Aizawl February 16, 2023: MPCC Vice President Lal Thanzara, Ex Minister chuan, "MNF sawrkarin SEDP nuai 3 semin chak takin sawrkar an kalpui kan lo beisei a. Mahse, kum 4 kan thlir hnuah thil awmdan hi a beidawn thlak takzet a ni tih Mizoram mipuiin kan lo hre ta. Chuvangin, Mizoram pumah poster tar hnatlang kan nei ta hial a ni," a ti. 

MPCC huaihawtin Vawiin khan Transport Office kawt, Zodin Square-ah Poster tar hnatlang pualin vantlang inkhawm buatsaih a ni. He hunthusawitu Lal Thanzara chuan, "MNF sawrkar thar a pian veleh khan Lengpui airport-ah sum a awm tih an hriat avangin Aviation-a officer fel tak chu an petchhuak a, CM-in duh duh a sum a zen pui theih tur Principal Consultant an indah a. Airport enkawltu hnathawktu turte pawh a nghet lo hlira dah an ni. CM-in Lengpui Airport cheithat hna a tlawh tlut tlut a, chuta hna thawk tura a thlan chu hnamdang contractor Kamrula Chhangte leh CM tupa an ni. An hmanraw hmante a tha lo hle a, bungrua an tichhe nasa hle bawk. Airport an suasam dan khu Airport enkawltu Officer-te leh hnathawktu tam takte pawhin an lainat a, an rilru a na em em a ni," a ti.

Sum leh pai enkawlna kawnga MNF sawrkar hlawhchham zia sawiin, "Mizoram sawrkarin leiba a ngah em em a, puk tur an zawng reng a. Sawrkar hnathawkten a hunah hlawh an la thei lo a, pensioner-ten pawisa an la thei lo a, damloten healthcare pawisa an dawng thei hek lo. Chutiang dinhmuna kan din tak avang chuan MPCC chuan Zoram chhanchhuahna poster tar hnatlang a nei ta a, hun lo kal leh zel turah pawh Zoram chhanchhuah hna hi kan la thawk dawn chauh a ni," a ti bawk. 

Lal Thanzara chuan enchhin ngam anni tih sawiin, "Tuna min enchhin rawh u ti tute hi Party tinin kan lo enchhin tawh te, party hrang hranga lo awm tawh kalkhawm, vote hmu sang ngai miah lo te an ni. Enchhin kan duh hrim hrim a nih chuan 'kan ti ang' tih chu ti mai thin Congress Party kan awm e. NLUP Rs. 30,000 ka sem ang kan ti a, kan sem mai. Rangva inchung tur kan sem ang kan ti leh a, an awih lo a, mahse kan sem mai. Remna leh muanna a thlen theih nan lalthutthleng pawh kan kian ang tiin kan inzuar a, kan kian leh mai bawk. NLUP nuai 1 kan sem ang kan ti a, an awih lo a, mahse, Mizoram a chhungkaw sing tam tak hnenah NLUP tanpuina nuai 1 leh a aia tam kan pe thei a ni. Congress party hi a thutiamah a ding thin a ni mai lo a, sawrkar hmasa thil tihchhiat tawh Tuirial Hydel Project te, Referral Hospital te, Medical College te hial kan din thei. Power-a harsatna kan neih tawh mang lohna chhan chu Congress sawrkarin MNF sawpchhiat hnu Tuirial Hydel Project leh project dang tam tak a tih hlawhtlin vang a ni. Chuvangin, Mizoram mipuite min enchhin leh turin ka sawm che u a ni," a ti.

He hunah hian ADCC President Lalrobiaka, Ex MLA; Mahila President, Vanlalawmpuii Chawngthu leh MPYCC President, Dr. Lalmalsawma Nghaka ten thu an sawi bawk.

Vawiin hian Action Committee, MPCC buatsaihin Mizoram hmun hrang hrangah MNF sawrkar duh lohna leh Zoram Chhanchhuahna Poster tar hnatlang a ruala neih a ni a. Aizawl bakah District leh Constituency-ah a ruala poster tar a ni a, poster tarpui turin Aizawl atangin Congress Party hruaitu an zinchhuak a ni. Poster hi Aizawl khawpui chhung bakah khaw hrang hrang 150 chuangah a ruala tar a ni a, poster 15,000 vel tar a ni.