Stein-a a thih thut avangin Sir Alex-a hian a kaihruai ta a ni.

Old Trafford tana a ropui ang erawh chuan Mexico-ah hian Scotland manager hi a hlawhtling lem lo va, Group E-ah awmin Denmark, West Germany leh Uruguay te nen an awmho va.  Khelh hmasak berah Denmark lakah si khat faia tlawmin 2-1 in West Germany an hneh lo zui a, khelh tawp berah Uruguay nen goal awm lova inhnehtawkin point khat chiah hlawhin an ram hi a hawpui. 

Sir Alex-a hi Stein-a a thih thut avang chauhva a aiawh lailawk tura ruat a nih angin World Cup zawhah national team manager a nihna chu a chawlhsan zui a. England-ah Old Trafford panin a hlawhtlinzia chu inhrilh nawn kan ngai âwm lo ve.

Scotland manager atana Sir Alex-a a tan mai dan hi a mak teh thut hrim hrim a. Stein-a ho hian October 10, 1985 khan World Cup khel tur zawnnaah Ninian Park, Cardiff-ah Wales an hmachhawn a, Mark Hughes-a goal hmangin mual neitu hian hma an hruai reng a, hun tawp hma minute kua la awmah Scotland hian penalty hlawhin Davie Cooper chuan a chhuih lut a, 1-1 a inhnehtawkin play-off khel turin an tlin phah.

He inkhela pressure sang tak hi hriselna pan sa tak, Stein-a hian a zo lo a ni ber a, khelmual pawh an chhuahsan hmain a chau thut a, khelmuala medical room-ah a thi zui nghal ta mai a, a hnuah heart attack vang nia sawi a ni.

‘Ka mentor’ tia a sawi, a pu a thih thut takah hian Sir Alex-a hian an ram chu play-off-ah pawh Australia a hmachhawn zuipui nghal a, hnehna changin Mexico an pan theih phah a ni.