Hriattir Mizoram State Legal Service Authority (MSLSA)-in Mizoram sorkar an khin avangin Gauhati High Court (GHC), Aizawl Bench chuan Mizoram sorkar chu MSLSA-a post 38-te a rang lama siam tur leh hnawhkhat turin Thawhtanni khan a hriattir. Hrem Naupang kumtlinglo khawih chingpentu Lalruatsanga (28), Chawlhhmun, Aizawl chu POSCO Act special judge Joel Joseph Denga chuan kum 12 táng tur leh Rs. 20,000 chawi turin Thawhtanni khan a hrem. ISO certificate Thawhtanni khan Mizoram University (MZU) auditorium-ah MZU leh Pachhunga University College (PUC) hnenah International Organization for Standardization (ISO) certificate hlanna inkhawm hman a ni a, Higher & Technical Education minister R Romawia'n a hmanpui. HIV 371 Mizoram State AIDS Control Society (MSACS) leh FHI360 chuan Thawhlehni khan Whitestone Conference Hall, Ramhlun Venglaiah ruihhlo (drug)-a inchiu thinten HIV natna an kai lohna tura Oral/Opioid Substitution Therapy (OST) damdawi pek chhuahna lama thawkte tan intuaitharna an buatsaih. He hunah hian OST la mek zingah HIV hrik pai mi 371 an awm thu an tarlang. Ruihhlo hal Zawlnuam Vengpui Joint Action Committee (JAC) ten June-July 2018 chhunga ruihhlo an man, Rs. 5,81,702 hû chu Thawhtanni khan an hal. Ruihhlo hâlte chu - heroin, Epirex leh zute a ni. Trophy hlan Mizoram Youth Commission (MYC) leh ALS ten July 14, 2018-a IIT-JEE & NEET Scholarship Examination an buatsaih result chu July 21 khan tihchhuah a ni a; exam-a a ti tha, topper-te hnenah MYC chairman Joseph Lalhimpuia'n Thawhtanni khan a pisaah trophy a hlan.   MPSC online Mizoram Public Ser­vice Commission (MPSC) kaltlanga sorkar hna dil turte tana online-a inziah luhna, one time registration leh online application chu Thawhlehni khan MPSC mini-examination hall-ah MPSC chairman Rev. Zosangliana Colney-in a hawng. Ronald Sapa Thawhlehni khan New Delhi-a Venezuela Embassy-ah Venezuela ram zalenna kum 207 tlin lawmna leh Venezuela-India Youth Dialogue 2018 neih a ni a, Mizoram Rajya Sabha MP Ronald Sapa Tlau khuallian a ni. Cyber Crime zir Mizoram Police-a CID (Crime) buatsaih ni thum awh 'Cyber crime awareness prog­ramme for Mizoram sub-ordinate police officers' chu Nilaini khan Aizawl SP conference hall-ah IGP (Intelligence and Law & Order) LH Shanliana'n a hawng. LHSS hawng Lungdai Health Security Scheme (LHSS) chu Ningani khan chief minister Lal Thanhawlan Lungdai community hall-ah a hawng. Training Mizoram State AIDS Control Society (MSACS), Aizawl Civil Hospital-a Microbiology department leh FHI360 te chuan Thawhlehni khan Agriculture directorate conference hall-ah private hospital-a HIV/AIDS chungchanga thisen endikna tluantling a awm theihna tura hmalakna atan training an buatsaih a; a kaihhnawiha thawktute an tel. Sipai luh kum Mizoram Youth Commission (MYC) chairman Joseph Lalhimpuia, MLA chuan, kumin 2018 chu MYC-in Mizo thalaite ‘Sipaia luh rûnpui kum' atan an puang tih Ningani khan a sawi a; MYC-in sipaia lut duhte tan thla hnih awh training an buatsaih dawn tih sawiin, chuta lut tur chu Mizo thalaite a sáwm. Nuar All India Federation of Doordarshan Programme Personels, Central Committee huaihawtin tun kar chho khan India ram pumah Doordarshan station zawng zawngah lungawi lohna, sit-in demonstration neih a ni a, Doordarshan Kendra, Aizawl pawhin lungawi lohna lantirna hi July 26, Ningani atang khan an zawm. DC leh MJA Champhai DC Dr Naveen Aggarwal leh Champhai district MJA member-te chu Zirtawpni khan DC conference hall-ah an inkâwm a, an district hmasawnna tura hmalakna hrang hrangte an sawiho. SSG Thingtlang khuate faina lama an inelna, Swachh Survekshan Grameen 2018 chu an district chhunga bul tan a nih theih nan Zirtawpni khan Champhai leh Mamitah hawn a ni. Cabinet ah lottery Mizoram sorkarin lottery a kalpui zel dan tur ngaihtuahtu State Lottery Committee chuan rawtna an neihte Cabinet meeting-a ngaihtuah turin an thehlut tawh tih Zirtawpni khan tarlan a ni. Bru in phut Tripura atanga Mizo­rama lêt tawh Mizoram Bru-te intêl khawmna, Equal Package Demand Committee (EPDC) chuan July 24, Thawhlehni khan Union Home minister Rajnath Singh hnenah lehkha an thawn a; Tripura relief camp atanga Mizorama Bru lak let turte dawn tur ang dawn ve an phût thu leh August 14, 2018 hmaa pek ve an phût thu an tarlang. &&&&&