DOWNLOAD OUR APP

Read latest news on your phone
app-store
Thiam thil fahrah lo TNT-a zir chhuak leh Durtlang North final-ah
May 25, 2022

TNT chuan an thiam thil a fahrah loh zia lantirin, kum 2016 hnua a vawi khat nan leh a tum hnih nan Pro Volleyball final lut turin 25-20, 20-25, 11-25, 25-19, 15-13 (3-2)-in Hunthar mipa team an hneh. Semi-final hmasa zawkah hian champion tura tlang rin leh khel tha thei em em Hunthar team chu Thutak Nunpuitu (TNT) hian set thum set hniha hnehin final an lut. 

Team dangin phai vai an lak laia huaisen taka Mizo hlanga khel Muanna Veng team tan Vanlalṭanchhana (Valbuanga) chuan point 25 hmuin 10 hloh a, a chak tur chin felna hnuhnung set nganaah 13-13 a nih laiin point hlu tak a thawk chhuak a, a hnuah F Lalhriatpuia'n net bulah Hunthar spiker Laldensanga vuak dang thlain hnehna hlu tak an chang a, an inkhelh chhung zawnga team au phurtu kawr var ha rual mipui pung khawm nen hlim em emin hnehna an lawm.

League match an khelh tumin TNT hi Hunthar lakah set khat mah la lovin an lo tlawm tawh a, TNT hi an thiam piah lamah an vannei em em a, championship kal meka vawi 5 an khelh tawhah tum hnih chiah la chak mah se final an lut thei a, semi-final hnuhnung zawka Tuichangral 3-1 a hnehtu Durtlang North Volleyball Clun nen Zirtawpni zan dar 8:00 ah final an khel ang.

League-a sang ber ni chunga semifinal khel Hunthar lam hian bul an ṭan fuh lo va, TNT-in net bulah ṭha takin Gagan Kumar-a ball vuak an dang a, harsatna an tawk. Set hloh lova khelh thum an chak zawn hnua set an hloh hmasak ber thleng mah se insiam ṭhain set hnih an thunun zawn a, Densanga, Lalramnunfela leh Zomuansanga bakah Gagan-a'n awmzia a nei thar ve leh a, hneh takin set thumna an awpbet.

Mahse, set lina aṭangin Lalrinzuala Hnamte chuan TNT fuih phurin kawng dikah an kir leh a, Huntharin vuak thlak harsat thar lehin an talbuai a, an insiam thar zui mai thei lo. TNT-in an ṭanhmun sawhnghetin Valbuanga'n langsar taka a khelh bakah hun pawimawhah captain Vanlalchhantluanga Sailo leh Zosangzuala an rin tlak tel a, championship kal meka hneh theih loh ang maia chungnung hman Hunthar hneh hmasa ber an ni a, an mamawh fiahna hautak pal tlangin rahbi pawimawh tak an tuk.

Tum hnih champion thei awm chhun Hunthar hi chak zawk tura rin kai niin a ṭum thum nan champion an tumna a hlawhchham. Hunthar player Densanga'n point 21 hmuin vawi li a tisual a, D3 Business Player of the Night lawmman dawng mah se a team final a luhpui zo lo. 

D3 Business Player of the Night
- Laldensanga (Hunthar)

Amrit Premium Plus Cement Fan of the Night
- Joela (TNT)

Player stats :

TNT
Vanlalṭanchhana : point hmuh 25, point hloh 10
Zosangzuala : point hmuh 13, point hloh 2
Lalrinzuala Hnamte : point hmuh 10, point hloh 1
Vanlalchhantluanga Sailo : point hmuh 8, point hloh 4
Sadraka Fanai : point hmuh 4, point hloh 1
F Lalhriatpuia : point hmuh 4, point hloh 2

HUNTHAR
Gagan Kumar : point hmuh 25, point hloh 15
Laldensanga : point hmuh 21, point hloh 4
Lalramnunfela : point hmuh 8, point hloh 3
Zomuansanga : point hmuh 10, point hloh 6
Lalnunfela : point hmuh 7, point hloh 1
Vanlalthlengropuia : point hmuh 2, point hloh 0

FIXTURE

 :FINAL - HMEICHHIA
May 26, Ningani - 
8pm : Bungkawn v Bethlehem Vengthlang (hmeichhia)

FINAL - MIPA
May 27, Zirtawpni - 
8pm : TNT v Durtlang North

 

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh