DOWNLOAD OUR APP

Read latest news on your phone
app-store

The Week that Was (Oct. 16, 2016)

Oct 16, 2016

The Week that Was (Oct. 16, 2016)

Presbytery zo Mizoram Presbyterian Kohhran hnuaia inkhawmpui lian ber dawttu, Presbytery Inkhawmpui chu ni 9.10.2016 (Pathianni) zan khan a tiak a, Pathianni zan khan Moderator kalchhuak ten thu an sawi a ni. Thukhawm Thawhtanni kalta khan Health department leh Commerce & Industries department hotute chu Chief Minister Lal Thanhawla hoin Cabinet Room-ah an thukhawm a, Food Testing Laboratory (FTL) a taka hman theih thuai a nih dan tur an sawiho. Mental day Ni 10.10.2016 (Thawhtanni) kha World Mental Health Day  a ni a, Mizoram hmun hrang hrangah hman a niin kumin he ni thupui atan ‘Dignity in mental health - Psychological and mental health first aid for all' tih a ni. Bru sawiho Thawhtanni khan New Delhi ah Bru laklet chungchang mi pawimawh ten an sawiho a, Mizoram sawrkarin kumin November thla tawp lama Bru te laklet tura ruahmanna road map an siam chu Union Home Ministry hotute chuan tih hlawhtlin ngei tul an tih thu an sawi a, Tripura a Bru te awmna camp chu kal reng theih anih loh thu leh, an let duh lo anih pawhin tanpuina chu tih tawp mai anih tur thute an sawi bawk. Meeting ah hian Mizoram atangin Home Department Addl. Secy. Lalbiakzama, OSD Home David H Lalthangliana leh Central YMA Vice President Vanlalruata te an tel. Minister in hmanpui Thawhlehni khan Information & Public Relations Minister Lal Thanzara chuan Sialhau Branch YMA Platinum Jubilee, Sialhau Community Hall a hman mekah khuallian niin a tel pui a. Jubilee pual lungphun a hawng bawk. Inhmukhawm Mizoram Police Wives Welfare Association (MPWWA) chuan Thawhlehni khan Police headquarters-a Arya Mess-ah Rising Day leh General Body Meeting an nei a; Social Welfare minister PC Lalthanliana khuallian a ni a, DGP Thianghlima Pachuau, IGP Zorammawia leh police officer dangten an hmanpui. Sava veh Association for Environmental Preservation (ASEP) chuan State CAMPA bultumin Thawhlehni (11.10.2016) khan Aizawl Zoological Park (Sahuan)-ah One Day Sava Veh hlawhtling takin an nei. He hunah hian “Silai ni lovin Thlalakna zawkin le (Shoot with a Camera, not with a Gun)" tih chu thupui atan hman a ni. Hapta khar Aizawl Municipal Corporation (AMC) in kar khat awh Faina Hapta (Cleanliness Week) an hman chu Nilaini khan Chanmari YMA Hall-ah khar a ni a, a kharna inkhawmah hian AMC Mayor PC Lalhmingthanga chuan khuallian niin faina a tithate hnenah lawmman sem a ni. Faina Hapta puala veng fai lawmman dawngtute chu 1-na Laipuitlang, 2-na Republic Vengthlang, 3-na Luangmual, Consolation Prize Mission Vengthlang & Dinthar. College fai 1-na Aizawl Theological College (ATC), 2-na Pachhunga University College, 3-na Mizoram Hindi Training College, Consolation Prize Academy of Integrated Christian Studies (AICS) & Govt. Aizawl College te an ni. Hawng Mizoram sawrkara Disaster Management & Rehabilitation Department leh GeoHazards International/India tangkawpa buatsaih ‘Practical Applications of Neotectonics & Quarternary Geology in Geological Hazards Assessment Training’ chu Nilaini khan I&PR Conference Hall-ah Mizoram Governor Lt. Gen. Nirbhay Sharma in a hawng. Minister in en AH & Vety Minister C.Ngunlianchunga chuan Nilaini khan AH & Vety Farm, Mampui-a vawk note tam zawk thar chhuah theihna tura hma lakna a en. Minister chuan Mizoram chu vawk notea a intodelh theih nan hma lakna kalpui mek a nih thu sawiin, tuna Mampuia Pig Breeding Farm chu vawk note tam zawk thar chhuah a nih theih nan thuam that chhoh mek a ni, a ti. CM in hawng Chief Minister Lal Thanhawla chuan Ningani khan a vawikhatna atana Mizorama science lama mithiamte leh zirlai naupangte intawhkhawmna Mizoram Science Congress 2016, Mizoram University Auditorium-a buatsaih chu khuallian niin a hawng. Dilna pawm Aizawl District Screening Committee on Pradhan Mantri Awas Yojana (PMAY) - Housing for All (Urban) chu Ningani khan NLUP Implementing Board (NIB) conference hall-ah UDPA Minister Zodintluanga hoin an thukhawm a; Aizawl khawpuia khawsak harsa chhungkaw 4,515 te in sak tanpuina dilna an pawm.
Share now