Joe Cole, Jermain Defoe, Michael Carrick, Glen Johnson, David James, Paolo Di Canio, Freddie Kanoute, Trevor Sinclair, Les Ferdinand leh Lee Bowyer te inkhel hi i en hman em?

I hman ta lo a nih pawhin an hming an sawi emaw, an ziah emaw tal chu i hmuin i chhiar tawh ngeiin a rinawm.

He mite rual hi West Ham United-ah an khelho thin tih pawh tam tak chuan in hre ngei ang. 2002-03 season-ah khan tha zetin league hniam zawka an tla tih pawh hria kan awm a rinawm leh zel bawk.

Thenkhatte phei khi chu England leh team dang tan pawha player pawimawh tak tak an ni zui hlawm a, khami tuma an tlak kha tun thlengin ‘Premier League atanga tla zingah chuan team tha ber’ tiin an la sawi fo reng a ni.

Glenn Roeder-a hova season bul tanin a hun lai leh a hnu lama England team tana pawimawh tak tak kawl khawm mah se season an hmang chhe khawp mai a. Khelh 38-ah vawi 10 chauh hnehna changin vawi 12 an tumpui an hnehtawk a, vawi 16 tlawmin a tawpah point 42 nen 18-na niin Premier League din hnua a vawi khat nan Championship-ah a an tla a ni.

League hniam zawka an tlak takah hian an player langsar tak takte pawhin an chhuahsan zui nasa a. Cole leh Johnson ten Chelsea a pan a, Kanoute chu Tottenham Hotspurs-in la chhuakin, Di Canio pawhin Charlton Athletic a pan a. Ferdinand-a’n Leicester-ah kalsanin Bowyer pawh Newcastle United-ah a lut a, Sinclair chu Manchester City-in an la lut ta bawk.

Season hnih lai Championship-a an tal hnuah 2005-06 season-ah khan Premier League-ah an lo kir leh ta a ni.

Premier League hi 1992-93 atanga khelh tan kha niin Norwich City chu a tlahniam zing ber niin vawi ruk an tla tawh a, tun season-ah Southamton an tla dawn tih a chiang tawh a, team dang pahnihin an zawm leh dawn bawk.

A din tirh atangin 1995-96 tih lohvah chuan team thum zel an tla thin a, hemi kum bikah hian team 18 awm thin chu team 20-ah tihpun a nih dawn avangin tlahniam pawh an tlem a. Tun season-a tlahniam tur chhiar tel loh hian club 44 lai tlahniam an awm tawh a ni.