Ruihhlo Meth leh a neitu a puh man

Aizawl : Excise & Narcotics Department chuan October ni 22, 2025 khan Bawngkawn South-ah Methamphetamine Kg 6.928 leh a neitu nia puh mi pali - Ramhlupuia (18) S/o Vanlalmanga, Hmunhmeltha, Champhai; Lalramnghaka (43) S/o Robiaka, Hmunhmeltha, Champhai; Lalbiaktluanga (32) S/o Lalnunmawia, Hmunhmeltha, Champhai leh Hmingthanzami (45) d/o Nodumthanga, Bawngkawn South-a khawsa nia inchhalte chu an man.

  Methamphetamine vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, October ni 22, 2025 khan Special Court (NDPS Act), Aizawl District-ah hruai nghal an ni.

Hmun hrang hrangah Police Commemoration Day hmang

Aizawl : India ram hmun hrang hrang te rualin Mizoram-ah pawh October 21, 2025 zing dar 7 khan Police hmunpui hrang hrang, District Headquarters leh Battalion Headquarters-ah te Commemoration Parade hi neih a ni.   

  September 1, 2024 leh August 31, 2025 inkar khan India ram pumah police mi 191 zetin ram leh hnam tan nunna an hlan a. August 15, 1947 atanga August 31, 2025 thleng hian police mi leh sa 36637 zet ram leh hnam tana nunna hlan an awm tawh bawk.

  Kumin chhung hian vanneihthlak takin Mizoram Police zingah duty laia hmelma kuta thi an awm lo a, kum 1966 atanga vawiin thlengin Mizoram Police zingah, ram leh hnam tana nunna hlan mi 54 (sawmnga leh pali) lai an awm tawh a ni. 

  Mizoram Police hnuaia Commemoration Parade hmanna pui ber hi "Martar Thlan" 1st Bn. MAP Headquarters, Armed Veng, Aizawl-ah neih a ni a, Mizoram Police senior officer-te bakah CRPF, SIB leh Assam Rifles atanga officer pawimawh kalte nen urhsun taka martarte sunna neih niin, martar thlanah zahna pangpar dah a ni.

Hostel atanga tlain MZU-a Ph.D ti lai thi

Aizawl: Mizoram University (MZU)-a Mass Communication-a Ph.D ti lai chu a awmna hostel atanga tlain Pathianni khan a thi.

  C. Lalruatkima s/o C.Lalrintluanga hi Inrinni zing khan Lengteng Hostel building, MZU chhawng lina atanga tlain Ebenezer Hospital, Aizawl-ah Pathianni tlai dar 05:00 khan a thi. 

  Kum 28 mi, Akima ruang hi Pathianni zan khan Bazar Veng, Lunglei panpui a ni a, Thawhtanni chhun dar 12 :00 ah vui a ni.

Delhi-ah Mizo musician thi-in hmu

Aizawl : Delhi-a rimawi kaihhnawih lam hna thawk K. Lalrinchhana s/o K. Lalrokunga, Farm Veng, Lunglei chu October 23, 2025 zing khan a chenna inah thi a hmuh a ni. 

  Delhi atanga ZALEN thu dawn danin K. Lalrinchhana hi Delhi-ah musician hna thawkin a awm a. Zing dar 9:30 velah a chenna Kishangarh, South Delhi ah thi a hmuh a ni. 

  Kum 23 mi, Farm Veng, Lunglei tlangval K. Lalrinchhana hi musician niin, sound system hawh theih turte neiin hmun hrang hrangah an zai kual ?hin niin thu dawn a ni. 

  A ruang hi Zirtawpni-ah postmortem niin nimin Inrinni khan Mizoram rawn pan pui a ni.

Chief Minister-in YMA Khawmpui lian hmanpui

Aizawl : Young Mizo Association Inkhawmpui lian vawi 75-na, zan hnihna Vantlang Inkhawm chu Chengkawlawn Run, Sakawrdai-ah neih chu October 23, 2025 zan khan Chief Minister Lalduhoma chuan khuallian niin a telpui.

  Chief Minister chuan, inkhawmpui palaite chibai a buk a, chawimawina dawngtu zawng zawngte a lawmpui. YMA chu a awmna hmun apianga mipuite thlamuantu a nih avangin mitin tana pawl tangkai a ni. Ramria kan buaiin YMA in lo lang a, khuarel chhiatna kan tawhin YMA hmel kan hmu a. Zofate insuihkhawmna kawngah ni se in tangkai reng thin, a ti.

  Inkhawmpui report bua a lan danin YMA hian Branch 827, Group 49, Sub Hqrs 9 a nei a. Mizoram pawnah Assam, Meghalaya, Manipur, Tripura leh Nagaland ah Group leh Branch a nei a, Bangladesh-ah Branch pakhat Sajek Branch a nei bawk. Member zawng zawng hi 507267 niin an zinga 295905 hi mipa an ni a, a dang 211362 hi hmeichhia an ni. Life Member 12068 an awm a, hruaitu hlun chawimawina dawng tawh 3352 awmin, tun inkhawmpuia chawimawina dawng thar tur mi 176 an awm.

Tourism Stakeholder Consultative Meeting nei

Aizawl : Tourism Minister Lalnghinglova Hmar hovin October ni 22, 2025 khan I&PR Lianchhiari Rûn Conference Hall-ah Tourism Stakeholder Consultative Meeting neih a ni. 

  Sairang thleng rel lo lut avanga khualzin lo punchho zel turah tourism kaihhnawih a eizawng leh inhnamhnawih - sawrkar department, ACBOA, tour operator, hotel, restaurant, homestay, Sairang khawtlang aiawh bakah mediaperson te an tel a ni.

  Tourism Minister chuan tourism in ken tel tha tak tak a neih rualin a tha lo pawh a awm tel thin ve tho avangin inrawnkhawmna chu tangkai taka hmang a, tawnhriat te inhrilh tawn a, tourism sector a tel hrang hrang te inzir a hmasawn tlan nan hmang ngei turin kalkhawmte a chah a ni.

  Kalkhawmte hnen atangin tunhnai a mikhual an lo dawnsawn dan a harsatna leh danglamna awm te, hmasawnna leh hmalakna belh ngaihna nia an hriat te sawihona neih a ni.

Mizoram State University (MzSU) dinna tur hmun thenkhat a tlawh

Aizawl: Higher & Technical Education Minister Dr. Vanlalthlana chuan October 22, 2025 khan Mizoram State University (MzSU) dinna tur hmun thenkhat a tlawh.

  Minister chuan a hnuaia hmun, MzSU cluster awmna turte hi a tlawh a. A hmuna Department hotute leh College zirtirtute’n an lo dawngsawng a ni.

1. Directorate of Geology and Mining, Luangmual – Mizoram State University administrative building leh building dangte awmna tur

2. Govt. Aizawl West College campus, Luangmual – School of Social Sciences awmna tur

3. Govt. Aizawl College building, Sikulpuikawn – administrative building sak laia luah lailawk tur

4. Govt. Aizawl College campus, Salem Veng, Mualpui – School of Humanities & Education awmna tur

5. Govt. Hrangbana College, Muthi – School of Economics & Management awmna tur

6. Govt. Zirtiri Residential Science College campus, Durtlang – School of Sciences awmna tur

  He’ng bakah hian Mizoram Engineering College, Pukpui, Lunglei-ah School of Engineering & Technology a awm dawn bawk a ni.

School-te tana sem tur tuizem vailiam

Aizawl : Mizoram Legislative Assembly Speaker Lalbiakzama chuan October 22, 2025 khan Aizawl-a Vanapa Hall kawtah nikuma Cyclone Remal-in a tihchhiat District hrang hranga School-te tana sem tur tuizem a vailiam.

  Speaker hian tuizem phur motor 10 a vailiam a ni a, Tuizem te hi District hrang hrangah thawn chhuah a ni a, Mamit District-ah erawh chuan inthlan a nih dawn avangin inthlan zawhah sem a ni dawn a ni. District hrang hrang tana sem chhuah tur zat chu Aizawl District tan -16, Lunglei - 39, Siaha - 12, Champhai - 2, Kolasib - 59, Serchhip - 1, Mamit - 19, Saitual - 1 leh Hnahthial - 3 a ni.

Ailawng Tlangcheng-ah officer rual hovin buh seng

Aizawl: October 20, 2025 khan Ailawng Tlangcheng rama lo neituten buh an seng chu Mizoram sawrkara dinhmun pawimawh tak tak chelhtu Department hrang hrang enkawltu ten an telpui.

  Buh seng hi Sudhir Kumar, IAS, Principal Secretary, Govt of Mizoram ; Zodingpuii IAS, Secretary, Art & Culture ; Betsy Zothanpari Sailo, IPRP&S Secretary ; TC Lalkhuma, Jt. Secy Art & Culture Department leh Carol VLMS Dawngkimi, Director, Art & Culture department ten buh an sengpui a, anni hi Ailawng khawtlang hruaituten lo tawiawmin tlai lamah chawhlui an kilho bawk a ni.