NEC Meeting North Eastern Council (NEC) meeting vawi 67-na chu Thawhtanni khan Shillong-a State Convention Centre-ah tan a ni a, Union Home minister Rajnath Singh-a’n a kaihruai. Meeting-ah hian Mizoram Governor Kummanam Rajasekharan leh chief minister Lal Thanhawla te pawh telin, Mizoram sorkar hmalakna leh mamawhte an sawi. Nabati Kamram (wafer) chi khat, Nabati chu tun hnaiah mi thenkhatin an ei avangin harsatna an tâwk anga social media-a thu thehdarh a awm a; hemi chungchangah hian Health & Family Welfare department-a Food & Drugs Administration (FDA) chuan laboratory-ah an enfiah dawn tih Thawhtanni khan an sawi. NGO Training NGOs Training on Basic Disaster Management for YLA & MTP chu Thawhlehni atang khan State Disaster Response Force Training Centre, CTI Sesawngah tan a ni a, DMR minister C.Ngunlianchunga'n a hawng. Kutthlak July 9, Thawhtanni zan dar 9 vel khan Kulikawnah Pathian thu sawia kal kual thin K Remsangpuia (20) chu an veng Kulikawn SP Road-a thu a sawi laiin thu a sawina bula chêng H Lalsiamliana (50 vel), PHE department-a executive engineer chuan kut a thlak a; H Lalsiamliana hi police-in an man nghal. Police thing phun Mizoram Police PRO chuan thuchhuah siamin, kumina Green Mizoram Day pualin Mizoram police unit hrang hrangte'n thing tiak 4,146 an phun tih a tarlang. Lottery titawp Mizoram sorkar chuan Mizoram State Lottery kalpui mek chu July 10, Thawhlehni khan a titawp. Lottery tihtawpna thupek hi Finance department chuan a chhuah a ni. School khar Mizoram Government Lumpsum Grant-in-Aid Higher Secondary School Association (MIGLAHSSA) leh lumpsum higher secondary school (HSS) awmnaa Managing Board-te'n adhoc grant-in-aid dinhmuna hlángkai tura sorkar an phût vanga June 18, 2018 atanga sikul an khar chu an la chhunzawm zel a; Nilaini thleng khan state holiday tel loin ni 17 chhung sikul an khâr tawh. Hawng World Vision India leh Mizoram State Child Protection Society chuan Ningani khan Administrative Training Institute (ATI) Auditorium-ah naupang pawngsual/khuaikhem dona beihpui, ‘It takes Mizoram to end child sexual abuse’ campaign hawn inkhawm an buatsaih a, Law & Judicial minister Lalsawta'n a hawng. Ramri Mizoram leh Assam ramri zir chiang tura Mizoram sorkarin a din Core Committee hnuaia Task Team chuan ramri enfiah thawh khatna Ningani khan an zo. Rokunga award Rokunga Memorial Society (RMS) chuan Ningani khan Synod Conference Centre-ah Rokunga Award 2018 hlanna inkhawm an buatsaih a; award hi R.Zaikunga, Lunglei Lunglawn hnenah an hlan. RMS hian award hi kum thum dana pek thin an tum. MSLSA leh MJA Mizoram State Legal Services Authority (MSLSA) leh MJA chuan Ningani khan chanchin­bumite tan legal awareness an buatsaih a; Protection of Children from Sexual Offences (POCSO) Act, 2012 leh information technology leh cyber crime chungchang dante inzirtir a ni. MZP in hal MZP headquarters, Lunglei chuan Lunglei Civil Hospital (LCH)-a thawk doctor hmun danga sawn chhuah hnua tun thlenga anmahni thlaktu tur sorkarin a la dah loh vanga lungawi lohna lantir nan Zirtawpni khan LCH Medical Superintendant pisa kawtah transfer order copy an hâl. Cement man Mizo Students’ Union-in cement rate tihsan chungchanga FIR an thehluh bawhzuiin Aizawl SP C Lalzahngoa chuan Zirtawpni khan cement company pathum - Star, Topcem leh Dalmia dealer-te leh an aiawhte a pisaah a ko. Aizawl SP hian cement company leh an agent-te chu Mizorama cement man an tihsan tawh chu tihniam leh tur leh, chutiang a nih theih nana hma la turin a hrilh. PUC chawimawina Pachhunga University College (PUC) chuan Zirtawpni khan an college auditorium-ah zirlai lut tharte lawmna leh zirlai ti thate chawimawina an hmang. SHC Member la lut Sinlung Hills Council (SHC) sorkar lailawka member turte chu Zirtawpni khan Aizawl DC Dr A Muthamma-i'n a pisaah rinawmna thu tiamtirin a la lut. SHC member atan hian sorkarin a ruat mi 12 leh nominated member mi pahnih, an vaiin mi 14 lak luh an ni. Zorama thubuai Aii Pûk chungchanga chief minister hlui leh MNF president ni lai Zoramthanga thubuai chu Nilaini khan Aizawl District & Sessions Court-a Special Court-in a ngaihtuah hun a ni a; mahse, case Investigating Officer (IO) damlohna vanga a inlan theih loh avangin thubuai ngaih­tuah hun sawn a ni.