ZALEN Feb 25, 2026: Vawiin Assembly Session thukhawmah, The Mizoram State University (Amendment) Bill, 2026 chu pawm a ni.

Bill puluttu Minister Dr. Vanlalthlana chuan nikum 2025 March ni 4-a Mizoram Assembly Legislative-in The Mizoram State University Bill 2025 a pass hnu khan Mizoram State University din chhoh a nih theih nan hmala nghalin, hnathawktu tur post siam nghal a ni a, post siam zinga a tul zualte lak nan advertisement pawh chhuah nghal a ni a ti a, Mizoram State University headquarter atan Aizawl Luangmuala Geology and Mining Department office chu tihfel tura hmalak a nih laiin, Bill pass a nih hma leh hnuah Lunglei, Champhai, leh Mamit atang te in representation dawn a nih avangin NGO leh bialtu MLA te titi pui an nih hnuah kum 2025 November ni 17-a Council of Minister thukhawm chuan ngun taka a ngaihtuahin Mizoram State University headquarter chu Lungleia dah turin a rel a, nikum November ni 20 khan Chief Minister chuan Lungleiah Mizoram State University headquarter dah a nih tur thu a puang ta a ti.

He bill chungchangah hian enfiah tur tam tak a awm avangin Bill drafting committee din thar lehin, Act awmsa an ennawn a, Council of Minister phalna lak a nih hnuah vawiin hian Assembly Sessionah pharh a ni ta a. He bill kaihhnawiha an ngaihtuahnaa lian ber chu regional imbalance a nih thu sawiin, regional imbalance tihziaawm nan Lungleiah dah a nih thu sawiin, bill tharah hian Section pathumah tihdanglam a awm tih a sawi.

He bill hi member 20 chuangin an sawiho hnuah House chuan a pawm a ni.

#ZalenNews