AB-PMJAY Ayushman Bharat - Pradhan Mantri Jan Arogya Yojana chu September 23, Pathianni khan prime minister Narendra Modi-a’n a hawng a; Mizoram atan pawh Thawhtanni khan chief minister Lal Thanhawla'n CMO pisa conference hall-ah a hawng. Guv leh Modi Governor Kummanam Rajasekharan chuan September 23, Thawhtanni khan prime minister Narendra Modi chu a pisaah a kâwm a; Mizo­rama inbiakpawhna leh intlawhpawhna lama harsatna hrang hrangte a sawipui. Trauma Centre Thawhtanni khan Aizawl Civil Hospital (ACH)-ah Finance minister Lalsawta'n Trauma Centre level-II sakna tur lungphùn a phúm a; Health minister Lal Thanzara chuan general ward leh private ward awmna building thar a hawng bawk. MEOW Mizoram Earthmover Owners’ Union (MEOW) chuan Thawhtanni khan thuchhuah siamin, hnam dang JCB Mizorama rawn inhlawh thinte chu Mizoram atanga tihchhuah vek an tum an tarlang. NSS Thawhtanni khan Vanapa Hall-ah Mizorama National Service Scheme (NSS) din champha vawi 49-na lawm a ni a, Higher & Technical Education (HTE) minister R Romawia’n a hmanpui. Kolasib inpeih Thawhtanni khan Kolasib DC Dr. Arun T hoin official, MPF leh political party aiawhte'n DC conference hall-ah kumin MLA inthlan lo awm tur atana inbuatsaih hrang hrangte an sawiho a, an district chu inthlan atan an inpeihfel thawkhat thu tarlan a ni. Serchhipah DIET Serchhip DIET building thar, cheng nuai 233.53 senga sak chu Thawhlehni khan chief minister Lal Thanhawla’n a hawng. Serchhip DIET building hi CSS atanga sum hmuh hmanga sak niin chhawng thum a ni a, chhawng tin zau zawng belhkhawm chu metre 758 bial a ni. Tlangzarh Economics & Statistics department buatsaih ‘Socio-Economic Development & Planning in Mizoram during the Five Year Plan Period’ tih lehkhabu chu Thawhlehni khan Economics & Statistics conference hall-ah Planning minister Lalsawta'n a tlangzarh. FPO Conference Mission Organic Mizoram (MOM) chuan Nilaini khan Agriculture directorate conference hall-ah Farmer Producer Organisation (FPO) Conference hmasa ber an buatsaih a; district hrang hrang atanga FPO kalkhawmte'n an hmachhawp leh sumdawnna kalkawnga an ruahmannate sawiho a ni. Rimawi kut Art & Culture department leh Sangeet Natak Akademy, New Delhi-te chuan Nilaini khan Vanapa Hall-ah Swar Sudha - Festival of Choral Music & Instrumental Ensemble an buatsaih a, Art & Culture minister R Romawia’n a hawng. Thukhawm Lunglei Town Planning Authority chu Ningani khan district bawrhsap Dr. Ankita Charavarty hoin DC conference hall-ah an thukhawm a; Mizoram Urban Areas (Land Development, Landslide Prevention & Mitigation) Rules, 2017 anga planning authority siam dan tur an ngaihtuah. MRB Mizoram Rural Bank (MRB) chuan September 27, Ningani khan khan Mizoram hmun hrang hrangah MRB din champha vaw­i 35-na an lawm. Branch tinin an remchan anga an lawm bakah, Chanmari YMA Hall-ah a lawmna pui ber neih a ni. Kawngzawh Social Welfare department buatsaihin Zirtawpni khan hriselna lama hmasawnna tura kawngzawh, ‘Poshan Rally on National Nutrition Month’ (Rashtriya Poshan Maah) neih a ni a, Vanapa Hall a?anga Millennium Centre thleng kawng an zawh. Social Welfare minister PC Lalthanliana leh Health minister Lal Thanzara ten hmanpuiin, thupui chu ‘Eat healthy, healthy nation’ tih a ni. Bengngawngte Ni Zirtawpni khan Assembly Annexe conference hall-ah World Day of Deaf hman a ni a, Health minister Lal Thanzara'n a hmanpui. Thupui chu 'Zaizir nen chuan kan vaiin kan tel tlang vek thei’ tih a ni. Secretary post Mizoram Police Service Association (MPSA) chuan Zirtawpni khan Police Headquarters-a Arya Mess-ah inkhawmpui an hmang a; MPS-te'n Mizoram sorkarah secretary post an neih theih nan hmalak an rêl. Hawla lakah PIL Lalhriatrenga Chhangte (Hriata Chhangte), Serchhip chuan Zirtawpni khan Aizawl Press Club-ah thuthar thehdarhtute a kâwm a; chief minister Lal Thanhawla lakah Gauhati High Court-ah public interest litigation (PIL) a thehluh dawn thu a sawi. AMFU All Mizoram Farmers Union (AMFU) chuan Zirtawpni khan Aizawlah 'Zoram kuthnathawktute chhanchhuahna kawngzawh' an huaihawt a; mi thahnem takin Chanmari kâwn atanga Vanapa Hall kawt thleng kawng an zawh.