Mizo film thar mahse a film hming saptawng ni si 'The Sky Is Ours' chu Zirtawpni zan khan tlangzarh a ni ta. Tlangzarh zan hian Vanapa Hall khat tlat mipui an pungkhawm a, milar leh lar lo deuhte an inpawlh nuk - Runmawi leh Zonet Empai application-ahte en theihin a awm.

'The Sky Is Ours' hi Wayward Production kut chhuak film hmasa ber a ni a, a entlak viau. Chutihrual chuan an tawnhriat neih tlemna lai hmuh tur a la awm zauh zauh a, mit tikham viau tham erawh a ni lem lo - a tha thawkhat e. Mizo film-a kan la hmuh zen zen loh chiang taka in 'muah' hmuh tur a awm a, Mizo film-ah chuan thil thar a ni.

Chhungkuaa en him tur PG ratings a hrana siam a ni a, kumtling chin en tur 18+ ratings siam a ni bawk. Hetianga ruahmanna tha tak siam hi a finthlak rualin, mipui nawlpui en theih tura chhawp chhuah hi kan Mizo Society-ah a him em tih pawh zawhna awm thei tak a ni. Sap leh hnamdangte chuan kum tam tak lian ta khan an lo ching daih tawh a, amhse keini ramah chuan hmuh tur la awm zen zen lo a ni.

Kan model chhuanvawr Nunu Rualhleng khan an film channah khan a chanpui vai kha chiang takin a lo 'kiss' ve tawh bawk a, kha phei kha chu social media lamah khel a hlawh viau a nih kha. Hmasawnnah ngaih tur nge a tha lo zawnga hmasawnna tih pawh a thlirtute ngaihdanah thui tak a innghat awm e. Engpawh nise Mizo Film Industry-in nasa takin hma a sawn a, a tha zawng leh a tha lo zawng pawhin nghawng chu a nei chho zel dawn a, entu mipuite kan pawimawh tulh tulh dawn a ni.