Ruat Governor Lt. Gen. Nirbhay Sharma chuan Mizoram Public Service Commission Chairman atan Rev. Zosangliana Colney leh member thar atan PHE Secy. ni lai V.Lalremthanga IAS a ruat a, order hi ni 13.11.2017 (Thawhtanni) khan tihchhuah a ni. NLUP Kutpui Ni 13.11.2017 (Thawhtanni) khan NLUP Conference Hall-ah Chief Minister Lal Thanhawla hovin sawrkar mi pawimawhten meeting an nei a, NLUP hlawhtlinna hrang hrang phochhuahna tur NLUP Fare cum Exhibition ‘NLUP Kutpui’ hman nise tih an rel. Antibiotics Ni Khawvel pumpuia November ni 13-19 chhunga hman tur ‘World Antibiotics Awareness Week’ chu ni 13.11.2017 (Thawhtanni) khan Civil Hospital Conference Hall-ah Health Minister Lal Thanzara'n a hawng a, kumin atan thupui thlan chu "Antibiotics i hman hma in mithiam te rawn rawh" tih a ni. Training Electoral Roll Special Drive, 2017 neih tur chungchangah ni 13.11.2017 (Thawhtanni) khan Aizawl District chhunga Booth Level Officer-te tan Venghlui Central Hall, Aizawl ah training neih a ni. Session tan Ni 3 awh tur Mizoram Legislative Assembly thlasik thutkhawm chu ni 14.11.2017 (Thawhlehni) khan tan a ni a, Session neih karlaka MLA thi mi 3- Zakhu Hlychho, F.Lalzuala leh Col. Lalchungnunga Sailo te sun an ni. Phut MNF party chuan ni 15.11.2017 (Nilaini) khan thuchhuah siamin Chief Minister Lal Thanhawla chu kum 2013 Assembly inthlan dawna affidavit diklo a siam avangin bang turin an phut tih an sawi. Hetih lai hian Congress chuan thuchhuah siamin Chief Minister-in Kolkata-a ram a neih, affidavit-a ziah lan tel a nih loh chhan chu inthlan laiin neitu nihna a la neih fel loh vang niin an sawi. Bithliah Ni 16.11.2017 (Ningani) a Aizawl City Local Council Association thukhawm chuan Local Council hriatpuina lakman tan ILP ah Rs. 200, sumdawnna dawr licence atan dawr têah Rs. 50 leh dawr lianah Rs. 200, fakna leh thuziak tarna atan Rs. 200 leh residential, tribal leh income certificate-ah Rs. 10 zel lak nise an ti. Member thar Mizoram sawrkar chuan Mizoram Public Service Commission (MPSC) member atan Police a DIIG hna chelh mek C.Laldina IPS a ruat thar a, ruatna oreder hi ni 14.11.2017 (Thawhlehni) khan tihchhuah a ni. Zunthlum Ni National Programme for Prevention and Control of Cancer, Diabetes, CardioVascular Diseases and Stroke (NPCDCS) leh Mizoram Diabetic Society (MDS) huaihawtin ni 14.11.2017 (Thawhlehni) khan Chanmari YMA Hall-ah World Diabetes Day hman a ni. Hmanpui Finance Minister Lalsawta chuan ni 14.11.2017 (Thawhlehni) khan Consumer Protection & Welfare tih thupui hmanga National Workshop, Tourist Lodge, Aizawla neih chu khuallian niin a hmanpui. CM dang Ni 14.11.2017 (Thawhlehni) zing dar 10 vel khan MNF party chuan Chief Minister Lal Thanhawla Assembly session kaltur chu Zarkawt biakin bulah an dang a, hun rei vaklo Police te nen innawrin Chief Minister hi a tlang a ni. VC la lut Ni 16.11.2017 (Ningani) khan Mizoram University Vice Chancellor thar atana ruat Prof. Krothapalli Raja Surya Sambasiva Rao lawmluhna hun MZU auditorium-ah neih a ni a, lawmluh nzawh hian VC hian thuthar thehdarhtute a kawm zui nghal. Session tawp Ni thum (14-16) awh Assembly session chu ni 16.11.2017 (Ningani) khan tihtawp a ni a, session ah hian bill 4 pass a ni. Crime meeting Ni 16.11.2017 (Ningani) khan Aizawl SP Conference Hall-ah DGP Thianghlima Pachuau hovin crime review meeting neih a ni a, nikum aiin kumin kal mek ah thubuai ziahluh 315 in a tlem zawk.