ZALEN Jan 29, 2026: Mizoram sawrkar leh Aizawl Municipal Corporation (AMC) chuan MLA Hostel thlang kawngpui sira thei zuar mi 11 te chu AMC Multi-Complex Tuikual South building chhungah insawn turin a hriattir nawn.

Nimina AMC thuchhuah in a tarlan danin, Khatla-a MLA Hostel building chu sak that a tul avang leh building hlui thiah a nih tak avanga a sakna hmun tur lei laih a ngaih avangin a thlang kawngpuia thut chu mihring tan a him loh avangin Mizoram sawrkar leh AMC chuan MLA Hostel thlang kawngpui sira thei zuar mi 11 te chu loh theih lohin AMC Multi-Complex Tuikual South building chhungah sawn chhuah a tul tih a tarlang.

AMC chuan helai hmun hi parking area ni thin, thei zuar te hma ngaih vangin an inzawrhna hmun atan hman turin December ni 3, 2019 khan AMC leh Thei zuar Association ten agreement an ziak a, tun thleng hian la kalpui zelin vendor 11 an thu mek tih a tarlang a. January ni 6 khan AMC chuan Thei Zuar Association President hnenah January ni 16 ral hma ngeia AMC Multicomplex Tuikual South, 3rd Floor-ah in sawn tura hriattirna a pe a. Thei Zuar tute an la in sawn loh avangin January ni 23 khan show cause notice pek leh an ni a. Revenue Office bula thut an dilna chu AMC chuan phalsak an nih loh thu leh AMC Multicomplex Tuikual South-a insawn chhuak tura hriattirna lehkha chu January ni 23 khan, Theizuar Association President Khatla hnenah pek nawn leh a nih thu an thuchhuah chuan a tarlang a ni.

#ZalenNews