NGO in ral Ni 28.5.2017 a Downtown Univesity Guwahati a lehkha zirlai C. Lalhmangaihsanga leh R.Lalmalsawma, Lunglei Electric veng te Guwahati-a an Institution bul a an tualthih chungchangah an thihchhan diktak chhuichian phuta hma latu NGO Co-Ordination Comittee chuan ni 26.6.2017 (Thawhtanni) khan Electric veng Community Hall-ah a rual a ralna hun an hmang. Lo zin Union Minister of State for Youth Affairs and Sports Vijay Goel chu ni 26.6.2017 (Thawhtanni) khan Mizoram a lo zin a, a lo thlen veleh Sairang a football academy dinna tur leh Sihhmui a cricket stadium sak mek a tlawh. SEDP zir Ni 26.6.2017 (Thawhtanni) khan MNF AMC leh Local Council Members te pualin SEDP Training chu Ramhlun Indoor Stadium ah neih a ni. Hawng Mission XI Million programme chu ni 27.6.2017 (Thawhlehni) khan AR Lammual-ah hawn a ni a, Youth Affairs and Sports changtu Union Minister Vijay Goel chuan he hun hi a hmanpui. Press kawm MNF Thalai President Er. Lalrinawma chuan ni 27.6.2017 (Thawhlehni) khan Hnam Run ah Press mite a kawm a, “Kan politician te zingah zalenna suala hrehawm taka rammu te zalenna suallo anga an sawi hi rilru a na a. Keini chuan zalenn a sualtute kha kan ngaihluin ropui kan ti tak zet a ni,” a ti. Thukhawm State Employment Guarantee Council chu an Chairman Rural Development Minister R. Lalzirliana kaihhruaiin ni 27.6.2017 (Thawhlehni) khan Aijal Club Conference Hall-ah an thukhawm a, Mahatma Gandhi National Rural Employment Guarantee Scheme leh thil pawimawh dangte an sawiho. Hmanpui Central Armed Police Forces (CAPF) Under 19 Football a champion Mizo naupangte lo lawmna hun chu ni 27.6.2017 (Thawhlehni) khan Assam Rifles chuan an nei a, Chief Minister Lal Thanhawla leh Health Minister Lal Thanzara, Mizoram Football Association (MFA) President ni bawk ten an hmanpui. Ruihhlo do ni Khawvel pum a ruihhlo hmansual leh tawlhruk dona ni pualin ni 27.6.2017 (Thawhlehni) khan Vanapa Hall-ah hun hman a ni a, kumin he ni puala thupui thlan chu “Ngaithla phawt rawh (Listen First)” tih a ni. He hun hi Minister pahnih P.C. Lalthanliana, Social Welfare leh Lal Thanzara, Health & Family Welfare ten an hmanpui. Inzirtir Central YMA buatsaihin Thawhlehni kalta zan (27.6.2017) khan Aizawl khawpui chhunga Branch YMA te tan Zonun zemawi inzirtir thar lehna Aizawl Vanapa hall-ah neih a ni. Khawmpui Mizoram Apex Handloom and Handicrfats Cooperative Society Ltd. (MAHCO) Annual General Assembly vawi 40-na chu ni 27.6.2017 (Thawhlehni) khan I&PR Auditorium Treasury Square-ah hman a ni. Hmuchhuak Mizoram University a Department of Environmental Science a thawk, Dr. John Zothanzama, Assistant Professor leh a Research Scholar Josiah MC Vabeikhokhei leh Zohmangaiha te chuan Pa (mushroom) chi thar an hmuchhuak. He an pa (mushroom) hmuhchhuah thar hming atan hian Ganoderma Mizoramense tih an vuah a ni. Khawmpui Chief Minister Lal Thanhawla chuan ni 28.6.2017 (Nilaini) khan Mizoram Cooperative Apex Bank Limited inkhawmpui vawi 24-na, Vanapa Hall-a neih chu khuallian niin a hmanpui. Apex Bank hian kum 2016-17 ah hlep cheng nuai 624.16 an nei. VC zirchiang Ni 28.6.2017 (Nilaini) khan New Secretariat Conference hall-ah Local Administration Department(LAD) leh SIRD tangkawp chuan Village Council (VC) leh Panchayati Raj Institution (PRI) khaikhinna, VC atanga PRI a inleh a tul em tih chungchangah te official, VC, Party hruaitute leh mipui aiawh te tan inrawnkhawmna leh zirchianna neih a ni. BoC Ni 28.6.2017 (Nilaini) khan AMC Board of Councillors meeting neih a ni a, thutkhawmah hian Building Regulations leh Parking area siam rem ngaite siamrem a ni a, Parking fee rate thar engemawzat pawm thar a ni bawk. Pisa hawng Ni 28.6.2017 (Nilaini) khan Transport Minister John Rotluangliana chuan Aizawl Vanapa Hall bula Transport Directorate Building sak thar a hawng.