Aizawl: Mizoram Police hnuai­a CID (Crime) chhinchhiah danin, kum 2013 atang June 2016 chhung khan Mizoramah thih dan pangngai ni lo, vanduaina leh chhan dang vanga thi mi 770 an awm tawh. CID (Crime) chhinchhiah danin mahni kut zala thihna thleng zingah hian inawkhlum an tam ber a, 2013 atanga kumin June thleng khan mi 306 an thi tawh a. Motor khalh fimkhur tawk lohna avanga chetsualna thleng ah mi 83 an thi tawh a, tui tla hlum mi 84 awm tawhin, ruihhlo hman sual (Overdose) avangin mi 46 an thi tawh a. A chhan ziah lan theih chiah lo thihna thleng dangah mi 251 an thi tawh bawk a ni. Zalen thudawn danin kum 2013 khan inawk hlum 81 an awm laiin, kum 2014 ah erawh 72 an awm thung a. Kum 2015 khan mi 111 zet an inawkhlum niin chhinchhiah a ni a, kumin June thla thleng khan mi 42 inawkhlum anga chhinchhiah a ni thung. Kum 2013 khan tui tla hlum mi 43 an awm niin CID te chuan an chhinchhiah a, kum 2014 ah kum hmasa lam aia tlemin mi 10 an thi niin chhinchhiah a ni a, 2015-ah kum hmasa lam aiin pungin tui tla hlum 26 an awm a, kumin June thla thleng khan mi 14 tui tla hlum an awm tawh thung a ni. Ruihhlo hman sual avangin kum 2013 khan mi 7 an thi niin CID(Crime) te chuan an chhinchhiah a, 2014 ah kum hmasa lam aia pakhata pungin 8 an thi a, 2015 ah pung deuh hluaiin 19 an thi thung a, kumin chhung June thla thleng khan 12 thi an awm tawh niin chhinchhiah a ni thung.