DOWNLOAD OUR APP

Read latest news on your phone
app-store
THAWNTHU HLUI: Valencia-ah hriat hlawh lo val Benitez
May 24, 2023

A zawna season hnih ngawt mai Champions League final a luhpui hnua Héctor Cúper-a’n Inter Milan a pansan dawn khan Valencia chuan a aiawh turin a hun laia langsar tak tak - Javier Irureta, José Manuel Esnal Pardo leh Luis Aragonés te an dawr kha a ni a; mahse, tumah an biak tluk theih tak loh avangin an manager thar atan hriat hlawh lo val, Rafael Benitez chu July 1, 2001 khan an la lut a.

Club hotuten Spanish manager la valai tak, inelna sanga tawnhriat la nei bawk si lo an la dawn tih an hriat khan player-te pawh a barakhaih tak zet niin a hnuah goalkeeper Santiago Canizares chuan a sawi a. A âwm reng a, a hma chiah season khan Benitez-a hian Spanish Second Division-ah Tenerife a la enkawl phak chauh a ni.

A hnuah amah ngei pawhin heti hian a sawi niin an sawi thin a, “Nangni chu Champions League final khel tawh in ni a, kei chu Segunda División atanga lo kal mai ka ni a; mahse, hma in sawn theihna tur hmanrua erawh neiin ka inhria,” tiin.

Hmanrua nei nia a inhriat chu Benitez-a hian a takin a hmang ta reng a, lehlam pawl nawr dan thar chhawp chhuakin a season hmasa ber (2001-02)-ah La Liga nomawi a lakpui nghal a, kum 31 zet an ban phaka awm tawh lo hlawhtlinna a chanpui nghal a ni.

A season lehah a sang pali zingah tel phak lo mah se 2003-04 chuan inkhel vawi thum hmabak an la neih laiin La Liga nomawi la turin a insawh nghehpui leh hman der a, UEFA Cup final-ah si hnih faia Marseille hnehin a champion-pui bawk.

Hlawhtlinpui hle mah se club thuneitute nen player lei chungchangah an inrem theih loh avangin June 1, 2004-ah Valencia a chhuahsan a, chawlhkar hnih awrh hnuah Liverpool-in an seng lut ve ta thung.

Benitez-a hian league nomawi pahnih leh UEFA Cup a lakpui a, tun thlengin Valencia-in manager neih tawha hlawhtling ber a la ni ta reng a ni.

Euro 2024 final opinion poll
Euro 2024-ah hian tunge champion I rin?
Spain
England

Latest News & Chhiar Hlawh