Opium cheng nuai 1.25 man hu an man

Aizawl : Mizoram-a ruihlo man khat tak Opium chu Excise and Narcotics leh Assam Rifles tangkawp chuan an rinhlelh lai Sihtlangpui, Lawngtlai district-ah an dap a, Opium cheng nuai 1.25 man hu an man.

  Heng ruihhlo daptu Excise leh Assam Rifles te hian In pakhat an dapna atangin Opium gram 247.65 hi an man a, cheng 1,25,000/- man hu niin chhut a ni a, a neitu ni puh mi pahnih an man bawk. Excise and Narcotics Department, Lawngtlai chuan chhui zui atana leh hmalak zel a nih theih nan an la nghal a ni.

Cue sport chi 4-ah Lalrina India Top 10-ah a lang vek

Aizawl : Heyball bika No. 5 a hauh thar leh nen Lalrina Renthlei chu dawhkana ball hawlh infiamna (cue sport) chi hrang pali-ah India Top 10-ah a lang phak ta vek.

  Lalrina hi August 25, 2025-a khelh zawh tak, 1st NSCI Heyball National Championship 2025-ah nomawi la pha lo mah se ranking match-ah che tha zuiin India No. 5 a ni ta.

  Mizoram Snooker & Billiards Association (MSBA) player hi August 17-26 chhunga Delhi-a 1st National Sports Club of India (NSCI) Heyball National Championship 2025-ah quarterfinal a lut phak a, Quarterfinal hi Thawhtanni zan khan Sundeep Gulati, Delhi nen khelin 9-6-in a tlawm zawkah a tang a, a hneh loh hi a champion zui nghe nghe.

  Tuikhuahtlang, Aizawla cheng, Lalrina hi India rama cue sport chi li-ah Top 10 a kai ta vek a. Pool 9 Ball-ah No. 4, 10 Ball-ah No. 5 leh Snooker-ah No. 9 ni sain Heyball-ah No. 5 a ni phak leh ta a ni.

PHC a thawk turin Doctor in volunteer

Aizawl : Dr. MS Dawngzeli, Dental Surgeon w/o Dr. Lalramdintluanga, Bunghmun BDO chuan Doctor indaihlohna leh khua leh a chhevel in an mamawhna hriain engmah phut leh beisei nei lovin August 26, 2025 khan Bunghmun PHC ah duty turin a in volunteer.

  Doctor volunteer Bunghmun PHC in a nei tur hi Bunghmun khua leh a chhehvel Bunghmun PHC chhawr tute an lawm hle.

Reserve Area-ah puang

Aizawl : Lawngtlai bul lawka awm, Mampui Branch YLA te chuan, an khaw chhehvel Kilometres 4 huam chhung chu 'Reserve Area' atan an puang tih thuchhhuah August 26, 2025 khan khan an siam a, hemi huam chhunga awm ramsa, lui lama khawsa nungchate leh thing leh mau eng chi mah lak leh khawih phal a niloh thu an puang.

  Mâmpui Branch YLA te thuchhhuah a tarlan a nih danin, an khaw bul hnai ramngaw kilometres 4 huam chu khauh taka humhalh leh venhim hnathawh kal pui a nih thu an tarlang a. 'Reserved Area' huam chhungah hian khualkhua leh khaw chhung mi tu tan pawh ramvah, luikal leh chakraw lak khap a nih thu thuchhhuah an siamah hian an tarlang a. 

Bevela Centre of Excellence Zokhawsang-ah hawng

Aizawl : Assam Rifles ten Naga hel laka Purr post an hum champha pualinAugust 25, 2025 khan 'Purr Day' hman a ni a, he ni pual hian Assam Rifles chuan Zokhawsang-ah National Integrity & Educational Development Organisation (NEIDO) centre an hawng a, he Centre hming hi Mizopa hming chawiin 'Bevela Centre of Excellence' an ti.

  Major General Suresh Kumar Bhambhu, YSM, SM, IGAR (East) chuan NIEDO centre, BEVELA CENTRE OF EXCELLENCE hi a hawng a, hei hi 14th Assam Rifles atanga pension tawh Rifleman Bevela Lushai hming chawia phauh a ni. He hunah hian Rifleman (Late) Bevela Lushai fanu Vanlalnghaki Chhakchhuak leh an chhungte an tel a ni.

National Award dawng tur Dr. Zoramdinthara

Aizawl : Mizoram University-a zirtir hna thawk mek, Dr. Zoramdinthara chu National Award to Teacher for Higher Education 2025 dawng tura thlan a ni.

  Dr. Zoramdinthara hi MZU-ah hian Associate Professor niin Department of Mizo-a an head a ni bawk.

  Chawimawina a dawn tur hian silver medal, certificate leh pawisa fai Rs. 50,000 a keng tel dawn a. Zirtirtute Ni, September 5, 2025 hian India President Droupati Murmu-i'n Vigyan Bhawan, New Delhi-ah a hlan dawn a ni.

Mizoram Larsap-in Mamit District a tlawh

Aizawl : Mizoram Larsap General (Dr) Vijay Kumar Singh, PVSM, AVSM, YSM (Retd) chuan August 28 khan Mamit District a tlawh. He hunah hian Sawrkar department hotute, tlawmngai pawl aiawhte, Political party hruaitute leh Ex-Servicemen-te kawmin Aspirational District hnuaia hmalaknate a tlawh bawk.

   Larsap hi Mamit Tourist Lodge tualah Mamit DC K.Laltlawmlova, SP Manny Bhushan Singh leh official dangte'n lo hmuakin Guard of Honour pek a ni.

  Mamit District chhunga Sawrkar Department hotute DC Conference Hall-a a kawmnaah Larsap General (Dr) Vijay Kumar Singh chuan District hnufum leh chawikan ngai Mamit District-a hmalaknate fakawm a tih thu a sawi a. Hriselna lama inenkawlna ngaihpawimawh a tul thu sawiin, health facility hrang hrang awmsa, Health & Wellness Centre leh Hospital-te chu hriselna kawnga scheme pawimawh tak takte nena tha taka thlunzawma hmalak a tul thu a sawi.

Damdawi zuarte endik

Aizawl: Aizawl District Magistrate Er. Lalhriatpuia, IAS in naupang kumtling lo leh School Uniform ha ten damdawi ruih nana hman chi an lei tur ven nana damdawi dawr (heng damdawi kawl pha chin) te chu an damdawi leitute lang thei ngei tura CCTV vuah vek tur a nih thu Order a lo siam tawh bawhzuiin August 28, 2025 khan endik hna thawh a ni.

  John Lalramhluna Hnamte, Executive Magistrate hovin FDA(H&FW Department) atangin Drugs Inspector leh Police Department te tangkawp chuan Joint Inspection an nei. He inspection-ah hian Civil Hospital, Aizawl chhehvel-a Pharmacy 64 te endik an ni a, a tlangpuiin District Magistrate thuchhuak hi an zawm tha hle. Amaherawhchu, heng Pharmacy zinga 7 te hian CCTV hi an la vuah (installed) lova, heng mite chungah hian a tul anga hmalak chhunzawm a ni dawn a ni.

  Pharmacy endik zinga 31 te hian damdawi ruih nana hman theih chi te leh Antibiotic hralh fimkhur ngai bikte ziahna tur, Schedule H1 Register an vawng tha lo. Heng Damdawi dawr zingah hian Pharmacist thutchilh dawr 17 chauh an awm a, a dang zawng te hian Pharmacist enpui lohvin damdawi an enkawlin, an pe chhuak thin a ni tih hmuh a ni.

Home Minister-in Constable Training bul tanpui

Aizawl: August 26, 2025 khan Home Minister K Sapdanga chuan Thenzawl Police Training School ah tunhnaia Constable lak tharte training hawnna a hmanpui a. Supply Minister B Lalchhanzova chuan Home Minister hi a tawiawm a ni.

  Tun tum hi Mizoramah kum 10 chhunga a ruala police lak hnem ber tum a ni a, tun tum Constable Basic Training hi batch 70-na an ni a, an vaiin constable 277 an ni. Training tan hun (start date) September ni 1 atangin a ni a, training tan hma kar khat hi zero week ti a vuahin constable thar te luh hun leh an tlangnelna hun atan hman a ni. Indoor leh outdoor training kar 45 chhung ngawrh takin an kalpui anga, July 2026 ah zo thei tura beisei an ni. 

  Heng Constable lak thar te hi Aizawl District atangin 138, Lunglei District atangin 24, Serchhip District atangin 21, Champhai District atangin 23, Mamit District atangin 12, Kolasib District atangin 19, Hnahthial District atangin 6, Saitual District atangin 12, Siaha District atangin 4, Khawzawl District atangin 5, Lawngtlai District atangin 3 an ni a. An zingah hian hmeichhia 26 an tel a ni.

Chief Minister leh Assam Rifles IG inkawm

Aizawl : Chief Minister Lalduhoma chuan a office-ah Maj General Suresh Bhambu, IG, Assam Rifles (East) August 25, 2025 khan a kawm a. Zokhawsang AR ram chungchang leh thil pawimawh dangte a sawipui.

  Mizo Territorial Army lak tura an thlen chin te, Zokhawsang Assam Rifles ram chungchang te, ruihhlo dap beihpui an thlak mekna chanchin te, Bairabi - Sairang rel kawng leh a hawng tura Prime Minister lo kal tur chungchang te an sawidun a ni.

Chief Minister-in GAC Foundation Day hmanpui

Aizawl : Government Aizawl College chuan an college kum 50 tlin lawmna, Foundation Day chu August 25, 2025 khan an College Campus, Mualpuiah an hmanga, Chief Minister Lalduhawma chuan khuallian niin a hmanpui.

  Chief Minister chuan, Govt. Aizawl College thawktute, zirlaite, lo thawk tawh leh zir tawh zawng zawngte a lawmpui a. College kal zelna turah duhsakna a hlan.

  Lalbiakzuala, Principal chuan kalkhawmte lawmna sawiin College chanchin tlangpui a tarlang a. Chief Minister-in a telpui avangin lawmthu a sawi a ni.

  Foundation day-ah hian an college atanga zir chhuak leh College Faculty zinga MLA leh Minister lo ni tawh leh ni mek mi 26 leh Principal lo ni tawh mi 13 te chawimawina hlan an ni.

  Govt. Aizawl college hi kum 1975 ah khan mi tlawmngaiten an din a, kum 1989 ah sorkarin a la zui ta a. NEHU hnuaia college langsar tak a ni zui ta a ni. Tunah hian BA, BCom leh MA Education zirna awmin Mizoram sorkar college zinga zirlai ngah ber an ni a, zirlai 1944 an awm mek a ni.

All India Speakers' Conference-ah tel

Aizawl : August 24 - 25, 2025 chhunga neih All India Speakers' Conference, Delhi Legislative Assembly a neihah Mizoram Legislative Assembly aiawhin Lalbiakzama, Speaker leh Lalfamkima, Dy. Speaker te an tel.

  He conference-ah hian India ram a state tin Legislative Assembly Speaker leh Dy. Speaker te an kalkhawm a. Conference motto chu ‘Commemoration of Centenary of Veer Vithalbhai Patel’ tih a ni a. India mi Central Legislative Assembly President/Speaker atana thlan (elected) hmasa ber kum 100 tlin lawmna hun hman a ni. Hemi hun ah hian VITHALBHAI PATEL Postage Stamp tlangzarh nghal a ni.

  Union Home Minister Amit Shah te, Union Minister of State for Parliamentary Affairs Kiren Rijiju te, Delhi Chief Minister Rekha Gupta leh India sawrkar hruaitu mi pawimawh engemaw zat an tel a ni.