Manchester United tantuten duat taka ‘Theatre of Dreams’ tia an sawi thin, Old Trafford khelmual ropui tak hi Red Devils hian kum 1910 atang khan an khelmual (home ground) atana an hman a ni.

He khelmual hmingthang taka entu tam ber tum erawh a neitute inkhel a ni lo hlauh thung a, kum 1939 FA Cup semi-final-ah khan Wolverhampton Wanderers leh Grimsby Town an inkhel a, Wolves hian si nga faiin an sawp a, he inkhel hi mi 76,962 zetin an en a, hei hi Old Trafford-a inkhel awm tawha entu an tam ber tum a ni daih.

United-in an khelmuala entu an neih tam ber chu ‘anmahni mual lovah’ a ni daih a, mahni mual lovah mahni mual record an siam a nih chu!

An record siam hi an thenawm, Manchester City khelmualah a ni a, January 17, 1948-a an siam kha a ni.Maine Road-a inkhelah hian first division-ah Arsenal an mikhual a, entu mi 81,962 zet an pungkhawm a, Red Devils-in mikhual an then tuma entu tam ber record a ni ta hial a ni.

Hetih lai (1941 leh 1949 inkar) hian an khelmual pangngai, Old Trafford chu Indopui II-naah tihchhiat nual a nih avangin siam that mek a ni a, an mual (home ground) atan an thenawmte khelmual hi an tawm lai a ni.

Maine Road pawh hi khelmual lar tak a ni thin a, City hian kum 1923 atang khan an mual atan hmang tanin 2003 season tawp thleng an luah a, 2003-04 season atang khan khelmual thar leh mi tam zawk an lenna, Manchester khawpui chhak lama Etihad Stadium-ah an insawnsan ta a ni.

United khelmual zawk, Old Trafford hi tunah mi 74,310 lenna niin UK-ah chuan football club khelmual lian ber a ni a, football khelmual hrim hrim (club ta leh ta lo chhiar tel vekin)-ah pawh Wembley Stadium tih lohva an rama lian ber a ni bawk a. Europe khawmualpui huap pawhin len lamah 11-na a ni phak mek bawk.

‘Theatre of Dreams’ tih hi an player ropui, Fifa World Cup-a England champion-puitu ni bawk, Bobby Charlton-a sawi chhuah a ni a, koh duat nana hman zui a ni a, a larpui ta hle a ni.