Green Mizoram Day Thawhtanni khan Mizoram hmun hrang hrang­ah Green Mizoram Day hman a ni. Aizawl­ah chuan Chite lui kam, Ramthar Veng leh Thuampui inkara Chite lei bulah hman a ni a, chief minister Lal Thanhawla'n a hawng. AR sawn chhuah sawi Central YMA hruai­tute chuan Thawhtanni khan Home Secretary Lalnunmawia Chuaungo chu a pisaah an kawm a, Aizawl khawpui laili atanga Assam Rifles-te Zokhawsanga sawn dan tur an sawipui. BSNL kharsak Central Young Lai Association (YLA) chuan Lawngtlaia BSNL network chhe lutuk vanga an hmalaknain awmzia a neih loh avang leh BSNL-in network that loh vanga bill rebate tura agreement an la tihhlawhtlin loh avangin Thawhlehni a?ang khan Lawngtlaia BSNL pisa an khârsak. Vawk lakluh khap Serchhip DC chuan Thawhlehni khan thupek chhuahin, Serchhip khaw chhungah vawk hri PRRS a lêng nia rinhlelh a nih avangin, an district páwn a?angin thla 2 chhung vawk lak luh leh an district atanga thawn chhuah a khap. Champhai hmasawnna Champhai District Development Coordination & Monitoring Committee chu Thawhlehni khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an thu a, sorkar laipui scheme hnuaia hmasawn-na hnathawh an thlirho. Huaisen lawmman Thawhlehni khan Secretariat conference hall-ah huaisen lawmman Jeevan Raksha Padak Award, 2017 sem a ni a, award hi mi panga hnenah hlan a ni. Ramri Nilaini khan Joint Action Committee on Inner Line Reserved Forest (JAC on ILRF) hruaitute chuan, Inner Line Reserved Forest chu Mizoram leh Assam ramri a nih loh thu an sawi a, Mizoram ramri chu Mizoram sorkar leh mipuiin an ngaihthah rei tawh avangin, ngaihven thar lehzual turin an ngen bawk. World Blood Donor Day June 14 kha World Blood Donor Day a ni a, Aizawl leh district headquarters hrang hrangah hman a ni. Thupui chu 'Be there for someone else. Give blood, share life' tih a ni a; pawl hminga thisen pe thate hnenah chawimawina hlan a ni. YMA leh PWD Mizoram PWD leh Central YMA chuan Ningani khan CMO conference hall-ah kawng hrang hranga thawkho turin inremna thuthlung (MoU) an ziak a. Central YMA agenda pakhat ‘Mizorama inkalpawhna kawngpui tha leh changtlung zawk kan neih theih nan CYMA-in hma la rawh se' tih bawhzuina niin Central YMA hotute chuan an sawi. YMA Day YMA Day vawi 84-na chu Zirtawpni khan Mizoram pumah leh Mizoram páwn hmun ?henkhatah lawm a ni a. Programme chi hrang hrang huaihawt niin a then sport te an nei bawk. Central YMA president Vanlalruata chuan, YMA-in nasa zawkin ruihhlo an do zel dawn tih a sawi. Sipai bang thlawp Mizoram Home Guards Service Association (MRHGSA) chuan Zirtawpni khan thuchhuah siamin, Mizoram Home Guards & Civil Defence (HGCD)-a director general (DG) post siam duh lohna lantira Mizoram Ex-Service League-in Aizawla kawng an zawh chu an thlàwp thu an sawi. Ramsial kah pawiti Biodiversity and Nature Conservation Network (BIOCONE) chuan Zirtawpni khan thuchhuah siamin, Mizoram khawthlang lama ramsa hlu leh váng tak, a rêm hlauhawm, danin a humhalh ramsial chu mi thenkhat kutthleiin an kap hlum chu pawi an tih thu an tarlang. June thla tìr lam khan Mamit district-a Kanghmun ramah ramsial pachal pakhat chu kah hlum a ni. Pawngsualtu hrem Naupang kumtlinglo pawngsualtu Tlanghluilova (53) s/o Siamliana, Champhai Hospital Veng chu Champhai District Court-a special judge R Vanlalena'n kum 15 chhung jail-a táng tur leh Rs. 9,000 chawi turin a hrem.