Mi dawr rawktu man

Aizawl : Raltlan, mi dawr rawk a, pawisa Rs. Nuai 10 chuang tlanbopuitu ni a sawi chu September 23, 2024 zan khan Diltlang South Police ten an man.

   September ni 22 zan a Lawngtlai Chandmary a Emmanuel Store rawktu ni ngei a hriat chu September 23 zan dar 1:30 vel khan Diltlang South Police ten Diltlang South khaw dai, Khawmawi lam kawtchhuah Kilometre 1 vel ah an man.

   Police te hian an mi man hnen atang hian Rs. 7,59,700/- an hmulet a, Lawngtlai lamah lak chhoh a ni.

Doctor pahnih sawisatu zingami Police Constable suspend

Aizawl : September 21, 2024 zana Durtlang Leitan-a Doctor pahnih leh mi pakhat sawisatu mi paruk zinga Police Constable Sailianpuia Sailo, Aizawl DEF mi leh sa Sairang Police Station-a post mek September 24, 2025 khan suspend a ni.

   Sailianpuia hi Section 93 of Mizoram Police Act, 2011 (Act No 3 of 2012) read with Rule 1044 of Mizoram Police manual, 2005 behchhanin suspend nghal a ni.

   Doctor an sawisakte hi Dr. Laldinliana Sailo s/o Lalhmangaiha Sailo, Dr. Ringngheta Renthlei s/o Dr. R.L. Sanghluna, Durtlang leh Lalthlamuana s/o P.L. Ropara, Durtlang Mel-5 te an ni a

Bethsy te nupa lakah FIR thehlut

Aizawl : Upa Lalhriatpuia Chawngthu leh a nupui, Bethsy Lalrinsangi te lakah Hindu pawl pakhat, RSS nia hriatten thubuai an thehlut.

   BCM hnuaia recognised evangelist team, Horeb Ministry Team speaker Upa Lalhriatpuia Chawngthu hnen atanga ZALEN thudawn danin, September 4-5, 2024 khan an nupa hian Mount Olive School, Debitola, Assam-ah Missionary Retreat an hmanpui a, he an hun hmanah hian RSS nia hriatten Hindu naupangte an duh lo chung Kristiana inleh luih tura puhin police-ah an hek a ni.

   Upa Lalhriatpuia te nupa leh Mount Olive School Principal C. Lalremsanga (Buangtea) te hi police-in an koh hnuah leh naupangte-ah Pathian hnathawh mak tak tak a lan avanga boruak a zia dawn emaw tih laiin September 24, 2024 khan Kokrajhar District Court-ah naupang Kristiana inlehtur, ‘Child Conversion' tiin Upa Lalhriatpuia Chawngthu te nupa leh C Lalremsanga te lakah hian case an register leh ni.

Land Owner Association Kolasib ten an kawng dan an titawp

Aizawl : Joint Action Committee, Land Owner's Association, Kolasib District ten NH 06 & 306-a Road Block an neih chu chhan hran hrang avangin September 25 tlai 3:30 khan tiam chin awm lovin an call-off, Kolasib DC leh Senior SP, Kolasib te chuan hriatpuina hming an ziahhnan ve bawk.

   JAC, LOA Kolasib district te demand an siam chu Chief secretary hova vawiin chawhnu Dar 2:00 a meeting neihah an demand hi an sawiho ngei a ni tih DC Kolasib in assurance an chu chu hlawhtlinnaah an ngai an ti.

   Supreme Court-in ram chunchang buaina chingfel tura state sawrkar a hriattir chu chak taka hma lak a anih tih an hriat avangin call-off hi an remti.

   JAC, LOA Kolasib district harsatna te hi DC Kolasib zahawm taka a tul anga sawrkar-ah chak taka a bawhzui leh enzui sak a tiam avangin he thutukna hi siam an nih thu inremnaah hian tarlan a ni bawk.

Heroin gram 510 leh a neitu a puh man

ZALEN Sept. 25, 2024; Excise and Narcotics Department leh Kumpuan Committee, CYMA te thawk dun chuan Heroin gram 510 leh a neitu a puh mi 2 an man.

   Excise and Narcotics Department leh Kumpuan Committee, CYMA thawkdun chuan September ni 25, 2024 (Nilaini) zing dar 5:20 khan Zemabawk, Pushpak Mandir bulah heroin gram 510 (Hawng 44) leh a neitu nia puh mi pahnih - Vanlalchhandama (42) s/o R. Lalbiakthanga, Champhai Venglai leh Rampanmawia (22) s/o Rimawiliana, Champhai Tlangsam-a khawsa nia inchhalte chu an man.

Minister hovin World Tourism Day

Aizawl : Tourism Minister Lalrinpuii hovin Tourist Lodge Conference Hall, Chaltlang-ah September 26, 2024 khan World Tourism Day, tum 44-na hman a ni.

   Minister chuan nikum lamah Reiek khua-in best tourism village a lo dawng tawh chu lawmawm tiin kuminah pawh Sialsuk khua-in best tourism village 2024 a dawng thei chu a lawmpuiin lawmpuina a hlan nghal bawk a ni.

   He hunah hian MLA 6 te'n an bial chhunga Adopt Tourism Village atana an khaw thlan hrang hrangte an thlan chhan an sawifiah theuh a ni.

K. Sapdanga’n MZP Assembly hmanpui

Aizawl : Vawiin khan Home Minister K. Sapdanga chuan Mizo Zirlai Pawl Assembly vawi 68-na, hun ngana Thanghlianga Sailo Run, Champhai Tlangsama neih chu September 26, 2024 khan khuallian niin a hmanpui a. Adviser to CM (Political) Lalmuanpuia Punte pawhin he hun hi a telpui a ni.

   K. Sapdanga chuan Mizo Zirlai Pawl Assembly a hmanpui thei chu a lawm thu a sawi a. Champhai MZP Sub Headquarters-ah Vice President anih thin thu leh kum 1985-a MZP dinthar a nih khan, Zirlai Pawl thlazar hnuaiah Zoramin Remna a neih theih nan hruaitute hnung an lo zui ve thin tih a sawi. Khuallian hian MZP chu zirlaite chhertu, zirlaite hma ngaia an hmakhua su kaw tu tur a nihna vawng reng turin kalkhawmte chu a chah a ni.

Cambodia-a India Ambassador atan B. Vanlalvawna

Aizawl : B. Vanlalvawna, IFS chu India sorkarin Cambodia ah India aiawha Ambassador hna chelh turin 26.09.2024 khan a ruat thar. Ani hian sawrkar laipuia Ministry of External Affairs ah Joint Secretary post a chelh mek a. A post thar hi a zawm thuai tura rin a ni.

HIV Youth Event buatsaih

Aizawl : Sawrkar laipuia National AIDS Control Organisation (NACO) in HIV/AIDS leh STI do runpui Intensified IEC Campaign 2024 "India Fights Against HIV/AIDS & STI" kalpui tura ruahmanna a siam angin district hrang hrangah he natna chungchang inhrilhriatna leh inzirtirna neih mek a ni.

   He campaign kal zelah hian 25.9.2024 khan Aizawl District ah chuan khuallian Aizawl DC Er. Lalhriatpuia, District AIDS Prevention and Programme Committee Chairman ni bawk hovin Vanapa Hall-ah HIV Youth Event buatsaih a ni.

   He HIV Youth Event ah hian intihsiakna pathum - Debate, Flash Mob Dance, Placard design leh Photo Booth siam ah school leh college zirlai naupangte an inel a ni.

CM-in Champhai Grape Winery tlawh

Aizawl : September 25, 2024 khan Chief Minister Lalduhoma chuan Champhai Grape Growers Society Winery, Tlangsam, a tlawh a. Society hotute nen inkawmna hun an nei.

   Champhai Grape Growers Society hotute hian Chief Minister hnenah hian Grape Wine an tharchhuahte hlawk zawk leh zau zawka an hralh chhuah theih nan sawrkar hmalakpuina an lo ngen a. Grape Wine chu food item a nih anga zalen taka hralh theih an duh thu leh License-Vendor system pawh mumal zawka kalpui an duh thu an lo hrilh a ni.

   Lalduhoma chuan Mizoram sawrkar chuan flagship programme - ‘Bana kaih - Hand Holding Policy’ hmangin kuthnathawktute khai chhuah a tum mek a, he policy hnuaia ham?hatna te pawhin an mamawh dan a zirin an dil thei tih a hrilh bawk.

AH&Vety Minister-in Union Minister-ah mamawh thlen

Aizawl : Sorkar laipui dawra Delhi a cham mek, AH & Vety Minister C. Lalsawivunga chuan 24.9.24 khan Union Minister for Fisheries, Animal Husbandry & Dairying Rajiv Ranjan Singh; Minister of State for Fisheries, Animal Husbandry & Dairying George Kurien leh Union Minister for Minority Affairs Kiren Rijiju te leh Ministry-a Secretary leh official pawimawh dangte hmu in Mizoram mamawh hrang hrang a thlen.

Progress Partner-te puitu tur te tan Training buatsaih

Aizawl : Sawrkar Flagship Programme, Handholding Scheme tlangzarh tak kalpui zelna turah Progress Partner-te puitu tur Sawrkar Department hrang hrangte tan ni hnih chhung training buatsaih a ni a. Planning & Programme Implementation Dept. Conference Hall ah September ni 24-26, 2024 chhung khan neih a ni.

   Training-ah hian Bank Scheme-te leh Portal chungchang belhchianna neiin, Progress Partner te tana DPR siamsak dan te zirho a ni.

   Dilna lut te hi a kaihhnawih department a Search Committee ten an zirchian hnu a Department Nodal Committee in an recommend ten Apex Body in a lo thlang ang a. Hemi hunchhung hi thla thum chhunga tihfel hman zel tur a ni.

Spa therapy training tur thlah

Aizawl : September 24, 2024 khan Mizoram Youth Commission Conference Room-ah MYC kaltlanga Spa therapy training tur mi 7 (pasarih) thlah liamna hun hman a ni. Heng thlanchhuah mi 7 (Pasarih) te hi September 25, 2024 (Nilaini) khan Aizawl chhuahsanin Delhi an pan a, thla 18 chhung an training ang.

   MYC Chairman Pu Malsawmzuala Ralte chuan, "Tawrhchhelna, tumruhna leh tih hram hram a ngaih hun pawh a awm ngei ang” a ti a. Zalenna hmang sual lo tur leh Kristian nihna vawng nung reng turin a chah bawk a ni.

   He training programme kalpui theih nan hian Mizoram Youth Commission leh Bharat Hotels Limited, New Delhi te chuan thawhhona thuthlung (MOU) an ziak a. MYC aiawhin Malsawmzuala Ralte, Chairman MYC in a sign a ni.

NSS Foundation Day hmang

Aizawl : Sports & Youth Services Minister Lalnghinglova Hmar hovin September 24, 2024 khan Vanapa Hall, Aizawl-ah National Service Scheme (NSS) Foundation Day vawi 55-na hman a ni.

   Khuallian Sports Minister chuan NSS thupui keimah ni lovin nangmah (not me but you) tih chu a Pathian thu hle mai a. NSS volunteer te tunlai mila inthlak danglam a pawimawh thu sawiin tunlai khawvel chu mi thiam bikte khawvel a nih angin an thiltih apiangah mi bik nih tum turin NSS Volunteers te chu a chah a. Tum nei rana an zirlaite zir chhuak tur leh nakin huna an inchhir loh nan Social Media a tawk chauha hman dan thiam turin a chah bawk a ni.

Ramhlun Sport Complex-a sawrkar ram theh tawh a hmunah tlawh

Aizawl : September 24, 2024 khan School Education Minister Dr. Vanlalthlana, Aizawl North-II bialtu leh Revenue Minister B. Lalchhanzova te chuan Ramhlun Sports Complex-a Sawrkarin ram a lo theh tawh chu a hmunah tlawhin hemi chungchang hi khawtlang hruaitute an sawipui.

   Ramhlun Sports Complex Vengthlanga inbengbel tam ber, In leh lo chantate hian an LSC hmasa chu sawrkar hnenah an lo hlan (surrender) tawh a. In hmun tur theha teh fel ni tawh mah se, in hmun lehkha house site pass emaw, LSC emaw an beisei anga an neih mai theih loh avangin bialtu MLA leh Revenue Minister-te hi hma lakpui turin an ngen a ni.

Chief Secretary-in Mizoram Rahbi 5.0 hawng

Aizawl : Planning & Programme Implementation Department hnuaia Mizoram Startup Mission (MSUM) kaltlanga buatsaih tur, Mizoram Rahbi 5.0 chu September 23 khan Chief Secretary Dr. Renu Sharma, Chairperson, Mizoram Startup Mission (MSUM), Governing Board ni bawk chuan a Pisa, MINECO, Aizawl-ah a hawng.

   Mizoram Rahbi 5.0 hian Mizoram chu a chhunga chengte leh chin dan thar, danglam bik hmangtea mahni kutke ngeia ding thei tura hlankai chu a tum bulpui ber a ni a. Hei hian intihsiakna mai ni lo, sumdawnna kawnga inhrilhhriatna, sumdawng dangte nena inthlunzawmna, a hralhna tur ngaihtuah bakah pawimawh dangte a huam tel a ni.