Aizawl February 21, 2023 : Serchhip Government College-a 'Women's Hostel' a hawn naah Higher & Technical Education Minister  Dr. R. Lalthangliana chuan zirlaite chu thiamna tak tak nei tura zir turin a chah a, a naran tan hna a van thu sawiin thiamna tak tak nei te chu hna in a zawng zawk, a ti. 

Dr.Thangtea chuan Serchhip College A grade an ni thei chu lawmawm a nih thu sawiin, "'A grade' hmuh hi thil har tak a ni a, Aizawl khaw pawn college-a 'A grade' hmu hmasa ber in ni hi ropui ka ti. Quality education paw chhuak turin tan la zel ang che u. 21st Century-ah hian chona nasa tak a awm a, a naran leh satliahin hlawhtlinna pangngai an chang thei tawh lo. A pangngai nih ringawt chuan hna a hmuh theih tawh loh, a thiam fal nih zel a ngai tawh. Degree sang ringawt ni lo, thiamna tak tak nei turin zirlaite leh zirtirtu zawng zawngte ka chah che u a ni," a ti.

H & TE Minister chuan, "Mizoram sawkar hnuaiah ringawt hna a awm lo, thiamna tak tak neite chu hna hian a zawng zawk a ni. In college leh District hi hmasawnna tur tam tak a la awm a, College leh District tih hmasawn zelna turin kumin kum tawpah hian mipuiten rilru in siam thiam ngeina turin ka chah nawn leh che u a ni," a ti bawk.

H&TE Minister Dr.R.Lalthangliana chuan Sawrkar building tawngpawng sak teuh teuh hi a tul ber lo a, a luahtu leh thawktu turten an luah nghal a, post nen awm chilh nghal a pawimawh a ni. Congress sawrkar kha ka sawiselna ni lovin, an thalo e, pawh ka ti lo. Mahse, a luahtu tur post ngaihtuah hmasa lova sak thin hi a tha lo. He bial thenawm Tuikum bialah pawh polytechnic building sum tam tak senga pamtul mai maite hi sawrkar tan insen thlawnna a ni. Serchhip College anga College campus nei tha hi Mizoramah an awm lo. Vawiina kan hawn tak hi chu luah nghal a ni dawn a, a lawmawm ka ti hle a ni. College hmun hmate hi uluk takin lo humhalh tha zel ang che u," a ti.