'Fab Four' tia hming lem an pek English rock band lar The Beatles ten thawm an rawn nei thar leh ta a, an chanchin tarlanna film siam a ni dawn. 

Sony Pictures Entertainment chuan February 20, 2024 (Thawhlehni) khan thuchhuah an siam a, Paul McCartney, George Harrison, Ringo Starr leh John Lennon te chanchin tarlanna film siam a nih tur thu hi an rawn puang a ni. 

Oscar award pawh lo la tawh English director Sam Mendes chuan he biopic hi a siam dawn a, kum 2027-a tihchhuah tura ruahman a ni. 'American Beauty' director Sam Mendes hian The Beatles chanchin leh an music te a zirchiang a, chak takin hmalakna an kalpui mek a ni. 

"Khawvela rock band ropui ber chanchin tarlanna film siam thei tura ka awm hi chawimawina ropui tak a ni a, ka phur tawh hle a ni," tiin Sam Mendes chuan a sawi. An member John Lennon leh George Harrison te an boral tawh a, hei hian he biopic hi a tihlu zual hle dawn a ni. 

Sony Pictures Entertainment executive Tom Rothman pawhin hemi chungchang hi sawiin, khawvel puma The Beatles fan te tan ennawm ropui tak chhawpchhuah an tum thu a sawi. Hetih lai hian a changtu tur lam tihfel a la ni lo a, hmalakna kalpui mek a ni.