Aizawl Sahuan atangin Sava a bo

Aizawl: Dan lova tawlhruk sava (exotic bird) Mizoram-a man, Aizawl Sahuan-a nikum February thlaa dah 'pesquet’s parrot' an tih chu rukbo a ni tih October 29 zing khan hriat chhuah a ni a. October ni 28, 2025 tlai dar 4 leh October ni 29, 2025 zing dar 7 inkar vela bo nia hriat a ni. 

  Dy. Conservator of Forests, Aizawl Wildlife Division chuan he thil thleng chungchangah hian Sairang Police Station-ah FIR thehluh a nih tawh a ti a, Wildlife Crime Control Bureau (WCCB), Kolkata pawh hriattir nghal an nih thu an sawi. 

  He thil thlengah hian thawktute inhnamhnawih awm palh theih a nih avangin department chhungah pawh an inchhui zui mek niin department hotute chuan an sawi a. Pawikhawihtu man chhuah an nih theihna tura pui theitu hnenah dan-in a phal angin lawmman Rs. Sing 2 pek an nih tur thu an sawi bawk.

PUC-ah Japan tawng zirna hawng turin inremna ziak

Aizawl : October 28, 2025 khan Class 12 chin pass tan nakum atangin Pachhunga University College (PUC)-ah Japanese Language Study Centre din turin PUC leh JACEEX LL Ltd. Guwahati-in thawhdunna thuthlung, Memorandun of Understanding (MoU) an ziak.

  Japanese Language Study Centre din tura thawh dunna thuthlung hi PUC Principal Conference Room-ah an ziak a. Inremna-ah hian PUC aiawhin Principal Prof. H. Lalthanzara'n hming a ziak a, JACEEX LL Ltd. Guwauhati leh Jaceex - Youth4Japan aiawhin Jaceex Ventures Director Founder Rajeev Gupta'n hming a ziak a ni. 

  January 2026 atangin class hi tan tura ruahman a ni a, Principal Prof. H. Lalthanzara chuan tuna mi bakah hian Korean Language Study Centre din turin December hian MGH, Korea te nen MoA ziah hman an tum thu ZALEN a hrilh bawk.

MNF-in FCAA 2023 duh lohna Bandh huaihawt

Aizawl: Mizo National Front chuan Mizoram sawrkarin FCAA 2023-a adopt an duh lo entir nan October 29, 2025 khan Bandh an huaihawt a, hemi ni chawhnu dar 1:00 khan an titawp.

  Band hi Mamit district tih lovah Mizoram district zawng zawngah huaihawt a ni a, he bandh hian thlawp pawh a hlawh a, hemi avang hian MNF General Headquarters chuan chawhnu dar 1:30 khan an ti tawp a, mipui ten an thlawp naah lawmthu an sawi.

  MNF Treasurer Lalruatkima chuan Mizoram sawrkarin FCAA 2023 a adopt hi a hnuhkir hma chuan an dodal zel dawn tih a sawi a, he thil hian Article 371G -a ram neitu nihna bik nihna Mizo ten an neih chu a chhuhsak theih avangin tha an tih loh thu a sawi.

Central YMA hruaitu thar ten mawhphurna la

Aizawl : 28.10.2025 tlai khan Central YMA Office-ah Central YMA hruaitu kal chhuak tur leh thlan thar ten charge inhlanna hun hman a ni.

  He hunah hian Kum 2023-2025 chhunga Central YMA hruaitu ten 2025-2027 chhunga hruaitu tur te kutah mawhphurhna an hlan.

Kum 2025-2027 atana hruaitute : 

R Lalngheta – President

Prof. Lalnuntluanga – Vice President

Prof. Malsawmliana – Gen.Secretary

S.F. David Ngursangzuala – Asst. Secretary

Er. H. Duhkima – Treasurer

M.S. Ralte – Finance Secretary

Chief Minister-in NEC Official te meeting neihpui

Aizawl: Chief Minister Lalduhoma chuan NEC Office, Shillong-ah NEC Secretariat-a Sector hrang hranga thuneitute October 30, 2025 khan meeting a neihpui a. NEC kaltlanga Mizoram sawrkar hmalaknate leh NEC in harsatna a neihte a sawipui.

  NEC-ah hian North East States leh Sikkim State Chief Minister-te hi Council Member an ni a. Hetiang a Council member in anmahni hmun ngeia meeting a neih pui hi a vawikhatna a nih avangin NEC Member-te leh official-ten lawmthu an lo hrilh a ni.

Sawhthing, Hmarcha leh Aieng sawngbawlna hawng

Aizawl: Chhingchhip MIFCO Complex-a Ropuiliani Women Farmer Producer Company Ltd. ten Primary Processing Plant an bun thar chu October 30, 2025 khan Rural Development & Administration changtu Minister Prof. Lalnilawma’n a hawng.

  Ropuiliani Women Farmer Company Ltd hi kum 2020 khan din a ni a. COVID hripui leng vangin harsatna an tawh hnuah 2023 atang khan chak zawkin hma an la chho a. District 7 ah Rural Development Block 16, khua 154 tuam chhuakin member 5335 an nei mek a ni.

  He khawl hian thlai thar tihfai leh tihro hna bakah hralh chhuah tura her sawm leh chan sawm hna a thawk dawn a. Elevator Conveyor (thlai phur chho tu), Drum Washer (lei tifaitu), Bubble Washer Conveyor (silfaitu), Air Dryer Conveyor (a chhem rona), Slicer Machine (a chansawmna), Heat Pump Dryer (tirotu) te a keng tel a ni.

Lalnu Ropuiliani lungphun hawng

Aizawl : October 30, 2025 khan Denlung khuaah Minister of State B. Lalchhanzova chuan Lal Vandula leh Lalnu Ropuiliani lungphun a hawng a, tlawm ve lo Ropuiliani anga hnam dang laka tlawm ve lo tur chuan thangtharte chu thiamna lamah intuai hriam a tul a ti.

  Thlan hungna hi a a vang feet 12 niin a dung feet 15 a ni a. Lungdawh Lungphun hi Lalnu Ropuiliani leh Lal Vandula tana phun a ni a.

Lalnu Ropuiliani lungphun :-

A san zawng - 5'4"; A hlai zawng : 2'9"

Lal Vandula lungphun :-

A san zawng - 5'3"; A hlai zawng : 3"

  Lal Vandula Lungdawh leh Lalnu Ropuiliani thlan hi Denlung Branch YMA leh Denlung khawtlang mipuite sak niin Mizo mistiri vek hman ni a tarlan a ni a. A sakna hi Lalthuama Sailo (Ropuiliani tuchhuan Thumna, Hrangphunga thlah, Aithur lal Vanhnuaithanga Sailo fapa) thawh niin cheng nuai 5 vel sen a ni.

Mizoram sawrkar leh Mizoram Synod ten MUHCS-ah thawhhona thuthlung ziak

Aizawl: Mizoram Sawrkar chuan November ni 1, 2025 atanga Synod Hospital, Durtlang leh John Williams Hospital, Lunglei-a Mizoram Universal Health Care Scheme (MUHCS) hman a nih theih nan Mizoram Presbyterian Church Synod chu October 28, 2025 khan thawhhona thuthlung ‘Memorandum of Agreement (MoA)’ a ziahpui.

  Inremna hi Health & Family Welfare Department Minister Lalrinpuii kaihhruaiin a Office Chamber-ah neih a ni a, Memorandum of Agreement (MoA) ah hian Health & Family Welfare Department aiawhin Dr. Lalhriatzuali Ralte, CEO, Mizoram State Healthcare Society leh Mizoram Presbyterian Church Synod aiawhin Rev. R.C. Lalnghakliana, Moderator-te'n an hming an ziak a ni.

SARAS Fair leh leh SHG Mela 2025 hawng

Aizawl: Mizoram Rural Livelihood Mission leh Urban Development & Poverty Alleviation Department tangkawp buatsaih, ni 5 awh 11th Sale of Articles of Rural Artisans Society Fair (SARAS Fair) leh Self Help Groug (SHG) Mela 2025 chu October 28, 2025 khan Lammual-ah UD&PA Minister K. Sapdanga chuan khuallian niin a hawng. 

  Rural Development & Administration Department Minister Prof. Lalnilawma chu khualzahawm niin ‘SELHEL Brand’, ‘Chhimphei Online Marketing Portal’ leh ‘Broiler Ar Vulh Dan’ lehkhabu a tlangzarh bawk.

  Mizoram district 11-a RD block 28 chhunga khaw 721-ah SHG 11,257 din a nih tawh a, member 81,030 an awm mek tih report a ni a, Kum hmasa lama SARAS Fair buatsaih ah khan SHG member-ten cheng nuai 50 chuang man hu bungrua an hralh a ni.

  UD&PA Department tarlan danin NULM hnuaiah SHG 1,532 an awm mek a. Sanjha Utsav (SHG Mela) an buatsaih hnuhnun ber khan cheng nuai 14 man hu vel bungrua hralh a ni tawh a. Khawpui chhunga cheng thalaite thiamna tipung tura hmalakna kalpui dan te leh kawngsira sumdawngte tanpuina ‘PM SVAnidhi’ kalpui a nih dan report a ni bawk a ni.

  MzSRLM leh MzSULM hnuai a SHG te ten SARAS Fair & SHG Mela, buatsaih leh a ni a, he hunah hian Stall – 102 bakah Food Stall- 8 buatsaih a ni a. Heng zingah hian MzSRLM hnuaia Block 28 chhunga khaw 71 atangin SHG member 98 ten Stall-52 leh Food Stall-2 an nei thei a ni.

Drugs laka inven dan tur zirho

Aizawl: One-day capacity building programme on Drug Abuse prevention chu District Institute of Education and Training (DIET) Aizawl district bik a zirlaite hnenah Mizoram Social Defence & Rehabilitation Board (SLCA), Directorate of Social Welfare chuan October 28, 2025 khan a buatsaih.

  He hunah hian ruihhlo chungchang te leh a kaihhnawih hrang hrangte zirho a ni. DIET a training lai te hi hmun hrang hrang atanga zirtir hna lo thawk mek te leh zirtirtu nih tum mek te an nih avangin naupangte hnena ruihhlo leh a hngawng thalo te an zirtir chhawn leh theihna tura thuam chak an ni. Zirtirtute hi nakin lawka kan ram hruaitu turte chhertu an nih avang hian an mawhphurna pawh hi a sang hle a ni.

  He programme hi Ministry of Social Justice & Empowerment, Government of India hnuaia hmalakna a ni a. DIET zirlaite mi 58 te training ah hian an tel a ni.

Hnam Tobul Zawn Chhuah thukhawm

Aizawl: Art & Culture Department kaltlanga din Committee on "Hnam Tobul Zawn Chhuah" te chu an Chairman Lalduhoma, Chief Minister hovin October 28, 2025 khan a tum khatna atan an thukhawm. A taka hnathawktu tur mithiam dap khawm hna thawk turin Art & Culture Department chu hma lo la turin an ti.

  Art & Culture-in report an pek hnuah member te hian a bul tan dan tur an rel a. History chhui dan peng hrang hrang hmanga hmalak a nih theih nan a taka hnathawktu tur mithiam fawmkhawm phawt ni se an ti a. Minister C. Lalsawivunga kaihhruaina hnuaiah Art & Culture Department chuan an tam lam bituk nei lovin hnathawk thei tur mithiam lo zawng khawm hmasa se, an inpeih hunah thutkhawm leh ni se, an ti.

Engineering Department te meeting neihpui

Aizawl: Chief Minister Lalduhoma chuan Engineering Department - PWD, PHE, P&E RD leh IWRD hotute chu October 27, 2025 khan CM Conference Hall-ah meeting a neihpui a. Hnathawh tur hmachhawp an neih zinga an ngaihpawimawh hmasakte (priority list) a sawipui.

  Chief Minister hian an ngaihpawimawh hmasak project te chu a thawhna sum ngaihtuahpui hmasak an nih tur thu a hrilh a. Chutihrualin project thawhna man tur leh fund awm thei zat azirin thawh hmasak tur a danglam thei tih a tarlang a ni.

IPRP&S Minister-in Department hnuaia thawktute kawm

Aizawl: IPRP&S Department changtu Minister B. Lalchhanzova chuan October 27, 2025 khan I&PR Conference Hall, Lianchhiari Rûn-ah, Department hnuaia thawktute kawmin, Department dinhmun, hmalakna leh hmachhawpte a sawipui.

  IPRP&S Minister B. Lalchhanzova chuan thu sawiin, IPRP&S Department chu mipui nena inngheng reng leh sawrkar hlimthla tilangtu pawimawh tak a nih thu sawiin, hmasawn zel nana pawimawhte thawktute nena inpawhtlang taka sawihona buatsaih chuan rah tha a chhuah ngei a beisei thu a sawi a. Department-a thawktute chu ram leh hnam hmangaihna leh mipuite tana rawngbawlna rilru pua mahni zawnah theuh theihtawp chhuaha thawk tura chahin, Mizoram chuan anmahni lo chu midang a nei chuang lo tih inhre reng turin a fuih.