Thlam-a a riahpui a nghawng tan sak

Aizawl : November 7, 2025 zan dar 10-11 inkar vel khan Dilzau, Kolasib District-a mi huan thlama riak Lalhlimpuia (55), Pandaw, Myanmar chuan a riahpuipa Myanmar lam mi bawk Tinchiauva (58) chu a lu a tan sak. 

  Heng mi pahnih hi Aizawl lam mi huanah inhlawhin an riak dun a, thil thlen zan hian an thu inhmu thiamlo chu inhnialin Lalhlimpuia hian Tinchiauva inring lo lai chu a chempuiin a sat ta thut a ni. 

  Ruang hi November 6 khan post mortem a ni a, Keitum lama awm an chhungten ruang hi an hlawm a. Pawikhawihtu hi police ten manin thubuai an siamsak a ni.

Ngaizel-ah Saza pathum hmu, humhalh tlat turin mipui ngen

Aizawl: November 6, 2025 khan Kulikawn Ngaizel ngaw-ah Mizoram State animal Saza pathum hmuh a ni a. Heng Saza te hi Solomon’s High School naupangten a thla an la fuh a. Association For Environment Preservation (ASEP) chuan lawmthu an sawi.

  ASEP chuan hetianga Aizawl khaw chhungah ngei State animal hmuh tur an awm hi ASEP General Headquarters, Aizawl chuan lawmawm a ti a, humhalh tlattu ni turin mipuite a sawm.

  Heng Sazate hi Kulikawn Local Council leh YMA te pawhin theihtawpin an humhalh a ni tih ASEP chuan an hriat thu an sawi a, an chungah lawmthu an sawi.

Heroin case lian pahnih a meizang hlaptu nia hriat man an ni

Aizawl : Zokhawthar PS Case No. 53/2025 Dated 10.07.2025 u/s 21(c)/29 ND&PS Act r/w 14A(b) Foreigner Act-a a meizang hlaptu ber Lalchhuanthangi (50) d/o Hmingthanzauva (L), Khatla South, Aizawl chu Zokhawthar PS team te chuan Special Bureau leh Delhi Police te tanpuinain Delhi-ah Dt. 4.11.2025 khan an man.

  He case hi Dt. 10.7.2025-a brick anga siam Heroin No-4 fir, Kg. 7.422, Kudamsen Kai, Zokhawthar a manna leh a tira mi panga lai man an nih tawhna case kal zel a ni. Lalchhuanthangi hi India leh Myanmar inkara ruihhlo tawlh ruknaa a meizang hlaptu ni ngeia hriat a ni a. Amah hi Thailand-ah pawh ruihhlo thubuai vanga kum riat lai (2014-2022) lungin tang tawh nia hriat niin, kum 2023-a Kerala state-a pawisa thila inbumna (money scam case) thubuai nei lai, man a nih lai pawh hian he pawisa thubuai ah hian bail-a a chhuah lai nia hriat a ni. Dwarka Court in phalna a pek angin amah hi Mizoram rawn panpui mek a ni.

  Mizoram Police-in tum khata Heroin a man tam berna, Saitual PS Case No. 63/2025, dt 23.08.2025, u/s 21(c)/29/25 of the ND&PS Act r/w Sec 14 of the Foreigners Act thubuaia meizang hlaptu Joseph Lianthangpuia (42) s/o Lianchhuma (L), Chanakya Place, New Delhi chu Delhi-ah vek hian Dt. 5.11.2025-ah khan man a ni bawk.

  He case-ah hian lirthei pakhat B/R No. MZ-01X-1909, Lalliancheua (20) s/o Challianzula, Falam, Myanmar khalh atangin Heroin Kg 15 man a ni. Joseph Lianthangpuia pawh hi Champhai Police team ten Mizoram an rawn panpui mek a ni.

Manipur hnehin Mizo tleirawlte an champion

Aizawl: Mizo tleirawlten a hmaa an lo hneh loh tawh, Manipur lakah run 72-a hnehna changin November 4, 2025 khan Women’s U-19 T20 Trophy 2025-26 Plate champion nomawi an la ta a, season thara inelna sang zawka an inlan thei dawn.

  Lucknow, Uttar Pradesh-a Bharat Ratna Shri Atal Bihari Vajpayee Ekana Cricket Stadium-ah final-ah hian Mizoram tan Vanlalruatpuii chuan half century siamin Branda Rosepawngia-i’n mi pathum a vawm hlum bawk.

  Branda-in wicket thum a lak bakah vice captain Sandhia-i leh Zothanmawii Rokhum ten pahnih ve ve an vawm hlum bawk a. Over 14.4-ah run 45 chauh siamin an thi zo vek a ni.

  Mizo tleirawlte hian Manipur hi group stage inkhelah wicket ngain an hneh lo a, final-ah erawh phuba lain season tharah India rama association thiam rualte inelna, Elite-ah an khel thei dawn ta a ni. Tun hi Board of Control for Cricket in India (BCCI)-in inelna a buatsaiha Mizoramin champion nomawi a lak hmasak ber a ni.

Scooter leh Car insu-ah kum 17 mi a thi

Aizawl: November 2, 2025 zan dar 6 vel khan Chhingchhip dai MIFCO Complex bula Car leh Scooter insu-ah Scooter khalhtu Ricky Zochhuanmawia (17), Pangzawl Ramrikawn veng a thi.

  Scooter hi Pangzawl atanga Aizawl lam pana tlan a ni a, tlai thim hlim dar 6 vel khan Car nen hian an insu-a, Car a chuangte hian buaipuiin Chhingchhip damdawi in an panpui a. Aizawl lama hruai tum a nih laiin, a hliam tuar lovin a boral zui a ni.

UCO Bank atangin rikrum thila hman tur lirthei AMC-in dawng

Aizawl: Aizawl Municipal Corporation chuan UCO Bank Corporate Social Responsibility (CSR) atangin November 5, 2025 khan chhiatna thlen thulha hman tur Emergency Response Vehicle a dawng. UCO Bank hian ERV atan hian Mahindra Bolero Camper leh a body siam danglamna tur sum leh hmanrua (equipment) cheng nuai 15 man hu AMC a hlan a ni.

  Emergency Response Vehicle inhlanna hun hi Mayor Office Chamber-ah neih a ni a. AMC aiawhin Aizawl Mayor Lalrinenga Sailo-in thilpek hi a dawng a, Deputy Mayor R. Thanglura, Executive Corporator Lalringliana, Lalremruata Kullai, Joint Municipal Commissioner leh officer dang ten an tawiawm a. UCO Bank aiawhin Alok, DGM, Head Office, Kolkata, Sanjeev Roy, AGM, Zonal Head, Agartala Zone; Gautam Das, Chief Manager, Aizawl Branch leh Chin Zapau Ngaihte, Manager, Thuampui Branch ten thilpek hi an hlan a ni. 

RD&AD hnuaia Scheme te hmalakna thlirlet

Aizawl: November 6, 2025 khan Rural Development & Administration Department (RD&AD) Minister Prof. Lalnilawma,  chuan RD&AD hnuaia scheme hrang hrang hmalaknate thlirletna chu Aijal Club-ah khuallian niin a hmanpui.

  Thutkhawmah hian RD&AD Secretariat, RD Directorate, SIRD&PR, MzSRLM, LA Directorate leh Social Audit atangtein presentation thlirho a ni a. Hna thawh tawhte endik niin, tha zawka hmalak dan tur leh thawhho zel dan turte sawiho a ni.

  Tun dinhmunah hian MGNREGA hnuaiah Job Card 2,12,043 pek chhuah tawh niin Active Job Card 2,10,574 (99.30%) a awm a. Workers 2,37,079 awmin Active Workers 2,10,900 (88.95%) an awm a. Active Job Card leh Active Workers awm zatah Mizoram chu a ti tha pawl a ni a. FY 2025-26 atan tun thleng hian person days 51.59% zawh tawh a ni a. Ni 8 chhunga hlawh pek chhuah zat 92.42% niin, hetah pawh hian Mizoram chu a ti tha pawl a ni.

Hmeichhiate chunga hleilenna thleng thin tihbo kawnga hmalakna tur hawng

Aizawl: Social Welfare, Women and Child Development Department Minister Lalrinpuii chuan November 6, 2025 khan a Office Chamber, MINECO, Khatlaah hmeichhiate chunga hleilenna thleng thin tihbo kawnga hmalakna tur, Gender Based Violence (GBV) Solve Project a hawng. 

  He project hi Aparajita leh J-PAL South Asia tangkawp hmalakna niin, Mizoramah chuan Mission Foundation Movement (MFM)-in a kalpui dawn a ni.

  GBV Solve Project atan hian proposal 470 chuang lutin, tehna hrang hrang hmanga an thlitfim hnuah India rama organization 6 he project khawih tur hian an thlang chhuak a. He’ng zingah hian Mission Foundation Movement (MFM) chu a tel a. MFM hian Aizawl district-a hmeichhiate chunga hleilenna thleng thin tihbo nan mahni invenna, mipui hrilhhriatna leh a tuartute enkawl kawngah WCD nen tangkawpin hma a la dawn a ni.

Supply Minister hovin gas pipeline chungchang sawiho

Aizawl: Food, Civil Supplies and Consumer Affairs Minister B. Lalchhanzova pisa-ah North East Gas Grid (N.E.G.G) hnuaia Tripura atanga Mizorama Gas Pipeline phum mek Progress Report ngaihthlakna hun leh Review Meeting chu November 4, 2025 tlai khan neih a ni.

  He Gas Pipeline hi Panisagar, Tripura atanga Sihhmui, Mizoram thlenga phum tur a ni a, Tripura huam chhungah hian 15 kms phum tur niin, Mizoram chhungah 104kms phum tur a duan a ni bawk a. Tunah hian 28 kms vel phum fel tawh niin, he hna hi tha taka zawh a nih theih nan leh a rang lama zawh a nih theih nan Mizoram Sawrkar chuan a theihtawp a chhuah a, chutiang bawkin Indradhanush Gas Grid Limited (IGGL) lam pawhin a rang thei ang bera zawh a nih theih nan hma a la reng bawk a ni.

Mizo Territorial Army (MTA) lak runpui neih dan tur sawiho

Aizawl: November 15- 25, 2025 chhunga Rajiv Gandhi Stadium, Mualpuia Mizo Territorial Army (MTA) lak runpui (Recruitment Rally) neih tur chungchangah, mawhphurhna nei department hrang hrang te inpuahchah dan leh hmalak chin thlirhona chu November 4, 2025 khan Rajiv Gandhi Stadium VIP’s Lounge-ah neih a ni a. 

  Meeting hi Lt.Col.(Retd) Clement Lalhmingthanga, MLA leh State Level Committee on Territorial Army Coordination and Establishment Chairman ni bawk chuan a kaihruai.

  MTA recruitment Rally Mizoram sawrkar leh 166 INF BN (TA) ( H&H), Assam te tangkawpa buatsaih tur a ni a, tha tak leh tluang taka neih a nih theih nan hian Mizoram Sawrkar hnuaia department hrang hrang te bakah NGO leh Local Council thenkhat te hnenah mawhphurhna chanvo hrang hrang pek an ni a. Meeting-ah hian an mawhphurhna hlen chhuak tura an hmalak tawh chin leh an hmachhawp te thlir ho a nih bakah Inter- Department Coordination tha pawimawh zia te sawiho a ni bawk.

State Policy Coordination Committee thukhawm

Aizawl: Mizoram State Policy Coordination Committee te chu November 3, 2025 kha an Chairman Lalduhoma, Chief Minister hovin a office-ah an thukhawm a. Hand Holding hmalakna kal mekte thlirletna an nei.

  Meeting hian Loan Component hnuaia Progress Partner tura thlante thlen chin leh Bank te nena thawhhona te, thawhpui tur Bank neih belh tura hmalakna te leh CM Special Package dilna lut tawh vawiin thlenga endik chinte an enho a ni. CM Special Package thawh hnihnaah hian dilna thar 34,384 a lut leh tawh a ni.

  Pilot Phase-ah khan Bank ten loan component progress partner mi 243 te hnenah loan an pe tawh a, pending 262 an awm mek. A thawh hnihnaah he component-ah hian dilna 302 a lut leh tawh a ni.

Damdawi In tha ten naah PHC leh UPHC tling thar

Aizawl: November 3, 2025 khan India rama sawrkar damdawi in tha bik tehna, National Quality Assurance Standards (NQAS) Certificate chu Primary Health Centre pakhat – Marpara PHC, Mamit District leh Urban Primary Health Centre pakhat – Zemabawk UPHC, Aizawl East District te'n an nei thar. 

  Champhai District Hospital chuan nau neihna hmun ha bik tehna, LaQshya leh naupang enkawlna hmun tha bik tehna, MusQan certificate a hmu thar bawk a. LaQshya bikah 93.96% hmuin Platinum Badge an dawng a, MusQan-ah 96.57% an hmu bawk a ni.

  Heti hian Mizoram chhunga HWC-PHC 57 target awm zinga 40 leh HWC-UPHC 9 target awm zinga 6-in NQAS certificate an nei tawh a ni. Mizoram chhunga Sawrkar damdawi in 54 te chu NQAS National Certificate nei tawh an ni a. Tunah hian sawrkar damdawi in 16 leh HWC Sub-Centre 23-in state level certificate nei tawhin national-level assessment an dil mek a ni.

CM hovin Agricultural Marketing Board thukhawm

Aizawl: Mizoram Agricultural Marketing Board (MAMB) te chu November 3, 2025 khan an Chairman Chief Minister Lalduhoma kaihhruaiin CM Conference Hall-ah an thukhawm a. Kumina thlai thar leite thlirletna an nei.

  Meeting-ah hian kuminah Sawhthing quintals 3,38,354 lei a nih thu tarlan a ni a, a man pek chhuah tawh hi Rs. 118. 89 Cr. niin la pek chhuah loh Rs. 20 Cr. vel a la awm.

  Sawrkarin sawhthing a lei zingah LPK Trip 7 chiah hralh ral lohvin a awm a. Hetianga a awm chhan hi a chhe tur ven nana thliar (grading) a ngaih vang a ni. Hei pawh hi leitha siam nana lei diltu an awm mek. A dang zawng chu mumal taka tihral vek a ni a.

  Sawhthing lei leh hralh thua thil fel lo a awm leh awm loh chhuitu Investigation Team ten Champhai district an chhuichianna report an pe a. Thil dik lo an hmuhchhuahte hi sawrkarin a taka sum a la pekchhuah loh te an ni. Hetiang harsatna hi a awm tawh loh nan ruahmanna siam a ni.