Aizawl: Mizoram Police chhinchhiah danin kum 5 kalta chhung khan thih dan pangngai ni lo (Unnatural death) a thi 1124 an awm a, heng zingah hian mahni intihlum chu a tam ber niin 402 an ni a, unnatural death atanga chhutin 35% an tling. Hetih lai hian mithiamte chuan mahni intihhlum chu a hun taka mithiamte hnena hruai an nih chuan a ven theih tih an sawi. Mizoram Police chhinchhiah danin thihdan pangngai loa thi (unnatural death) hi kum 2010 ah 204 awmin an zinga 26 hi mah-ni intihlum an ni a, kum 2011 ah 268 awm lehin mahni intihlum 89, 2012 ah 282 awmin 91 chu mahni intihlum an ni a, kum 2013 ah 226 awmin 81 chu mahni intihlum an ni a, kum 2014 ah 144 thihdan pangngai loa thi zinga 65 chu mahni intihlum an ni bawk a. Kumin 2015 kumtir atanga August thla tawp thleng khan mahni intihlum hi 61 an awm tawh nia chhinchhiah a ni bawk. Lalremruati Asst. Professor, Govt. Aizawl West College chuan rilru lama harsatna nei te chuan an harsatnate ngaihthlak sak a, ngaihsaktu an mamawh tih a sawi a. "Mahni intihlum zinga 95% hi natna nei (rilru leh taksa) leh tihdam theih a ni a, mahse an zinga 50% te hi mithiamte enkawlna dawng phalo an ni. Mithiamte hnen hruai thlenna chang hria ila kan ramah hian mahni intihlum hi an tlem phah ngei a rinawm a ni," a ti. Psychiatry Department, Kulikawn Hospital chuan September 2014 atanga August 2015 inkar chhung khan mahni intihhlum tum mi 28 in an pan a, hengte hi an chhanchhuak vek tih damdawiin thawktute chuan Zalen an hrilh. Mahni intihhlum tuma pantu zinga 20 hi mipa niin 8 chu hmeichhia an ni a, an zinga 10 hi nu leh pa boral tawh an ni a, 9 te chu nu leh pa inthen te an ni. Mahni intihhlum tuma pantu zingah hian High School kal chin tam berin 14 an awm a, Higher kal 6 leh Middle school kal 5 ten an dawt a ni. Psychiatry Department pantu zinga mi 22 hi ruihhlo khawih thin an ni a, chhungkaw zinga ruihhlo ngai nei mek 18 an awm bawk a ni. Mizoram Synod hnuaia din Family Guidance & Counselling Centre chuan Zirtawpni (11.9.2015) thleng khan pantu mi 13,587 an nei a, kumin bikah mi 2,433 in an pan tawh bawk. FGCC hi January ni 21,1997 khan Main Centre, Mission veng ah bultan a ni a, tunah hian Chanmari, Vaivakawn, Champhai, Serchhip leh Kolasib ah te Centre hi hawn a ni tawh bawk. Harsatna neite tan Aizawl bikah Main centre, Mission Veng, Ph.No.2324443, Chanmari - 2306693 leh Vaivakawn - 2344324 ah te an harsatna thlen thin se an duh tih Zalen an hrilh a, mithiam ten an harsatna neih te an sutkian pui thin tih an sawi bawk. Khawvel pumah second 40 chhungin mi 1 mahni intihlum zel ang an ni. 80% hi a hmaa lo tum tawh te an ni. Chhungkaw zinga intihlum awm/thlen tawhna ah a thleng nawn duh mithiamte’n an ti.