AMC Corporator tur leh hruaitu tur te lalut

Aizawl : Aizawl Municipal Corporation thar chu May 7, 2026 khan BoC Meeting Hall-ah lakluh a ni a. Ward indawt danin Corporator thlan thar 19 te chu thutiam lain lakluh an ni a. Lakluh inkhawm hi Er. Lalhriatpuia, Aizawl DC chuan a kaihhruai a ni.

  Lalremtluanga W-VI chu Aizawl Municipal Corporation Mayor thar atan rawtna siamin an ruat nghal a. Deputy Mayor atan R. Lalawmpuii, W XVI chu an zingah rawtna hmang bawkin an ruat nghal bawk a ni. DC chuan rinna thutiam hmangin Mayor leh Deputy Mayor tharte chu a lalut a.

  Executive Corporator atan Christina Roluahpuii Sailo W-VIII, Vanlalhruaia W-XIII, Vanlalfaka W-III, K. Lalrodinga W-VIII te rinna thutiam hmanga lakluh leh an ni bawk.

Cigarette cheng nuai 200 man tichhia

Aizawl: May 7, 2026 khan July 2025 leh January 2026 chhunga Champhai-a ram dang atanga dan lova cigarette lakluh an man, cheng nuai 200 man hu a chhut chu Controller of Legal Metrology thupek leh District Magistrate hriatpuinain Legal Metrology Office tual, Champhai Vengsang-ah tihchhiat a ni.

  Legal Metrology, Champhai report atanga a lan danin, cigarette man te hi packet nuai thum sangkua zasarih sawmpahnih (3,09,712) brand hrang hrang, tualchhung rate-a chhuta cheng nuai 200 man hu a ni a, heng contraband cigarettes te hian Legal Metrology Act, 2009 an zawm loh avangin Rule 19 hnuaia sub rule (4) & (6) Legal Metrology (Enforcement) Rule, 2010 hmangin Controller of Legal Metrology in Disposal order a chhuah hmanga tihchhiat a nih thu a sawi.

Jail tang chhuahtu leh a Bank account a hmansak Police kutah

Aizawl : Court lehkha lem hmanga Lunglei District Jail atanga mi 16 chhuah tirtu a puh Jeremy Lalthangtura chu Lunglei Police ten Darkar 72 an kawl hnuah May 4 khan Court-ah a inlan a, Court chuan Darkar 72 dang kawl phalna a pe leh a, Court chuan Jeremy-a'n Bank Account a hman hawh sak, Laltlanhlua pawh Darkar 72 chhung Police in an kawl a rem ti bawk.

  Court lehkha lem ni ngeia hriat hman a nih avang hian tunhnai-ah Lunglei District Jail-a tanglai mi 16 te chu Jail thuneitu ten an chhuah tir a, hemi chungchanga District & Session Judge, Lunglei chuan April ni 27-a Lunglei Police Stationa FIR a thehluh chu bawhzuiin mawhphurtu a ngaih, Dist Jail Lunglei-a tanglai, Jeremy Lalthangtura chu thu zawh fiah turin an la a, Court in Darkar 72 chhung Police in an kawl a rem tih na chu May Ni 4 hian a zawh avangin Jeremy Lalthangtura chu court-ah a in lan leh a ni.

  Court chuan Darkar 72 dang kawlphalna a ti chhuak leh bakah Jeremy-an Bank Account a hman hawh sak, Jail tang Motor Driver Laltlanhlua pawh Police-in Darkar 72 an kawl a phal sak bawk a ni.

Ropuiliani Tribal Freedom Fighters Museum tlawh

Aizawl: Mizoram Larsap, General (Dr) Vijay Kumar Singh chuan May 7, 2026 khan Ministry of Tribal Affairs hnuaia sak Tribal Reserch Institute (TRI) leh Ropuiliani Tribal Freedom Fighters Museum (RTFFM), Kelsih-a hnathawh mekte chu tlawhin hmalak dan a enfiah.

  Larsap chuan hnam ziarang, nunphung leh tihdante ngaihhluta vawnhim a pawimawh takzet thu sawiin, Tribal Reserch Institute leh Ropuiliani Tribal Freedom Fighters Museum-te chu tangkai taka hman tura siam a tul thu a sawi a. 

  Tribal hnam ziarang leh Mizo chanchinte awmze nei taka pholan a nih theih nan hun bituk siama hawnfel hma ngeia a nih dan tur dik tak a nih thei nana theihtawp chhuah turin a chah bawk a. A ngaimawh leh tul nia a hriatte hrilhin, hun remchang hmasa berah hmalak dante enfiah leh a tum thu a sawi a ni.

Lammuala Gas Insulated Power Sub-Station dahna tur a enfiah

Aizawl : Power and Electricity Minister F. Rodingliana leh Lammual Advisory Committee hotuten May 7, 2026 zing khan Lammual-a 33KV Gas insulated Power Sub-Station dahna tur hmun leh Lammual chhunga hmun pawimawh hrang hrang sak turte power mamawh dan tur leh hrui kal tir dan tur an enfiah.

  Lammualah hian 33KV Gas Insulated Power Sub-Station cheng Vaibelchhe 22.36 senga dah tur hi Mizoram sawrkar-in sum a pe chhuak tawh a; Lammual chhunga dah tur hmun pawimawh tak tak, heng - Vanapa Hall, Amphitheater, PHED Reservoir (Litre nuai 12 dawng) bakah Aizawl Square-te power mamawh pekchhawnna tur cheng Vaibelchhe 9.2 senga siam tura ruahman a ni bawk.

Mizoram Police “Year of Discipline” hawnna nei

Aizawl: Mizoram Police chuan kum 2026–2027 “Year of Discipline” atana a puan hawnna inkhawm chu May 6, 2026 chawhma khan G.S. Arya Mess, Police Headquarters, Khatla, Aizawl-ah Home Minister K Sapdanga’n a hmanpui.

  'Year of Discipline' lungphum leh thlur bik turte (Core Principles and Specific Areas of Focus) chu:

- Hun vawn dik, mahni hnaa rinawm, leh thahnemngai taka mawhphurhna hlen chhuah

- Hnathawh dan kalphung inkaihhruaina vawn dik, document vawn dik, dan zawm that, leh thubuai chhui (investigation) a hun taka tihfel

- Hna chungchanga nungchang mawi vawn, mipui nena indawrnaah inthliar hranna awm lova rualkhai taka chet, mi harsa leh chak lo zawkte hriatthiamna neih

- “Train to Excel” programme hnuaia taksa hriselna leh engtik lai pawha che chhuak thei tura inbuatsaih

- Turnout fel tak nena parade, drill leh endikna (inspection) neih thin

- Police hmunhma hrang hrang (establishment) te fai taka vawn leh enkawl

- Sorkar bungruate uluk taka enkawl leh chumi chungchanga mawhphurhna lak

- Rinawm, dik leh lang tlang taka hna thawh, leh

- Hotuten an hnuaia mite hnathawh vil that te an ni.

Government Online Excellence Awards, 2025” sem

Aizawl : Information, Communication & Technology (ICT) Department buatsaihin May 6 khan Taxation Auditorium, MINECO-ah Mizoram sawrkar hnuaia Department hrang hrang leh zirna in te tana buatsaih “Government Online Excellence Awards, 2025” sem a ni a. ICT Minister Dr. Vanlalthlana chu khuallian niin Award te hi a sem a ni.

  Government Online Excellence Awards dawngtu tur thlangtu Selection Committee leh Technical Evaluation Committee te siam niin, hengah hian ICT technical expert mai bakah MZU, NIC leh NIELIT te atangin expert an tel a. Official Departmental Website ah website 160 endik niin, Educational Institution Website atan hian website 50 endik an ni.

  Endik zing atang hian Top 10 te hnenah lawmman hi hlan an ni a, pakhatna atanga pathumna te hi Citation leh Momento pek theuh an ni a, palina atanga sawmna te hian Citation an dawng theuh bawk a ni.

Jal Jeevan Mission 2.0 kalpuina tura inremna ziak 

Aizawl : Mizoram sawrkar leh Ministry of Jal Shakti, Department of Drinking Water & Sanitation chuan Jal Jeevan Mission 2.0 kalpuina tura inremna (Memorandum of Settlement) chu May 6, 2026 khan Delhi-ah an ziak a. Delhi atangin CR Paatil, Union Minister of Jal Shakti chuan online-in a telpui a. Chief Minister Lalduhoma leh Prof. Lalnilawma te bakah PHE Officials ten Aizawl atangin online-in an zawm bawk.

  New Delhi-ah hian Zodingpuii, IAS, Secretary to the Government of Mizoram chuan Mizoram sorkar aiawhin MoU hi a ziak a. Department of Drinking Water & Sanitation, Government of India aiawhin Swati Meena Naik, Joint Secretary chuan hming a ziak a ni.

AIR kum 90 tlin lawmna IPRP&S Minister-in hmanpui

Aizawl : All India Radio (AIR) kum 90 tlin lawmna kal zelah May 5, 2026 khan All India Radio Aizawl chuan Central YMA Hall, Tuikhuahtlang-ah Musical Concert an buatsaih a. IPRP&S Minister B. Lalchhanzova’n khuallian niin hun a hmanpui a ni.

  All India Radio hi June 8, 1936-ah din niin, New Delhi-ah Headquarters a awm a, AIR Aizawl hi India ram puma AIR Station 230 zinga pakhat a ni a. AIR kum 90 tlin pual hun hmanna ah hian All India Radio Top Grade Artist Vanhlupuii leh ‘A’ Grade Artist pali - Laltlanthangi Pachuau, Siampuii Sailo, C. Vansanga leh Rualthankhuma Chhakchhuak te chawimawina hun hman a ni a, zai leh lam nen hun hlimawm tak hman a ni.

  All India Radio kum 90 tlin lawmna pual hian All India Radio Aizawl pawhin kum 60 a tling a, hemi pual hian programme hrang hrang buatsaih chhoh mek a ni.

Chief Minister zin haw

Aizawl: Zan hnih riaka New Delhi-a zin Chief Minister Lalduhoma chu May 5, 2026 khan Aizawl a lo thleng a. Chief Minister's Office-a Officer ten Vanlaldina Fanai, Commissioner & Secretary to CM hovin a Bangla-ah an lo hmuak.

  Chief Minister hian Kiren Rijiju, Minister of Parliamentary Affairs leh Minister of Minority Affairs a kawm a, PMJVK hnuaia Mizoram sawrkar projects ngaihpawimawh 23 te a thehlut a. Union Minister hian a vaiin a lo pawm a ni.

  Dr. VK Paul, NITI Aaayog Member kal chhuak tur pawh a kawm a. Ginger Capital of India a Mizoram an puan avanga Mizoram sawhthingin ram pum huap hriat a hlawh chhoh mek thu a hrilh. Mizoram sorkar leh NITI Aayog tang dunin Tourism Conclave an buatsaih tur leh Mizoram tana thil pawimawh dangte a sawipui a.

  May 4, 2026 zan khan Nitin Gadkari, Union Minister of Road Transport & Highways pawh kawmin Mizorama National Highways leh Lei (Bridges) pawimawhte tihhmasawnna tur chi hrang hrang a sawipui a. A thil thlen zawng zawng hi MoRTH hian a lo pawmsak deuh vek a. An thil sawi dun tlangpui chu Press Release hran tihchhuah a ni.

Faina Puitu mobile app tlangzarh

Aizawl : PHED Minister Prof. Lalnilawma chuan May 4, 2026 khan E-in-C Meeting Hall, PHED Office-ah Faina Puitu mobile application a tlangzarh. 

  He application hmang hian mahni sanitation point a bawlhhlawh paih motor thlen chin hriat theihna te, bawlhhlawh paih tur bik hriat theihna te, lungawi lohna thlenna te, mahni in atanga bawlhhlawh paih theihna te (Door to Door Pickup) a awm a. Bawlhhlawh re-cycle theih hralhna (Garbage Store) te, bawlhhlawh paih kawnga dan leh dun (Rules and Regulations) chhiar theihna te leh mipui tana hriattur pawimawh en theihna te pawh he application ah hian a awm

  Faina Puitu hi Android leh Mac ah download theih niin, kumin chhung (2026) atan man chawi loa hman theih niin, nakum (2027) atangin thla tin cheng 10 chawi a ngai tawh dawn a ni. Tunah hian Aibawk RD Blockah hman a nih tawh a, Aizawl Municipality huam chhungah erawh hman a la ni lo.

Commissioner leh Secretary te training DP&AR minister-in hawng

Aizawl : Secretariat Adminstration Wing (SAW) Conference Hall-ah Mizoram Sawrkar hotulu Commissioner leh Secretary te thiamna tihpunna tur Capacity Enhancement Training programme chu May 4, 2026 khan neih niin, DP&AR Minister K.Sapdanga’n a hawng.

  He training hawnna programme hi Chief Secretary Khilli Ram Meena chuan a kaihruai a. Tunlai khawvel changkang zelah sawrkar inrelbawlnaa Artificial Intelligence hman tel theihna hrang hrang a awm thu leh, a tangkaina erawh a hmangtute thiamna ah thui tak a innghah thu a sawi a ni. 

  Training-ah hian thupui pahnih - Artifial Intelligence for Public Governance leh Problem Solving and Decision Making tih thupui hmangin ICT Informatics Officer Lalengzuala leh ATI Core Faculty Golda Dell Zohmangaihi te chuan kalkhawmte an zirtir a ni.

Union Textiles Minister Giriraj Singh-a'n Mizoram rawn tlawh

Aizawl : Union Textiles Minister Giriraj Singh chuan May 3, 2026 khan Aizawl lo thlengin Lengpui Airport ah Mizoram Chief Minister Lalduhoma leh Sericulture Minister Lalthansanga ten an lo hmuak.

  Ni hnih chama lo zin Union Textiles Minister hi Lengpui Airport Lounge ah Mizoram Chief Minister Lalduhoma chuan kawmin, textiles lama Mizoram hmasawnna tur thil pawimawh te a sawipui a. Hemi hnu hian Lok Bhavan pan nghalin Lok Bhavan Mini Conference Hall-ah Sericulture Minister Lalthansanga telpuina hnuaiah Sericulture Department, Cooperation Department, Agriculture & Farmers Welfare Department, Eastern Zone Weavers’ Service Centre leh Development Commissioner for Handlooms office a thuneitute nen meeting an nei a ni.

  Union Minister hian hemi ni vek hian Tlangnuama Zozia Silk & Handloom leh Kulikawn Venga Lapar te a hmunah a tlawh nghal a. Zozia hi silk hmanga puantahtu lar niin Union Textiles Ministry hnuaia Development Commissioner for Handloom chuan National Merit Certificate te pawh an lo hlan tawh a ni.