Rajasthan khawpui Jaipur-a All India Sub-Junior Ranking Badminton Tournament, 2023, February ni 5 atanga khelh chu vawiin khan zawh fel niin  Mizo naupang H. Lalthazuala a chuan final-a a khingpui hnehin a champion. 

He tournament-ah hian India ram hmun hrang hrang atangin shuttlers 1558 lai a lut nghe nghe. Under-17 Boy's Singles inelna huang-ah Lalthazuala s/o H. Zohmangaiha, Chanmari West, Ralte Villa Badminton Club tana khel mek chuan a hma a ding seeded player-te hneh chho zel in final a in vaw thleng. Quarter Final-ah seeded no 2, Ronak Chauhan chu 21-19, 21-10 a hnen in straight set in a chak a. Semi Final ah seeded no 8, Radjev Tomar chu 21-19, 21-12 a hneh in straight set bawk a chak leh final-ah hian Malemnganba Singh Hemam, seeded no 5 chu hneh lehin a champion a ni.

Under - 15 Boy's Doubles inelna huang-ah Malsawmhlua s/o Albert Lalnunhlima, Serchhip, Ralte Villa Badminton Club player tho chuan a partner Mahendra Kalahasthi, Andra Pradesh lam mi nen final an thleng bawk. 

He tournament-ah hian Lalramsanga, Durtlang leh Lalrempuii, Serchhip te tangdun chuan Under-17 Mixed Doubles ah quarter final an thleng a, Sainunmawia, Ramhlun Venglai leh a partner Aanya Bisht te pawh Under - 17 Mixed doubles-ah hian a thiam pariat zingah an in vaw kai pha bawk a ni. 

Heng Mizo naupang te hi TATA Trusts leh Mizoram Badminton Association tangkawp in an din Regional Development Centre atanga in zirchhuak, chumi hnu a Pullela Gopichand Badminton Academy leh ITM University Badminton Academy, Raipur a inzir chhunzawm tura thlanchhuah te an ni a. PGBA leh ITM University-a an zirna man zawng zawng hi TATA Trusts lamin an tum vek a ni. MBA chuan TATA Trusts bakah sum leh pai leh tha leh zung senga, Mizoram-a badminton-in hma a sawn theih nana hma latu zawng zawngte chungah lawmthu a sawi a ni.