Aizawl Municipal Corporation chuan Luangmuala AMC ramah plastic chhia te chu sawngbawlna hmun tur dina,   silfaina, herdipna leh a recycle-na thlengin sorkar nena tang hoin ruahmanna a awm thu Mayor chuan a sawi a, tunhnai khan helai hmun hi an tlawh nghe nghe a ni.

Tuirial lama bawlhhlawh paihna hmunah plastic  chhia thlansate chu paih tawh loin helai hmunah hian  khawl bunin plastic chhiate chu thil tangkai zawka siam AMC chuan a tum a, project a awm mek thute pawh a sawi a ni. Plastic-te chu herdipin bitumen nen chawhpawlha ram danga an tih angin kawng luan nan hman tum a ni a. Aizawl khawpui leh luikawr dung tihnawktu, tuna Aizawl khawpuia plastic chhia tam tak chu State pawna hralh tawh loin sum tha taka chantir an tum thu AMC Mayor chuan a sawi bawk a ni.

Plastic hi thil tangkai tak, a tangkaina a zawh tawh chuan buaipuiawm tak a ni a, kan state chauhin kan buaipui loa khawvelin a buaipui a. Khawpui a ti tawp a,  kan chheh leh velin nasa takin a tuar a, nungcha te thlengin an tuar mek a. Plastic atanga siam vawi tam hman loh chi nitin nunna kan mamawh, a bikin a bur ang chi leh a chhiat hnua tih vak ngaihna awm lo chi ho hi a hnawk zual hle a. A tangkaina a zawh tawh chuan buaina namenlo thlentu a ni a, a thlen mek bawk a. Tun ai nasa hian min la tibuai dawn tih a lang reng tawh a ni.

Bawhhlawh atanga thil tangkai siamchhuah hi khawvel kalphung a ni mek a, hemi rual hian ke pen ve a ngai a, ngaihtuahna changkang tak a ni.  Plastic leh bawlhlo dang chawhpawlha kawng siam hi ram thenkhatah chuan an kalpui mek a, tui a ngam nia ngaih a nih avangin kan ram kawng ruahtui dawng nasa angah chuan a tha phian thei a ni. 

Hetih rual hian plastic bikah chuan a ‘raw material’thahnem tak awmsa ni siin khawvel pum huapin zaa sawm chauh hi thil tangkaia chhuah theih a la ni chauh mai a.  Kan ramah pawh mimal hmalakna tur niawm taka lang ni si hian  mi hausate hian an ngaihven loh phah niin a lang mek a ni.

Thil buaipuiawm tak mai a awm a, thil tangkaia chhuah tur chuan a sawngbawl a khirh ang reng hle a, lakkhawm a ngaia thil hautak tur tih a langa, ruahmanna tha tak a ngaia, chumi hnua a tihfai leh ringawt pawhin kaihnawih tam tak a nei a. A tawi zawngin thil tangkaia chhuah tur chuan a hautak a, lian tham tak tak a nih phak si loh chuan sumdawnna atanga thlir chuan bengsika ngaihtuah tham a ni reng a ni. Thlirna dangah chuan plastic-in kan chenna a tihchhiat senso atanga teh chuan a hlawk zawk anga ngaih a ni ve thung.

Hemi a nih avang hian kawng siam nana hman tum hi thil awlsam leh tha tak niin a lang hrih a, mahse sum hmuh thur thur na atan a tlak tak meuh em? tihte, kawng thui tak siamna tur plastic kan kawl em? Hun rei tak chhung amah a intum zo tak tak ang em? tih te pawh a taka a chan hma chu hriat mai theih a ni hrih lo ang.

Ram tin maiin an buaipui thil chhia atanga a thil tangkai dang siamchhuah sawichhuah a ni ta hi a lawm -awm hle mai a,  hei hian hmasawnna a kawk a, heti zawnga ngaihtuahna kan nei ngam ringawt pawh hi thil tha tak a ni hrim hrim a, a hlawhtling a nih chuan bawlhhlawh sawngbawl kawnga hmasawnna lian tak a ni ang.