Zirho Thawhtanni khan ATI-ah Project Himna - Mizoram Against Drugs, Alcohol & Tobacco (MADAT) hnuaia hmalakna pakhat, Training of Trainers for Church Leaders on Prevention of Substance Abuse buatsaih a ni a, Aizawl DC Dr A Mutham ma-i'n a hawng. Governor thar lalut Mizoram Governor 19-na atan Thawhlehni khan Kummanam Rajasekharan chu rinawmna thu tiamtira lak luh a ni. Joint NGO-in CEC hmu NGO Coordination Committee (Joint NGO) hruaitute chuan Thawhlehni khan chief election commissioner (CEC) OP Rawat chu Election Commission of India (ECI) office, New Delhi-ah an hmu, Bru-te chu Mizoram páwna vote thlaktir tum a nih chuan na taka an dodal tur thu an hrilh. Hawng Thingtlang mite tana in sak tanpuina tura ruahman, Chief Minister's Rural Housing Scheme chu Thawhlehni khan Rural Development department minister R Lalzirliana'n RD directorate conference hall-ah a hawng. Chhui zo Sesawng leh Khaw ruhlian inkara Tuirini lei chim chhan chhui tura din Magisterial Inquiry, Aizawl DC Dr A Muthamma kaihhruai chuan lei chim chhan an chhui zo a, sorkarah report an thehlut tawh tih Thawhlehni khan an sawi. Bank khâr United Forum of Bank Unions (UFBU) hmalaknain, Nilaini zing dar 6 atang khan India ram bank-a thawkte'n Indian Bank Association (IBA) leh sorkar laipui laka an lungawi lohna lantirna atan bank-te an khâr a, hemi thlawp hian Mizoram bank hrang hrangte khâr ve a ni. Enfiah Health minister Lal Thanzara leh Mizoram Journalist Association (MJA) member-te chuan May 29, Thawhlehni khan State Referral Hospital, Falkawn behchhana din tur, Mizoram Institute of Medical Education & Research (MIMER) an tlawh a, medical college din tura hmalakna hrang hrang an en. TB vei mi 623 Revised National TB Control Programme (RNTCP) chuan Nilaini khan Health Service directorate conference hall-ah 1st Quarter Review Meeting an nei a, kumin January-March chhungin Mizoramah Tuberculosis (TB) vei hmuh chhuah mi 623 an awm thu leh TB vangin mi pali an thih thu an tarlang. World No Tobacco Day Ningani kha World No Tobacco Day a ni a, Mizoram hmun hrang hrangah hman niin Aizawlah chuan Lal Thanhawla Auditorium-ah National Tobacco Control Programme (NTCP), Indian Society on Tobacco & Health (Mizoram Chapter) leh National Service Scheme (NSS) huaihawta hman a ni a, School Education minister H Rohluna'n a hmanpui. Chhan chhuak Social Welfare department chuan May 31, Ningani zan khan Hunthar Veng MHIP Hall-ah 'Awareness on Anti Human Trafficking' an buatsaih, Hmang tlem Reserve Bank of India (RBI)-in 'Handbook of Statistics on Indian States' a tihchhuaha a lan danin India rama state 29 zingah Mizoram chu hmasawnna leh ram ruhrel siamna (capital expenditure) atana sum hman kawngah tun hnai kum 9 chhunga sum hmang tlem ber dawttu a ni . Ruby Jubilee Bible Society of India (BSI) Aizawl Auxiliary chuan Zirtawpni atang khan an kum 40-na, Ruby Jubilee an lawm tan a, zaninah a tiak ang. BSI Ruby Jubilee lawmna hi Mission Veng Kohhran-in an thleng a ni. Hmuh belh Archaeological Survey of India (ASI) Aizawl Circle-a hotu, Dr. Sujeet Nayaan chuan Khawbung khaw bula Mubu rama Lung Dawhkân awmna leh a chhehvelte a zir chiang tan a, Mizo pípúte sûlhnu eng emaw zat hmuh belh a ni. Mi rethei In Urban Development and Poverty Alleviation (UDPA) minister Zodintluanga chuan Zirtawpni khan Durtlanga Economically Weaker Section (EWS) Housing Complex a hawng. Sawiho Champhai Thalai Pawl (CTP) chuan Zirtawpni khan Champhai District Hospital chungchangah medical superintendent Dr. Zatluanga an kâwm a, damdawi-in hmasawnna tur an sawipui.