Mizo hmeichhe MA pass hmasa ber thi

Aizawl: Mizo hmeichhe zinga MA pass hmasa ber, Rita Neihpuii chu kum 100 mi niin September 24, 2025 zan khan awmlaiin a thi. 

  H. Raltawna (L) nupui, Rita-i hian kum 1951 khan Guwahati Univerity atangin MA (History) a zo a, Mizo hmeichhe zinga master degree nei hmasa ber a ni. 

  Kum 1938-40 chhungin PC Girls’ School-ah Pawl IV-VI zirin nungchang tha ber lawmman pek a ni a; pawl ruk (hetih hun laia board exam)-ah Mizoram hmeichhe zing ti tha ber a ni bawk.

  MA a zawh hnuah St. Mary's College, Shillong, Meghalaya-ah zirtir hna a thawh hnuah Mizoram-ah Govt. Mizo High School leh College of Teachers’ Education-ah zirtirtu a ni leh bawk.

  MHIP General Headquarters-ah kum 11 chhung (1983 leh 1993 inkar) vice president a nih hnuah kum 1993-95 chhung president a ni leh a. Tun hmaa awm thin, Mizoram State Commission-ah member leh Lok Adalat-ah conciliator a ni tawh bawk.

  Rita-i hi September 25, 2025 khan a lawina, St.Mary’s Church, Electric Veng, Aizawlah vui a ni.

AMC Draft Electoral Rolls tlangzarh 

Aizawl: Aizawl Municipal Corporation huam chhunge Ward 19-te Draft Electoral Rolls chu September 24, 2025 khan mipuite en theih turin tarchhuah a ni a, vote nei zawng zawng 2,34,600 an ni a, mipa aia hmeichhe tamna vote 17,302 a ni.

  Tun tum AMC Draft Electoral Roll hi MLA Roll 2022 behchhana siam a ni. Dt.25.09.2025 atanga Dt.25.10.2025 thleng Electoral Roll atanga hming paih, thun thar, siamthat ngai leh insawn duhte tan dilna (claims and objections), Local Level Officer (LLO) hnenah thehluhna hun hawn a ni ang.

Sazu puang zirchiang turin thawkchhuak

Aizawl : Tunhnai a Mizoram hmun hrang hranga sazu puang zirchiang turin Department of Zoology Pachhunga University College te a a puanna hmunah an kal chilh. 

  Professor Lalramliana hovin September 25, 2025 khan team 2 an chhuak a, khawchhak leh chhim lam an pan a, September 26 khan team 1 in khawthlang an pan leh a. Eng sazu chi nge puang tih an zir bakah rannung seh natna kai thei an awm leh awmloh an enfiah dawn a ni.

  Pachhunga University College a thawkte leh zir chianna danga tarlan a nih dan chuan Sazu-te hian natna hrang hrang an pu darh thin a, a bik takin Mizoram-ah Rannung seh (Scrub typhus) natna a pu darh nasa tih finfiah a ni tawh a ni.

Police leh Assam Rifles ten ralthuam man

Aizawl: Police leh Assam Rifles te chuan dan lova lakluh silai leh a mu engemawzat kawl an awm tih thu an dawn hnuah September 21, 2025 khan Zokhawthar, Champhai District-ah hma an la a ralthuam thahnem tak an man.

  Operation an neih hian an rinhlelh In pakhat chu hualin team te hian In hi an dap a, 5.56 mm M4A1 Carbine leh magazine, Red Dot Sight, 19 5.56 mm NATO rounds, 100 7.62 rounds. te chu an hmuchhuak a, hemi kaihhnawih-ah hian Robert Vanlalliana chu an man bawk.

Mizoram hmeichhe cricket team feh chhuak

Aizawl: October 8 atanga khelh tan tur, Board of Control for Cricket in India (BCCI) buatsaih inelna, Senior Women’s T20 Trophy khel turin September 25, 2025 tuk khan Mizo nulaten Tripura an pan.

  Mizoram hi plate group-a awm niin Agartala panin relin an chhuak a. An group-ah hian state dang team panga - Meghalaya, Manipur, Sikkim, Nagaland leh Arunachal Pradesh te nen an awm a, an inkhel kual ang a, a sang pahnihin final an khel ang.

  Plate group-ah hian an inkhelh kual hnua a sang ber team hnihin October 17, 2025-ah Police Training Academy (PTA) Ground, Agartala-ah final an khel ang.

Chief Minister leh US Consul General inkawm

Aizawl: September 25, 2025 khan Chief Minister Lalduhoma chuan a office-ah Mizoram tlawha lo zin mek Kathy Giles Diaz, Consul General, US Consulate General, Kolkata chu a kawm a. Mizoram a rawn tlawh avanga lawmthu lo hrilhin hun nuam tak hmang turin duhsakna a hlan.

  Kathy Giles Diaz hian Mizoram chu mawi a tih thu leh rawn tlawh a chak thin thu a sawi a. US-ah Mizo hnahthlak tam tak an awm a, an awmna hmunah khua leh tui tha an ni zel a. Chutianga inzawmna tha tak nei an nih avangin rawn kal hi a chak zual a ni, a ti. Mizoramah US company te tana Investment kalpui theihna chi a awm a nih chuan a tul anga tanpui a inhuam thu a sawi bawk.

  Chief Minister hian, investment lama Mizoram tanpui a inhuamnaah lawmthu hrilhin Foreign Funding hmalakna lam chi reng reng chu Central sawrkar remtihna hnuaia kalpui vek a nih thu a hrilh a. Mizo hnahthlak US a cheng an tam tawh a, chuvangin Mizoram mipuite zingah US tlawh duh an tam ve tial tial a. Inpawh taka kan thawhho a tul a ni, a ti.

Mizo Territorial Army chungchangah meeting

Aizawl: September 25, 2025 khan MLA Lt. Col. Clement Lalhmingthanga hovin Secretariat Conference Hall-II, MINECO-ah Mizo Territorial Army chungchangah meeting neih a ni.

  He hunah hian Aizawl Territory Army (TA) Company awm lailawkna tur, Bung Banglaa Institute of Hotel Management hmun thawmthat hna kal mek dan te, Territorial Army lak dan tur kalhmang te leh Territorial Army Company thar din dan tur te sawiho a ni a.

  Mizo Territorial Army, Aizawl Company hnuaiah hian mi 150 lak tur niin, November vel atanga hna lak kalpui tan tum a ni.

Swachhata Hi Seva 2025 hnuaia Hnatlang hawng

Aizawl: UD&PA Minister K.Sapdanga chuan September 25, 2025 zingkar khan MINECO Open Gym kawttualah Swachhata Hi Seva hmalakna kal mek hnuaia Faina Hnatlang Mahatma Gandhi pian champha phak thlenga neih tur, "Ek Din, Ek Ghanta, Ek Saath" a hawng.

  He programme denchhen hian UD&PA Minister chuan mimal, veng, khawtlang, pawl, Zirna in te, kohhran leh sawrkar department anga Faina Hapta chhungin hma laho turin ngena a siam a. "Ek Din, Ek Ghanta, Ek Saath" program-ah hian HDFC Bank chuan CSR Fund kaltlangin khawlaia bawlhlawh hip khawmna lirthei - Garbage Vacuum Truck chu UD&PA Minister hnenah an hlan nghal bawk a ni.

  Faina Hnatlang runpui hawnna program-ah hian CSR kaltlanga Garbage Vacuum Truck rawn thawh tu HDFC Bank aiawhin Kaushik Sharma, Zonal Head leh John Varte, Zonal Head leh hotu dang te an tel a. Sawrkar lam atangin AMC, UD&PA, PHE, Smart City Project Ltd leh DIPR atangin Senior Official leh thawktute bakah MINECO Welfare hruaitute an tel a ni.

Minister pahnihin Vaivakawn Police Station tlawh

Aizawl: Home Minister K. Sapdanga leh Excise & Narcotics Department Minister Lalnghinglova Hmar te chuan September 24, 2025 zing khan Vaivakawn Police Station an tlawh a, police te fuihtharna leh hmasawnna tura hmachhawp thenkhatte an sawi.

  Minister pahnihte hi Vaivakawn khawtlang hruaitute’n an tawiawm a. Lalmalsawma Pachuau IRS, Secretary, UD&PA Department leh Jacob Lalawmpuia, Director, UD&PA Department te pawhin UD&PA Minister hi an tawiawm bawk a ni.

Mizoram State Project Monitoring Committee Annual Report 2024-25 a tlangzarh

Aizawl : September 24, 2025khan Chief Minister Lalduhoma chuan CM Conference Hall-ah Mizoram State Project Monitoring Committee Annual Report 2024-25 a tlangzarh a. Project Monitoring Committee te hnathawh tawh chin chu a tha tawk hle a ni, a ti.

  Kum 2024 - 2025 sawrkar kum chhungin Mizoram State chhunga project sawmli pasarih (47) an tlawh zinga sawmli pahnih (42) te chungchang he Annual Report-ah hian dah a ni a. Project kal lai mek ni tawh lo, hman tangkai lohva dah tawl tak, uiawm tak tak Mizoram Polytechnic buildings district panga (5) Champhai, Kolasib, Mamit, Lawngtlai leh Siaha a mite tlawh telin, an dinhmun theuh te he report ah hian dah tel a ni. Education Sector-ah hian a thupui ah “Zoram Rohlu - Eklavya Model Residential School” tih hmangin Central sikul Mizoram, Ministry of Tribal Affairs MoTA) in an rawn dah chungchang zeh tel a ni bawk.

PHE Minister Prof.Lalnilawma’n Union Minister pahnih kawm

Aizawl: PHE Minister Prof. Lalnilawma chuan September 23, 2025 khan Union Minister pahnih, Ministry of Jal Shakti CR Paatil leh Ministry of Housing & Urban Affairs Minister Manohar Lal Khattar te chu an chenna inah a kawm.

  Prof. Nitea hian CR Paatil hnenah hian Jal Jeevan Mission (JJM) hnuaiah Mizorama khua zawng zawng deuh thaw cover anih vangin lawmthu a sawi a. Chutih rualin JJM hnuaia hnathawh zawh tawh bill tang rei lutuk chungchang sawiin release sak thuai turin a ngen a. Minister chuan JJM chungchangah Ministry levelah chinfel ngai a awm a, theihtawp chhuahin an bawhzui thu leh a fel veleh pawisa an rawn pek tur thu a lo hrilh.

  Prof. Lalnilawma chuan Ministry of Housing & Urban Affairs Minister Manohar Lal Khattar hnenah hian Aizawl leh District Headquarters hrang hranga mipui ten tui in tur hnianghnar zawk an neih theih dan tur project chungchangte sawipuiin, Mizoram sawrkar leh Chief Minister Lalduhoma ngei pawhin mimal tak pawha a ngaih pawimawh em em, Mizoram khaw tina tui in tur hnianghnar zawk a awm theih nana hmalak dan tur chungchangte an sawi dun a ni.

Health Minister-in National Ayurveda Day 2025 lawmna hmanpui

Aizawl: Health & Family Welfare Minister Lalrinpuii chuan September 23, 2025 khan Vanapa Hall-ah National AYUSH Mission, Mizoram buatsaih, National Ayurveda Day 2025 lawmna hun chu khuallian niin a hmanpui. Kumin hi National Ayurveda Day lawm a nih tan atanga vawi 10-na niin, thupui atan, ‘Ayurveda for People and Planet’ tih hman a ni.

  Minister chuan AYUSH doctor leh staff, co-located AYUSH facilities-a thawk mek te, Integrated AYUSH Hospital-a thawk te leh AYUSH Health & Wellness Centre 41-a thawk mekte chungah lawmthu sawiin, Ayurveda chu India-in mihringte hnena a thilpek hlu tak a ni a, Ayurveda hmanga hriselna chu mi tin tan a ni a, hrisel taka nung duh apiang tana belhchian tlak, Ayurveda chu chawilara a awm zel a beisei thu a sawi bawk a ni.

NHIDCL te hmalakna Review Meeting neih pui

Aizawl : CM Conference Hall-ah Chief Minister Lalduhoma kaihhruaiin September 23, 2025 khan Mizorama NHIDCL ten kawngpui an sial mekte enpuina (Review Meeting) neih a ni a, Vanlalhlana, PWD Minister, PWD officials, P & E official leh NHIDCL hotute an tel.

  Chief Minister chuan, National Highway te thawmthat (repair) ngai a tam leh tawh a. Lirthei tana tlan harsa khawpa chhia a tam leh tawh hle. Contractor Liability Period chhunga mi vek an la nih angin rang taka thawmthat thuai a duh thu NHIDCL hotute hi a hrilh. Bypass Road kawng thar an laih hnua khaw chhung kawngpui, state PWD hnena an la hlan loh te a rang lama hlan tur te, Aizawl to Vairengte kawngpui chu ngaihpawimawh bik (priority) a nei tur tein a chah a. 

  Central sawrkara Rigid Pavement hmanga kawngpui sial tawh zawk tura a rawtna zirchiang tura hmalakna kalpui rang turin a chah bawk. Hemi thuah hian Union Minister Nitin Gadkari, MoRTH chuan Mizorama rigid pavement hmanga kawngpui sial chungchang lo zirchiang turin NHIDCL te hi a hrilh tawh a ni.

  NHIDCL lam hian an hnathawhna hmun hrang hranga harsatna an tawhte Chief Minister hnenah hian an thlen ve bawk a ni.