Aizawl; MZP Sub-Hqrs. Thenzawl chuan Thenzawl CHC-a Medical Officer Dr. Lalramhluna chu Mizoram Sorkarin Zawlnuam-ah sawn a tum nia sawiin, hei hi tha an tih loh thu leh vanduai thlak an tih thu an sawi a, sorkar chu a thu sut tura an ngen bakah a tawp thlenga dodal tlat an tum thu an sawi. MZP Sub-Hqrs. thuchhuah chuan, Thenzawl leh a chhehvel khaw tam tak ten Thenzawl CHC chu an pan ber anih bakah, Aizawl - Lunglei via Thenzawl World Bank kawngpui a tlang hnuin accident a tamin, heng vanduaina tawk mi tam tak ten Thenzawl CHC an pan thin thu an sawi a, Police Training Centre-in Doctor an neih loh avanga Thenzawl CHC Doctor ten kartin hunbi neia PTS hi an vil/enkawl kawp avanga Doctor an indaih loh thu leh Doctor dahbelh an beisei zawk laia Doctor awmsa sawn tumna awm chu tha an tih loh thu an sawi bawk. Tun dinhmunah Thenzawl CHC-ah hian Doctor- 4 (General - 3 leh Ayush Doctor 1) an awm mek a, Doctor 1 chuan nau a neih avangin thla 6 chhung maternity leave a la mek a, hetiang anih lai kara Doctor hi sawnchhuah anih leh phei chuan, Thenzawl khua leh a chhehvel khaw tam tak bakah, khualzin vanduaina tawk ten harsatna lian zawk an hmachhawn ngei dawn niin MZP Sub.Hqrs. chuan an sawi.