LRS dik lo? Mizo Students Union (MZU) chuan Thawhtanni khan thuchhuah siamin, Land Revenue & Settlement department-a data entry operator (DEO) muster roll-a mi pariat lak turah personal interview result nghah a nih mek laiin, interview turin mi dang koh leh an ni tih an tarlang a; "Hei hi DPAR-in Recruitment Rules (RR) a siam kalh a ni," an ti. Faina inelna Thingtlang khaw fai inelna Swachh Survekshan Grameen (SSG) 2018 chu Thawhtanni khan Kolasib district-a kalpui tan turin DC conference hall-ah district bawrhsap Dr Arun T-in a hawng. TKP Kum 67 Thawhtanni kha Thalai Kristian Pawl (TKP) din champha, ?KP Day vawi 67-na a ni a, Mizoram leh Mizoram páwna TKP unit hrang hrangte'n an hmang. Chhun lam chu khawtlang leh mi dangte tana thil tha tihna atana an hmang a, zanah inkhawm buatsaih niin, thupui chu 'Pathian chung lam koh chhan' tih a ni. Doctor 36 Health & Family Welfare department chuan Thawhtanni khan thuchhuah siamin, sorkar damdawi-in hrang hrangah doctor indaih lohna nasa tak a awm tih a tarlang a, doctor 36 lak tharna tur buaupui mek a nih thu an puang. Aizawl-in lawmman Sorkar laipuia Ministry of Housing and Urban Affairs hnuaia hmalakna pakhat, Atal Mission for Rejuvenation and Urban Transformation (AMRUT) hnuaia hmalaknaah Aizawl chu a ti tha zual zingah a tel a, lawmman cheng nuai 115 a dawn tih Thawhlehni khan a tarlang. Cancer Clinic Cancer Society of Mizoram (CSM) leh Zemabawk Branch MHIP ?angkawp chuan Thawhlehni khan Zemabawk YMA Hall-ah Cancer Detection Clinic an buatsaih a, Mizoram State Cancer Institute (MSCI) director Dr. Zoramthanga'n a hmanpui. Workshop World Health organisation, Ministry of Health & Family Welfare leh Mizoram sorkar bultumin, Thawhlehni khan Aizawlah State AEFI Surveillance Work­shop neih a ni a, National Health Mission (NHM) director Dr Lalrozama'n a hmanpui. PUC-ah PG Nilaini khan Pachhunga University College (PUC)-ah master degree pathum - Mizo, Philosophy leh Life Sciences zirna din thar chu nimin khan MZU pro. vice chancellor Prof. RP Vadhera-a'n a hawng. CM hoin ruihhlo Nilaini khan chief minister Lal Thanhawla kaihhruai Ruihhlo Do Core Committee chu Chief Minister's Office (CMO) conference hall-ah an thukhawm a, ruihhlo do dan tur an sawiho. Bawlhhlawh UDPA department chuan Nilaini khan kumina Mizoram khawpui fai intihsiakna atana inbuatsaihna leh intihsiaknain a ken tel solid waste management (bawlhhlawh paih leh sawngbawl dan) chungchangah Kolasib College Vengah awareness programme an buatsaih. Fai inelna Ministry of Drinking Water and Sanitation (MDWS) hnuaia India ram puma thingtlang khaw fai inelna, Swachh Survekshan Grameen 2018 chu Lunglei DC Ankita Chakravarty-i'n an district-a kalpui ?an turin Nilaini khan a hawng. Remna Run lawi Peace Accord MNF Returnees' Association (PAMRA)-in Remna Rûn, Luangmuala 'Remna Rûn Lawi' hriatrengna lungphun an siam chu Ningani khan chief minister Lal Thanhawla'n a hawng. Chief Minister chuan, ram tana nunna hlântute hlutzia leh rál do tura chhuak lo kîr lehte tuamhlàwm a pawimawh thu a sawi. Thi Zosap missionary zinga Mizoram chhuahsan hnuhnung ber zinga mi, Rev. Alwyn Roberts (84) chu Ningani zing dar 2 khan cancer natna vangin Bangor, Wales-ah a thi. Amah hi Mizorama zirna kawnga sûlsutu leh Pachhunga University College (PUC) principal hmasa ber a ni. Mamit zirna Mizorama district zinga India ram pum huapa district tihhmasawn leh chawikân ngai bika puan, Aspirational District-a tel, Mamit district chu zirna lama tihhmasawn dan tur ngaihtuahin Ningani khan Mamit DC conference hall-ah sorkar hotute an thukhawm a; School Education secretary Esther Lalruatkimi'n a kaihruai. MRPS Act zirho Mizoram sorkar hnuaia mipui hnena sorkarin service a pek ?hin hunbi neia pek chhuah ngei ngeina dan, Mizoram Right to Public Services Act, 2015 chungchang zirhona leh inhrilhfiahna hun Thawhlehni khan Administrative Training Institute (ATI) auditorium-ah neih a ni a, Health secretary Lalrinliana Fanai-in a hawng. MYC leh MEA Mizoram Youth Commission (MYC) chairman Joseph Lalhimpuia, MLA chuan July 31, Thawhlehni khan New Delhi-ah Ministry of External Affairs (MEA) hotute a hmuin, Mizo thalaite'n ram danga hna an thawh theih dan tur a sawipui a; sorkar laipui hriatpuia India ram páwna hna thawh tur tha leh him ngaihtuahpui turin a ngen.