Vigilance Week Thawhtanni khan India ram pumah Vigilance Week 2018 hman a ni a; Mizoramah pawh hmun hrang hrangah sorkar hnathawkten an hmang. Aizawlah chuan Secretariat Complex-ah chief secretary Arvind Ray hoin hleprukna nuaibo tura thutiam sawi rual a ni. Vigilance Week hi nimin thleng khan hman a ni. Zirlaite Ni Mizo Zirlai pawl (MZP) chuan Thawhtanni khan Zirlaite Ni leh MZP din chanpha vawi 83-na Vanapa Hall-ah an hmang a, Higher & Tech­nical Education joint director Ramhmangaiha Ralte khuallian a ni. Summit Public Health Foundation of India (PHFI) chuan Meghalaya sorkar leh Ministry of Development of the North East Region (DoNER) nen tangkawpin 3rd. North East Healthcare Leadership Summit chu Thawhtanni khan Shillong khawpuiah an buatsaih a; Meghalaya chief minister Conrad K.Sangma-a’n a hawng. Mizoram sorkar atangin Health secretary Lalrinliana Fanai a tel a ni. Training Mizoram Environment & Forest Conservation Forum (MEFCOF) chuan Thawhlehni khan NLUP Conference Hall-ah Sub. Headquarters Level Training an buatsaih a, NLUP Implementing Board vice chairman PL Thanga’n a hmanpui. Remsiami kawm Mizoram Journalist Association (MJA), Kolasib district chuan Thawhlehni khan Kolasib Press Club-ah Indian hockey player Lalremsiami Hmar chawimawina leh kawmna hun an hmang. ZOMA ding thar Management lama Mizoram leh Mizoten hma an sawn theihna atana hma latu tur pawl, Zoram Management Association (ZOMA) a ding thar a; an hruaituten Thawhlehni khan Aizawl Press Club-ah thuthar thehdarhtute kâwmin, an pawl din chhan leh hmalak dan turte an puang. Inthlan venhimna Thawhlehni khan Mizoram Police chuan thuchhuah siamin, Mizoram mipui leh Tripura-a awm mek Mizoram Bru-te’n thlamuang taka Mizorama vote an thlak theih nan hma lak mek zel anih thu an puang a; Mizoram inthlana duty tur Mizoram páwn atangin Central Armed Police Force (CAPF) leh State Armed Police (SAP) company 15 rawn thleng tawh tih an tarlang. MUP intihsiak Aizawl khawpui chhunga ‘MUP Léng­khawm Zai Intihsiak 2018’-a ti thate hnenah Thawhlehni khan Vanapa Hall-ah lawmman sem a ni a, Art & Culture secretary Sangdingliana’n a hmanpui. Lawmman sem in­khawm hi Art & Culture director R Hmingthanzuala'n a kaihruai a; intihsiaka pakhatna chu Bungkawn unit (Aizawl West-III area) an ni a, pahnihna leh pathumna chu Chawnpui Veng unit (Aizawl West-II area) leh Hlimen unit (Aizawl South-III area)-te an ni. Plastic Free Environment, Forest and Climate Change department chuan Nilaini khan Mizoram chhunga protected areas - National Park, Wildlife Sanctuary leh Tiger Reserve zawng zawng chu plastic awm lohna hmun, ‘Plastic Free Zone’ atan a puang. Rashtriya Ekta Diwas India ram tana zalenna sualtu leh India ram pumkhata siamtu zinga langsar ber pakhat - Sardar Vallabhai Patel pian champha vawi 143-na pualin Nilaini khan India ram pumah ‘Ram leh Hnam Inpumkhatna Ni’ (Rashtriya Ekta Diwas) hman a ni. Mizoramah pawh hman niin Aizawlah chuan Lammualah Governor Kummanam Rajasekharan hoa hman a ni. NMHP National Health Mission (NHM) hnuaia rilru lam hriselna lama hma latu National Mental Health Programme (NMHP) chuan Nilaini a?ang khan Administrative Training Institute (ATI)-ah ni thum awh tur Review Meeting cum Induction & Refresher Training an buatsaih. DC leh thutharlakhawmtu te Kolasib DC Dr Arun T chuan November 1, Ningani khan a pisaah thuthar thehdarhtute a kâwm a, thil pawimawh hrang hrang an sawiho. Dr Arun T chuan, chuan inthlanpui lo awm tur a tan inpuahchahna a kal tluan thu a sawi a ni. Hrem Cheng nuai 51.19 hû buhfai tichingpentu, Chawngtlai Supply Centre-a storekeeper hlui PC Vanlalruata, Khawzawl Vengthar chu Aizawl District & Session Court-a special judge Thang Lianmang Guite chuan kum 4 chhung jail-a táng tur leh Rs. 2,00,000 chawi turin Ningani khan a hrem. Rev. Dr. Zairema thuziak zir Pachhunga University College (PUC)-a Mizo department leh Zairema Memorial Society (ZMS) chuan November 1-2 chhung khan Rev.Dr Zairema thuziak zir chianna, ‘National seminar on Reconnecting Rev.Dr Zairema: An indepth study of his theological and prose writings’ tih an buatsaih.