Inkhawmpui tiak Presbyterian Kohhran Pastor Bial Inkhawmpui chu ni 22.4.2018 (Pathianni) zan khan a tiak a, Pathianni chawhnu inkhawmah Lalpa zanriah Sakramen theh a ni a, zan inkhawmah bial chairman kalchhuak turte’n inthlahna sermon an sawi. Thehlut Mizoram sawrkarin Seventh Pay chungchang zirchiang tura din Mizoram Pay Committee 2017 chuan an zirchianna chu ni 23.4.2018 (Thawhtanni) khan Finance Minister Lalsawta hnenah an thehlut. Foundation day Ni 23.4.2018 (Thawhtanni) khan Mizo Academy of Letters chuan an pawl din cham Annual Foundation Day hmangin kum 2017 chhunga Mizo tawng lehkhabu chhuak zinga tha ber Mizo Book of the Year 2017 lawmman hlanna an nei bawk. Meeting Ni 23.4.2018 (Thawhtanni) khan Mizoram Chief Secretary Arvind Ray hovin Chief Secretary’s Conference Hall-ah Mizoram Right to Public Services Act, 2015 chungchangah meeting neih a ni. Endik Serchhip khaw chhunga Porcine Reproductive and Respiratory Syndrome leh Classical Swin Fever nia rinhlelh vanga Vawk thi leh damlote chu ni 23.4.2018 (Thawhtanni) khan Central mithiam ten an endik. Buhfai tha Ni 23.4.2018 (Thawhtanni) khan Rajya Sabha MP Ronald Sapa Tlau chuan thuthar thehdarh tute Regency Hotel ah kawmin Food Corporation of India Kudam-ah buhfai chhekkhawl dinhmun a that tawk thu a sawi. Inkawm Aizawl Superintending of Police C.Lalzahngoa chuan ni 23.4.2018 (Thawhtanni) khan MJA te lengah sawmin a kawm a, Aizawl khawpui ralmuanna atana thawhhopuiah a sawm. Vote chhiar 10th Chakma Autonomous District Council (CADC) inthlanpuia vote tlate chu ni 24.4.2018 (Thawhlehni) khan Chawngte SDO (Civil) office-ah chhiar a ni a, MNF-in seat 8, INC in seat 6 leh BJP-in seat 5 an la. Edu fest Mizorama educational festival lian leh hlun ber Edufest vawi 16-na chu ni 24.4.2018 (Thawhlehni) khan Assembly Annex basement-ah MJA President Zonunsanga Khiangte-in a hawng. Malaria day Ni 25.4.2018 (Nilaini) khan High School Field, Zarkawt-ah Health Minister Lal Thanzara hovin World Malaria Day puala hun hman a ni a, kum 2013 atanga 2017 inkar chhungin Mizoramah malaria vanga thi mi 85 chhinchhiah an ni. Ruihhlo man Ni 25.4.2018 (Nilaini) khan Vairengte Police Check Gate duty te chuan ruihhlo atana hman damdawi hlauhawm tak Methamphetamine mum 73,800 an man a, an ruihhlo man hlutzawng hi Rs. 1,84,50,000 hu a ni. Thawhho tum Chakma Autonomous District Council ah party mala sawrkar siam thei an awm loh hnuin ni 25.4.2018 (Nilaini) khan Congress leh BJP-te chuan Joint Legislature Party dinin tangrual sawrkar siam turin thuthlung an ziak. Sawipui Delhi MZP hruaitute chuan April ni 25 khan MoS for Home Kiren Rijiju chu a chenna inah an kawm a, Mizorama dan lova ram dang mi lut chungchang an sawipui. MZU dincham Ni 25.4.2018 (Nilaini) khan Mizoram University (MZU) chuan an din champha vawi 18-na chu MZU Auditorium-ah an lawm a, Finance Minister Lalsawta chuan khuallian niin a hmanpui a ni. Mock drill Ni 26.4.2018 (Ningani) khan Mizoram district hrang hrangah National Disaster Management Authority, New Delhi leh Disaster Management & Rehabilitation Department huaihawtin Multi State Mock Exercise on Earthquake Disaster chu kan thenawm state Tripura leh Nagaland rualin kalpui a ni. MUP khawmpui Ni 26.4.2018 (Ningani) khan Mizoram Upa Pawl inkhawmpui lian vawi 46 na chu Synod Conference Centre, Aizawl-ah tluang taka neih a ni. Sawipui Chief Minister Lal Thanhawla chuan Ningani (26.4.2018) khan Tuirial Airfield hmuna National Cadet Corps (NCC) Academy din leh Lungleia NCC group Headquarter din chungchang mi pawimawhte a sawipui.