ZALEN August 24, 2026: Chief Minister Lalduhoma kaihhruaiin vawiin khan Mizoram Pro-Active Governance and Timely Implementation (Mi-PRAGATI) meeting neih a ni a. State chhunga hmasawnna hnathawh lian zual thlanchhuahte thlirho niin, hna kal muan chhan te, harsatna awm sut kian dan tur te leh hmalak zel dan tur te sawiho a ni.

He sawihonna a langsar tak Thenzawl Peace City tura Master Plan buatsaih mek chu thlirho niin, he khawpui tur hian Sq. km 85 (Village Council 6: Thenzawl East, West, South, Kanan, Vengthar leh Buangpui) a huam a, hmasawnna hna thawh theihna hmun (Developable Area) hi Sq. km 51.81 (60.95%) anih thu tarlan a ni. 

He khawpui thar tura atana hmalakna hmasa Early Bird Project hmangin Solid Waste Management System atan cheng vaibelchhe 4, Dilpui chhehvel cheibawlna atan cheng vaibelchhe 8 leh Saturday Market thar siamna atan cheng vaibelchhe 3 te thawh hmasak tum a ni a. Lau Lui tui lian ven leh cheimawi hna thawh nan cheng vaibelchhe 23 ruahman a ni bawk.