AMC-in T Shirt leh lukhum pe

Aizawl: Aizawl Municipal Corporation in Aizawl City Traffic Police te tana a lei sak T Shirt – 315 nos. leh Lukhum (baseball cap) – 315 nos. te chu October 8, 2025 khan AMC in Aizawl City Traffic Police te an hlan a. 

  Hlanna hun hi AMC Conference Hall, Thuampui ah hman niin Joseph H. Lalramsanga, Municipal Commissioner in a kaihruai a; Aizawl Mayor Lalrinenga Sailo leh Deputy Mayor R. Thanglura ten Ruatsanga Ralte MPS, Sr. Superintendent of Police (Traffic) leh a thawhpui te hnenah an hlan a ni.

  Ruatsanga Ralte, Sr. SP (Traffic), Aizawl chuan Aizawl City Traffic Police te chu smart, fresh leh polite taka awm tura tan an lak thu leh mi tamtak tan Mizoram hmel lanna an nih avangin tan an la nasa hle a ni a ti a. An hnathawh hahna hriatpuitu leh duhsaktu AMC chungah lawmthu a sawi.

Nula leh tlangval ruang hmu

Aizawl : October 8, 2025 zing khan Lunglei, Tlabung peng-a hnamdang thingpui dawr kawtah mi pahnih mipa leh hmeichhia thi a hmuh an ni.

  Thi a hmuh te hi P. Lalrinsanga (28), Farmveng, Lunglei leh Enjedi Ramngaihawmi (24), Lunglawn, Lunglei te an ni a, an chhungte ve ve in an identify hnuah Civil Hospital Lungleiah postmortem niin, vawiina vui tura ruahman an ni. Chanchin buatsaih lai hian heng mi pahnihte thih chhan hi hriat a la ni lo.

Mizoram CEO leh Pol Party aiawhte inkawm

Aizawl : October 9, 2025 khan CEO Office, MINECO, Khatla-ah Dr. Lalrozama, Chief Electoral Officer, Mizoram chuan 2-Dampa (ST) Assembly Constituency-a Bye Election nei tura inbuatsaihna kalpui dan chungchangah Political Party hrang hrang aiawhte chu a pisaah a kawm. 

  Mizoram Chief Electoral Officer Dr. Lalrozama chuan 2-Dampa (ST) AC-a Bye Election kalpui tura inbuatsaihna kal zelah Political party hrang hrang atangin CEO Office hmalaknain thlawpna tha tak an hmuh thin thu a sawi a. Inthlanna thianghlim, dik leh langtlang kalpui a nih theih nan Election Commission of India thuchhuak ngai pawimawh turin leh Model Code of Conduct zawm zel turin Political Party aiawh kalkhawmte chu a chah a ni.

Home Minister hovin rel lo lutin a nghawng thlirho

Aizawl: Home Minister K. Sapdanga hovin 9.10.2025 khan Mizorama rel lo lutin nghawng hrang hrang a neihte thlirho a ni. Meeting-ah hian Sairang Rel Station a Inner Line Permit (ILP) pekchhuah a nih dan thlirho a ni a. 

  Rel station-ah te hian documents nei fello chunga luh ruk kawng a awm em tih te thlirho a ni a, DC leh SP Aizawl tangkawpin hetiang a thlen theih leh theih loh hi a hmunah chiang zawkin lo finfiah se tih a ni.

  Meeting hian rel station-a ILP pekchhuah mek dan leh hmasawn zel ngaihna lai te an ngaihtuah mai bakah Government Railway Police din a nih chungchang pawh an sawiho bawk a ni. Tourist ILP neite chu Tourism Department-a an in report dan tur pawh ruahmanna siam a ni bawk.

IPRP&S officer te Minister tharin kawm

Aizawl: I&PR Minister thar B. Lalchhanzova chuan October 9, 2025 khan a Pisa, MINECO-ah Information Public Relations Printing & Stationery (IPRP&S) Department a Administrative Officer te leh Directorate lama Senior Officer te a ko a. He hunah hian Sawrkarin I&PR leh Printing & Stationery kalpui a duhdan leh hmachhawp te a sawipui a ni.

  B.Lalchhanzova chuan a Department official te chu Department dang te tha taka thawhpui thiam turin a chah hmasa a. A Department hnuaia hmalakna kaihhnawihah Minister in a hriat tur awm chi reng reng te chu thutlukna tha zawk siam a nih theih nan a hnenah thlen vat thin turin a chah bawk a ni.

  Minister hova meeting hmasaberah hian Betsy Zothanpari Sailo, Secretary, IPRP&S in Department hmalakna tlangpui a sawi hmasa a. Hemi hnu hian chipchiar zawkin K.Vanlalsangi, Director, I&PR leh Benjamin Lalzama, Controller, Printing & Stationery ten report an pe bawk a ni.

CM-in Travel Fest 2025 hmanpui

Aizawl : MizoramTourism leh Ministry of Tourism tangkawp buatsaih Travel Fest 2025 ni hnihna chu October 9, 2025 khan Aijal Club-ah neih chhunzawm a ni a. Chief Minister Lalduhoma chuan a hmanpui.

  Tourism Minister Lalnghinglova Hmar chuan kal khawmte lawmna thu a sawi a, Tourism hmasawnna tura sawrkar hmachhawpte a tarlang. Tourism department leh EF&CC te chuan Eco-Tourism kalpuina tur inremna (MoU) an ziak bawk.

  Steve Borgia, Founder, INDeco chuan "Role of Community Partnership in Sustainable Tourism" tih thupuia hmangin thusawina a nei a, chawhnu lamah zirhona leh sawihona dang an neih chhunzawm leh bawk.

India Mobile Congress-ah Dr. Vanlathlana tel

Aizawl: October ni 8, 2025 khan India Mobile Congress (IMC) 2025 chu New Delhi-a Yashobhoomi Convention Centre-ah Prime Minister Narendra Modi chuan a hawng a. He hun ah hian ICT Minister Dr. Vanlalthlana chu telin State IT Ministers' Round table-ah a tel chhunzawm bawk a ni.

  IT Ministers Round table-ah hian ICT Minister Dr. Vanlalthlana chuan Mizoramin state a nih atanga state upa zawkte um phak tum a tan an nasat thu a tarlang a. IT kaihhnawiha Mizoram Sawrkarin theih tawpa hma a lak thu sawiin, Opticals Ground Wire (OPWG) tih changtlun tuma internet data chak zawk neih a tum dan te, Mizoram hmun tina 4G connection thlentir tura state sawrkar hmalakna te, Bharat 3.0 hmalaknaa khaw kilkhawr ber thlenga internet connection pek tuma hmalakna kalpui dan te a sawi. 

  Mipuiin state sawrkar hmalakna an hman tangkai theih nana IT thila hmasawn a tul thu leh zirna leh IT thlun zawm a tul thu te sawiin, sawrkar laipui nen tha taka state sawrkar an thawh ho a tul thu he hunah hian a tarlang bawk a ni.

SSWRC te SKOCH Award dawn leh kum 35 tlin lawm

Aizawl: Social Welfare Department & Women and Child Development (SW&WCD) Department Minister Lalrinpuii chuan October 8 khan Protective Home ni thin, State Social Welfare and Rehabilitation Centre (SSWRC) ni tain SKOCH Award a lak leh kum 35 a tlin lawmna hun chu khuallian niin a hmanpui.

  SSWRC hi kum 1990 atanga kalpui niin Chanmari West (Maumual)-ah a awm a. Hmeichhia, ruihhlo avanga harsatna tuarte enkawlna hmun niin, mi 50 an awm thei a, thla 7 chhungin rehabilitation bakah skill training - puantah, puanthui, beautician, computer course-te zirtir an ni thin a ni.

  SKOCH Award hi India rama Sawrkar Department hmalakna nei thate chawimawina niin, SSWRC hian India ram puma diltu sang chuang zingah Silver Award a dawng a ni. SKOCH Award hi private establishment pek ni mah se NITI Aayog hriatpui a ni.

SYS Minister-in National Youth Icon a thlan Grace-i lawmpui

Aizawl: Ministry of Youth Affairs & Sports-in Viksit Bharat Yuva Connect hnuaia National Youth Icon atana a thlan, Grace Lalrinpari Hauzel D/o Lalsangzela Hauzel, Khatla chu Sports & Youth Services Minister Lalnghinglova Hmar chuan October 8, 2025 khan MINECO-a a office-ah lawmpuina hun a hmanpui.

  Lalnghinglova chuan, "Grace-i hi a thawhrah avangin National Youth Icon nihna hi phu taka chang thei a ni a, ka lawmpui takzet a ni. A thlangtu pawh Ministry of Youth Affairs & Sports a ni a, a bul tanna hi helama Sports & Youth Services Department-in a lo buaipui a nih avangin keini lam pawhin kan intitatu viau a ni."

a ti.

  Pachhunga University College-a Department of History 5th Semester zirlai Grace-i chuan SYS Department-in kawng engkima an buaipuinaah lawmthu a sawi a, "Youth Icon nihna hi lawmman a ni lova, mawhphurhna a ni a. Mizoram chauh ni lo, India ram thalaite aiawh leh hmatheh ni tura mawhphurhna a ni," a ti.

Tourism minister-in Travel Fest 2025 hawng

Aizawl: Ni thum awh Mizoram Travel Fest 2025 chu 8.10.2025 khan a hawnna inkhawm Mc Cabe Hall, Aijal Club ah Tourism Minister Lalnghinglova Hmar hovin hman a ni. Mizoram Travel Fest 2025 hi tourism in hma a sawn theihna tura inrawnkhawmna, zirhona leh indawrtawnna hun atana Mizoram Tourism Department leh Sawrkar laipuia Ministry of Tourism tangkawp buatsaih a ni a; October ni 8 atanga ni 10 thleng a awh a ni.

  Travel Fest hawnna inkhawm neih zawh hian Aijal Club Park ah YWCA nen tangkawpa buatsaih, Mizo Thali Cooking Competition neih chhunzawm a ni. Ningani khan Chief Minister hovin "Revitalizing Mizoram's Tourism: Sustainable Growth Through Community Partnerships" tih thupui hmangin zirhona neih a ni a. Stakeholders discussion leh Tourist Service Provider te tan B2B session buatsaih a ni a. A ni thum chu investor te nen a inkawmna hun atana hman a ni.

Mizoram Larsap hovin RTI Week 2025 hmang

Aizawl: Mizoram Larsap General (Dr) Vijay Kumar Singh chuan October 8, 2025 khan ATI Auditorium, MINECO-ah Right to Information (RTI) Week, 2025 lawmna hun Khuallian niin a hmanpui a. Right to Information Act, 2005 Sec 4 (1) (b) in a phut anga Public Authority website enkawl thate bakah MIC logo design competition-a pakhatna hnenah lawmman a hlan a ni.

  RTI Week 2025 puala hun hmanah hian RTI Act, 2005 Sec 4 (1) (b) in a phut anga public authority website enkawl thate bakah MIC logo design competition-a pakhatna hnenah Larsap-in heating hian lawmman a hlan:

1) Website enkawl tha Public Authority:

Pakhatna: Directorate of Tourism

Pahnihna: Mizoram State Legal Services Authority

Pathumna: Directorate of Economics & Statistics

Consolation: Planning & Programme Implementation Department, PHE Department

2) MIC Logo Design Competition Pakhatna: Lalhmingmawia, Republic Vengthlang

Kudam-a hman tur Digital Weighing Scale (DWS) vai liam

Aizawl: Food Civil Supplies & Consumer Affairs (FCS&CA) Department Minister B. Lalchhanzova chuan FCS&CA kudam zawng zawnga hman tur Digital Weighing Scale (DWS) thar 112 khuhhawnna chu Govt. Muanna Godown (GMG), Muanna Veng-ah hmanpuiin, Saitual, Khawzawl leh Champhai district-a hman tur DWS 35 phurtu motor a vai liam nghal a ni.

  Digital Weighing Scale (platform type) leina tur hian sawrkar atangin Rs. 86 lakh hmuh a ni a. Original Equipment Manufacturer (OEM) hnen atanga direct-a lei niin, tender chhangtu Company 4 atangin Weightex Scales, Haryana-te thlan an ni a. DWS hi district hrang hranga FCS&CA kudam zawng zawnga hman tur 112 lei a ni a, tum khatah quintal 25-a rit a buk theih a ni.

  August 29, 2025 khan Haryana-a Weightex Scales factory atanga rawn phurh chhoh niin, September 11, 2025 khan GMG Muanna Veng, Aizawlah rawn phurh thlen vek a ni a. A company technician-te’n September 19 khan GMG-ah an remkhawm a, Legal Metrology lamin Digital Weighing Scale-te calibrate hna an thawk nghal a ni.

MYC Chairman leh Japan Embassy te inkawm

Aizawl : Malsawmzuala Ralte, Chairman, Mizoram Youth Commission (MYC) leh Jonathan Lalremruata, OSD to CM-te chuan Takashi Ariyoshi, Minister & Deputy Chief of Mission, Embassy of Japan chu October 8, 2025 khan a office-ah an kawm.

  MYC Chairman Malsawmzuala chuan Mizo thalai eng emaw zat Japan-a hnathawk mek an awm thu leh thawk tura inbuatsaih a, Japan tawng zir mek thahnem tak an awm thu sawiin, heng Mizo thalaite hi Japan tawng an zir zawhah exam turin Delhi-ah an kal thin a, an pass hnuah visa dil turin Delhi-ah bawk an kal leh a ngai thin chu a hnai zawk, Kolkata-a Japan Consulate Office-a tawng exam leh visa dil theih tura ruahmanna siam turin a ngen.

  Mizo thalai Japan tawng exam pass tawh, Japan-a hnathawhna tura lehkha nei tawh, visa dilna tihkhawtlai avanga harsatna tawk an awm thin thu sawiin, amah pawhin a rang lama tihfelsak tura ngenna lehkha a ziahsak thin thu a sawi. Tin, Japan tawng zir zo tawhte tana Aizawla exam theih tura ruahmanna siam turin an ngen bawk a. An ngenna hi Ariyoshi chuan an lo enzui ngei dawn thu a sawi a ni.

Larsap-in RIPANS 25th Graduation and Lamp Lighting Ceremony a hmanpui

Aizawl: Mizoram Larsap, General (Dr) Vijay Kumar Singh chuan October 7, 2025 khan Regional Institute of Paramedical & Nursing S Sciences (RIPANS) 25th Graduation and Lamp Lighting Ceremony, 2025 chu Khuallian niin RIPANS Auditorium-ah a hmanpui a, Mizoram University Exam 2025-a Gold Medalist-te kutah Medal leh Citation a hlan a ni.

  RIPANS hi March ni 30, 1995 ah din niin, tun dinhmunah department 7 - College of Nursing, Department of Pharmacy, Department of Medical Laboratory Science, Department of Optometry, Department of Radio Imaging Technology bakah kumin atanga bultan Department of Physiotherapy leh PG Diploma in Nutrition and Dietetics - hnuaiah zirna programme hrang hrang 12 (UG 6, PG Diploma 1, PG 4 & Post Doctoral 1) kalpui a ni a. Staff 160 (Teaching 51 & Non Teaching 109) leh zirlai 925 an awm mek a ni.

Minister Dr. Vanlalthlana leh Union Minister Ashwini Vaishnaw Inkawm

Aizawl: New Delhi-a India Mobile Congress (IMC) 2025-a tel Information & Communication Technology Minister Dr Vanlalthlana chuan October 7, 2025 khan Union Minister of Electronics and Information Technology Ashwini Vaishnaw chu a pisa-ah a kawm.

  ICT Minister Dr Vanlalthlana chuan Mizorama Software Technology Park of India (STPI) changtlung zawka din vat a nih theih nan MeITY Minister chu hma lakpui turin a ngen a. Mizoramin human resource an neih that thu leh digital literacy-a an sanna chu tangkai zawka hman a nih theih dan tur a sawipui a. 

  Mizoram Engineering College (MEC)-a class tan tura Mizoram Sawrkar hmalakna leh National Institute of Technology (NIT) Mizoram campus, Lengpuia din tur pawh hun rei tak chhunga chawlh a nih hnuah hna thawh chhunzawm leh thuai a nih tur thu a sawi lang a. Mizorama IT hub din a nih theih nan leh software export leh IT incubation centre kalpui a nih theih nan STPI changtlung tak chu Mizoram mamawh a nih thu Union Minister of Electronics and Information Technology chu a hrilh bawk.

SASCI hnuaia hmalakan kalpui dan thlirlet

Aizawl: Chief Minister Conference Hall, Aizawlah Special Assistance to States for Capital Investment (SASCI) hnuaia Department hrang hrang kaltlanga hmalakna kalpui dan thlirletna hun October 6, 2025 khan hman a ni.

  Chief Minister Lalduhoma chuan he hun hi kaihruaiin Home Minister K. Sapdanga, PWD Minister Vanlalhlana, EF&CC Minister Lalthansanga, Agriculture & Farmers Welfare Minister PC Vanlalruata, Health & Family Welfare Minister Lalrinpuii, Power & Electricity Department Minister F. Rodingliana, Sports & Youth Services Minister Lalnghinglova Hmar leh Adviser to Chief Minister (Finance & Planning) TBC Lalvenchhunga te an tel a. SASCI hnuaia hmalakna kalpuitu Department Secretary, Director leh Official dangte an tel bawk a ni.