Cheng Nuai 200 chuang man Khawzawl-ah Meth an man

Aizawl : Assam Rifles chuan tawlhruk thila thu an dawn bawhzuiin October 1, 2025 khan Khawzawl, Mizoram-ah Methamphetamin KG 6 aia tam Nuai 200 chuang man an man.

  Thu an dawn bawhzuia an operation an neihnaah hian a kengtu hian rinhlelh a ni tih a hriat avangin a thil ken hi ramhnuaiah hnuchhiahin a tlanbo zui nghal a. Chhuitu lam hian a tlanchhiatna bawr hi an dap hnuah Methamphetamine KG 6.87 a rit, international market-a Cheng Vaibelchhe 20.61 man hi an hmuchhuak a ni.

Pension scheme tha zawk phutin pungkhawm

Aizawl: Mizoram sawrkar hnuaia New Pension Scheme (NPS) hmangtute chu October 1, 2025 khan Mizoram Movement for Old Pension Scheme (MIMOPS) huaihawtin Vanapa Hall kawtah an pungkhawm a, Pension Scheme tha zawk Mizoram sawrkar lakah an phut.

  MIMOPS chuan Mizoramah NPS hman a nih dawn leh hman a nih hnu rei tak chhung chu a taka pension an awm mai hma kha chu NPS chhiat zia hriat a nih loh avangin sawiselna leh duhlohna thawm a ri lem lo a, NPS chhiat zia hriat a nih hnuah pawh subscriber te an la tlem vang nge Central employee leh state dang employee ten OPS demand kum 10 vel an kalpui hnuah November 2022 atang MIMOPS a lo din atang khan Mizoram-ah chuan NPS duhlohna hi auchhuahpui a ni ve ta chauh a ni, an ti.

  State engemaw zat chuan NPS hi hmang ve hman mahse OPS-ah an a let leh tawh/let mek a ni an ti a, state thenkhat chuan UPS hi an hmang tawh/hmang mek bawk a ni an ti.

Heroin hawng 10 leh a neitu a puh man

Aizawl : Excise & Narcotics dept chuan September ni 30, 2025 khan heroin gram 100 chuang leh a neitu a puh an man.

  Mizoram sawrkar-in Mizorama ruihhlo lo lut tur beihpui thlakna a kalpui mek, Operation Jericho hnuaiah Excise & Narcotics Department chuan India leh Myanmar inrinnaa Tiau lui, Tlangsamhmun hlui, Champhai District-ah Heroin 118.330 gram (Hawng 10) leh a neitu nia puh – Lalrinmawia (47) s/o Zachula, Tlangsam, Champhai District-a khawsa nia inchhal hi an man a ni. 

  Heroin phurhna atana a hman, Myanmar Bike (KENBO 125) pawh hrensak nghal a ni.

Bungraw chuh hman lohin chenna in pahnih a kang

Aizawl : 30.9.25 zanlai pelh hnu khan Vairengte Chhimveng ah chenna in pahnih bungrua engmah chhuh hman lovin a kang ral.

  Kangmei avanga insa seng tum in atanga zuang thla Lalmalsawma chuan a ke ah hliam a tuar a, damdawiin ah hruai nghal a ni a, chenna in pahnih te hi Lalchhandama in leh Lalmalsawma te luah lai a ni.

Truck in kum 8 mi su hlum

Aizawl : Chanchinmawii leh K Vanlalrema, Thingdawl Tlangnuam veng te fapa, K. Malsawmhlua (8), chu

September 30 tlai khan an School bang chesualin, Kolasib Dist Hospital panpui a nih hnuin a hliam tuar loin tlai dar 5 vel khan a boral a, naktuk chhun dar 12 ah vui a ni ang.

  Malsawmhlua hi an school bang, an school bus in a thlah zo, a kawng kan tur chu hnamdang khalh bungraw phur truck, Kolasib lam atanga Aizawl lam pan in su palhin a hliam tuar lovin a boral a ni. A sutu hnamdang Driver hi Kolasib PS ah lak nghal a ni.

Lui dunga nungcha man khap hun puang

Aizawl : Fisheries Department chuan Mizoram lui dungah sangha fuan hun a thleng leh dawn a, lui dung nungchate an lo pun zel theihna turin leh Nghafuan hun laia him taka an inthlahpun theihna turin Mizoram Fisheries Act, 2002 Section 5(1) leh (2) behchhanin khapna September 29, 2025 khan a tichhuak.

  October 10- November 30, 2025 chhung hian sangha leh lui dung nungchate man, tihhlum, an nunphung tihbuai te khap tlat a ni, Khapna Mizoram chhunga Lui leh Luite zawng zawng (Autonomous District Council Areas ) tel lovin a huam ang, khapna dan bawhchhiate chu thla khat (1) chhung Lung in tan, thla thum (3) chhung pawhsei theih emaw Rs. 5000/-chawitir emaw; a pahnih(2)-in emaw hrem theih a ni.

MPL Season 12 Round 12 na hawng

Aizawl: October 2, 2025 khan Mizoram Premier League (MPL) Season 12 Round - 10 hawnna inkhawm chu CYLA Playground, Chandmary, Lawngtlai-ah neih a ni a. Dr. Lorrain Lalpekliana Chinzah, Adviser to Chief Minister ( H&FW, A&FW) leh Lawngtlai East bialtu MLA ni bawk chuan khuallian niin a hmanpui.

  Dr. Lorrain Lalpekliana Chinzah chuan MPL Lawngtlai Organising Committee - te inpekna leh hnathawh fakawm a tih thu sawiin, Mizoram Football Association (MFA) leh Lawngtlai District Football Association (LDFA) inakra thawhhona tha tak awm chu vawn nung zel a pawimawh a ti, MPL Team- tha tak tak zingah MLS FC, Lawngtlai an tel ve chu ropui a tih thu tarlangin, MPL Team tha tak an nih zel a beisei tih a sawi . Lawngtlai East bialtu MLA chuan MPL Season 12 Round- 10 Team zawng zawngte duhsakna hlanin, mawi tak a inkhel tur leh midangte entawn tlak ni zel turin a chah a. Khuallian chuan MPL Lawngtlai Organising Committee - kutah tanpuina sumfai a hlan nghal a ni.

India hnampa Mahatma Gandhi zahna lantir

Aizawl : India hnampa Mahatma Gandhi pianchamphaphak vawi 156-na, Gandhi Jayanti pualin October 2, 2025 zing dar 7:30 khan Larsap General (Dr) Vijay Kumar Singh, PVSM, AVSM, YSM (Retd) leh Mizoram Sawrkara mi pawimawh dangte chuan PUC Campus, College Venga Mahatma Gandhi limah pangpar dahin zahna an lantir.

  Gandhi Jayanti puala zahna lantir zingah hian Acting Chief Minister Vanlalhlana, Mizoram Legislative Assembly Speaker Lalbiakzama, Environment, Forest & Climate Change Minister Lalthansanga leh Health & Family Welfare Minister Lalrinpuii te an tel a. Anni bakah hian Chief Secretary Khilli Ram Meena, DGP Sharad Agarwal leh Sawrkar hotulu dangte pawhin he hunah hian zahna an lantir bawk.

  Hun hman zawh hian Larsap leh official-te chuan Gandhiji-a ngaihpawimawh faina leh vantlang rawngbawlna lantir nan Swachhata hi Seva pualin tual an phiat fai a ni.

Larsap-in Sairang Railway Station a tlawh

Aizawl, the 1st October, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) chuan October 1, 2025 khan Sairang Railway Station tlawhin a enfiah a, Railway hotute a kawm bawk.

  Larsap General (Dr) Vijay Kumar Singh chuan a vawikhat nana Indian Railway Network nena Mizoram khawpui Aizawl thlunzawm a ni leh, India ram khawpui pawimawh tak takte awlsam taka train hmanga thlen theih a ni ta chu lawmawm tiin, Northeast Frontier Railway hotute chu a enkawl leh tihchangtlun zelna turah theihtawp chhuah turin a chah a. Rel service mumal leh khailhlak lo, mipui tana awlsam leh him, faina leh kawng tinrenga ram chhung hmun dangte entawntlak siam kawngah theihtawp chhuah tlan a tul thu a sawi bawk.

Crash Course for BSF Written Exam kalpui tan

Aizawl : MYC Coaching Centre Class Room 1, MINECO ah October 1, 2025 khan Crash Course for BSF Written Exam kalpui tan a ni. Class tan hma in Course hawnna hun hman a ni a, he hun hi MYC Chairman Malsawmzuala Ralte chuan a hmanpui.

  He Crash Course offline leh online mode a kalpui niin Classroom (Offline) ah mi 35 laiin class an rawn kal thei a, Aizawl district pawn lam atangin (Online) mi 35 in class hi an chhim thei bawk a ni. Crash Course hi ni 1-15 October,2025 thleng kalpui tur a ni dawn a ni.

  Hemi ni vek hian MYC chuan Mizoram Civil Service (Combine Competitive Exam) Coaching Class a kalpui tan a, Course hi thla 8 chhung kalpui tur niin May 2026 ah Course hi zawh tur a ni ang.

Health Minister hovin International Day of Older Persons hmang

Aizawl: Health & Family Welfare leh Social Welfare, Tribal Affairs, Women & Child Development Department Minister Lalrinpuii chuan October 1, 2025 khan khawvel huap Upate Ni puala inkhawm Chanmari YMA Hall a neih chu khuallian niin a hmanpui. He programme hi National Programme for Health Care of the Elderly (NPHCE) leh Social Welfare Department tangkawp a buatsaih a ni.

  Minister Lalrinpuii chuan khawvel pumpuia upa te an pun chhoh zel thu sawiin, hei hian damdawi lama inenkawlna tha zawk mamawhna a thlen tel thu a sawi a. Chumi atan chuan Mizoram Universal Healthcare Scheme hnuaiah ruahmanna tha tak siam a nih thu leh, private mai bakah kohhran hospital hrang hrangin an zawm belh mek thu a sawi a. Kum upa golden card nei te chuan sawrkar hospital ah chauh hman theih thin kha tunah chuan MUHCS zawmtu private hospital ah chuan a hman vek theih tawh thu a sawi.

  Khuallian hian vawiin Upate Ni pual inkhawm ah hian Kum 100 tling mipa 3 leh hmeichhia 9 hnenah lawmpuina thilpek a hlan a ni.

CM-in Bawm hnam kut Tlanglut Kut hmanpui

Aizawl: October 1, 2025 khan Mizoram Bawm Student Association chuan Khawmawi Playground-ah Bawm hnam kut Tlanglut Kut lawmna leh 2nd International Bawm Cultural Meet an buatsaih a. Chief Minister Pu Lalduhoma chuan Kut Pa niin a telpui. Khawmawi bialtu MLA Pu Lalramliana Papuia chu khualzahawm niin, Dr. Lorrain Lalpekliana Chinzah chuan Chief Minister hi a tawiawm.

  Tlanglut Kut inkhawm hi B. Lalramchhana, Vice President, MBSA in a kaihruai a, Vanlalpianmawiin hunserh hmangin Stephan Rutland, President, MBSA chuan thusawiin Pu Remrikhuma, GS, MBSA chuan report a pe thung.

  Mizoramah hian Bawm hi mi 30000 vel an awm niin an sawi a, LADC chhungah leh CADC chhungah an awm tam ber a, LADC ah hian Lai dawta hnam peng lian ber nia sawi an ni. Bangladesh atanga himna zawnga rawn raltlan hi mi 2500 vel an awm bawk.

MISSTA memberte rawngbawlna in zirna tibuai lo se a duh thu hrilh

Aizawl : School Education Minister Dr. Vanlalthlana chuan October 1, 2025 khan Synod Conference Hall, Aizawlah Mizoram Secondary School Teachers’ Association (MISSTA) Silver Jubilee lawmna leh General Conference, 2025 neihna ah telpuiin zirtirtu kalkhawmte chu rawngbawlna in zirna tibuai lo se a duh thu sawi.

  Dr. Vanlathlana chuan, “Kohhran leh khawtlang rawngbawlna ngaih pawimawh vanga siikul kal tlai, ban hun hma a haw leh class lak thulh hi awm tawh lo se, rawngbawlna lama kan tui a nih chuan full-time in inhmang tlang law law zawk mai rawh u” tiin a chah a, rawngbawlna in zirna tibuai lo se a duh thu sawiin, Headmaster te pawh discipline tha taka keng kawh turin a chah nghal bawk.

  Minister chuan MISSTA Silver Jubilee Monument hawngin Silver Jubilee Magazine a tlangzarh nghal bawk a. MISSTA member te duhsakna hlanin thawhhona tha tak nei zel turin a chah.

  He hunah hian MISSTA member pensioner te thlahna hun leh State Awardee te chawimawina hun hman niin, hruaitu hluite chawimawina hun hman a ni bawk.