ShiRock 2022 winner The Prophets chuan a vawi khat nan album tihchhuah an tum a, recording studio an luhchilh chho tan mek. Mizo band tha ber zinga mi The Prophets hian tun hnaiah thawm an rawn nei ring hle a, Manipur sawrkar buatsaih rock contest 'ShoRock' ah pakhatna an ni a, Music Domain Mizoram (MDM) in tun hnaia a award a semah Band of The Year atan thlan an ni bawk.

The Prophets hian music video siamin intihsiakna hrang hrangah hlawhtlinna tam tak chang tawh mah se album an la tichhuak lo a, hei hi an band ngainatute pawhin a ruka an lo beisei thin chu a ni. Tunah chuan mipuite beisei ang ngeiin album hmasa ber tur an buaipui thu an puang chiang ta - thu lawmawm ava ni em. 

Tunkar khan studio an luhchilh tan a, hla engzat nge an record dawn erawh a la hriat loh. An debut album tihchhuah hun tur hi a la hriat loh a, kumin chhung chuan kan hmuh hman ngei a beisei awm thung. 

The Prophets te hi an original line-up an kim thei lo chungin India rama rock contest lian leh ngaihhlut ber zinga mi ShiRock-ah pakhatna ni thei an ni a, lawmman pawh Rs. 10 lakhs lai an dawng a nih kha. Tunah chuan an original vocalist Ronnie Hmar hoin recording an nei leh thei tawh a, album  thar nen The Prophets tak tak an rawn inlar leh tawh dawn e. 

An band member te hi Zorimawi khawvela hriat hlawh leh tha ber berte an ni a, hlawhtlinna an chang fo pawh hi a mak lem lo. An vocalist Ronnie Hmar zaithiam zia sawi nawn a ngai lo a, Eric Renza, Samuel Chawngthu leh Gordon Hnamte ten an chanpual an hnehsawh a, Mamoia Colney phei chu Mizo ten drummer kan neih that ber zinga mi a ni.