Khawvel changkanna hian min tuam chak viau mai a, intodelh lo, chawmhlawm tia insawi thin ram chhung ngeiah pawh media chak lutukin min rawn nuai pawr tak tak chu kan tuar lo chu a ni e, a chak lutuk a, kan inkhuih pial hman reng reng hlei nem, thliin na taka lu a rawn chhem a, kan sam a rawn chhem thur luai ang deuh hi kan ni mahna!! Eizawnna atana hmang, thu leh hla thehdarhna kawnga mi bik leh mawhphurhna nei, mumal taka mipuite hnena thuthar leh thu awmze nei zirtirna pe chhuak thin chanchinbu enkawltute an awm reng laia a thei nazawngin thu thar hriat kan thehdarh vak mai hi chu a him berin a lang lo a ni. Beng tivartu leh rang taka thu thar hriatna min pek rual rualin kan thu hriatte a him vek lo mai thei, kan thu hriatte belhchian dawl lote pawh a awm phah fo thei a ni. Heng tak avang hian kan thu hriatte hian belhchian dawl lo hi kan hriatphah fo thei a, a titu tur lovin thahnemngaihna vang a a thu hriatte leh thlalak a lo thawn darh vak vak hian thu leh hla a titam phah hle a ni. Kan awm dan i’n en teh reng ang hmiang: 1. Media chakna kan hmang thiam lo: Media chaknain min rawn run meuh chuan kan zia/nihna a lang chiang hle hlawm mai. News reporter ni awm tak taka phur fe fe, khawilaiah emaw thil thleng sela thlalak nen kan thawn darh sung sung mai hi a lawmawm lem lo. A then chu thu belhchian dawlte pawh a awm mai thei e. Mahse, a ti tur tur dik tak ten uluk takin thuthar kha an lak a ngai a ni. Puanzar tul chin leh tul lote pawh a awm thei fo thin. Mipui hriat leh hriat loh tur chin pawh a awm ang. Engmah hre lova phur taka lo thawn darh chiam chiam kha a tul lo thei khawp a ni. Hmun pakhatah tualthahna a lo thleng a, a hmuna kal zingah tututen emaw thla an lo la sup sup ringawt a ,tualthahna chhan bulbal dik tak hre si lo, rin thua an sawi whatsapp-ah emaw fb lama rang taka lo thawnchhuah ve ringawtte hi kan tih miah loh tur a ni. Tualthattu chu hriatna pangngai ringawt chuan an lo hre chiang pawh a ni mai thei; mahse, court-in finfiahna zawng zawngte nena tualthattu tia a nemngheh loh chuan thualthattu tia lo sawi ve ngawt kha thil dik lo tak a ni. Media a chak em avang hian inthununna pawh duh angin thuneituten an chelek hleithei lo a ni mai thei. Pawngsualna a lo thleng a, a tuartu hming lo thehdarh chiam phei chu dan hnuaiah a hremna na tak a awm tih kan hriat a tha hle ang. IPC Section hnuaiah hian kum 2 thleng lungin tantir theih a ni. Helam chu sawi tam lo ila, Inbiakpawhna,inhriatpawhna mai bakah thlalak tharlam ber ber thlenga lo thawndarh vak vak hi thatna lai awm bawk mah se, a nazawng lutuk hi chu kan tih loh hram hram a tha awm e. Dan ang thlapa thawk chanchinbu mite, media lam thawktu hrang hrangte hian uluk taka an finfiah hnua an rawn puanzar hi nghak hram hram ang u. Thu finfiah lem loh, hriat hma sak sak thlalak nen lama kan kut a rang thin lutuk hi kan tih loh tawp tur a ni. A lo tuartute rilru pawh nasa takin kan hliam thei, inhuatna tha lo tak tak a thlen phah thei bawk. Buaipui lo turina kan lo buaipui ve hrep thin hian thil a nih tur angin a rawn inphochhuak thei ngai lo va, engkima inrawlh vek tum anga kan khawsa te pawh hi a hnawk lam mah mah a ni thin. Thubuai hla buaiah rawn chang ta se, a dawihzep ber ber kan ni leh lawi mai thei a ni. Chuvangin, media chak lutuk pawh hi a hip dan i thiam ang u. A him tur chin chauh i thawndarh taw hang u. 2. Duh aiin kan tawng hnem mah mah a ni: Tawng hnema hawihhawm lutuk luatah kan tum loh deuh deuhin mite huat zawng takin thu kan lo sawi hman thin, mi hawihhawm lem lo bula awm chu a hreawm an ti thin. Mahse, hawihhawmna hi lehlam zawnga thlir chuan thil hlauhawm taka a chang thei tih lam hian kan thluk daih teh ang. Tawng hnem lutuk bula awmte hi a nawm rual rualin sawi loh tur sawi a tam duh chawk bawk. Kan hawihhawm luatah tuna kan thu khelah pawh hian kan buaina tam ber zawng a nih hi le! Thil dang lam tak kan nunah, kan khawtlangah a lo thlen changtea kan awm dan leh lutuk hi chu kan zahpui awm lam hrat a ni. Mi chhiat lo tawhna karah media hmanga thu mawi lem lo lo vawrhdarh chiam chiam te hi hmuh tur leh hriat tur a awm ta fo mai te. Lir a lo nghing a, fiamthu thawhna tein thu kan inthawn sup sup hlawm a, Biak ina inkhawmho pawh an piangthar tha lo a ni ang, tlan chhuah an tum tih te, thupui hawngtu ber pawh a tlan chhuak daih tih te, Upaho pawh engruai an lo ni lo, thih an hlau, pianthar an la ngai ti zawnga fiamthu lo thawhte hi a mawi lo, hei hi kan tih loh tawp tur a ni. A zau thei ang berin whatsapp lamah te kan inthawn darh a,indeusawh zawng ten thu kan chhak chhuak zui a, kan innuihzat chu a ni ber e. Mihring kan ni a, kan piangthar emaw piangthar lo emaw, Pastor, Upa, rawngbawltute pawh mihring vek kan ni a, thih chu kan hlau vek alawm, thih hlauh avanga piangthar lo an ni lo, thih hlauh avanga innuihsawh ngawt chi pawh a ni lo vang. Heng kawngah hian duh aiin kan tawng hnem mah mah hlawm a,thu kan inhrilh chak si a,kan fimkhur deuh chu a ngai. Mi huatthu awlsam takin kan sawi reng thei a ni. 3. Mobile phone kan nei awlsam ta lutuk hi: Mizoram chhunga mobile phones lo thlenna hi kum 12 bawr vel chauh a la ni ang. Heti chung hian tuna kan dinhmun han en hi chuan kan han changkang vet vet tawhzia hi chhut tham a awm a ni. inbiakpawhna atanga kan hmang thinte hi chu thil engkim a awlsam phah em em a ni. Mahse, hemi piah lama mobile kan hman danah erawh hi chuan awmdan kan thiam lo hle a ni. Internet a lo awm vek tawh si a,a tlangpuiin inbiakpawhna a awlsam nan tiin kan fa naupang tak tak chenin kan neihtir far hlawm a, kan mamawha kan va biak piah lamah khan kan fate nunah engthil nge rawn thleng a, eng angin nge nu leh pa te min bum tih hi tam zawk chuan kan hre pha reng reng lo nia. Duhthusamah chuan a lo berah pawl 12 an zawh hnu chauh hian an mahni pualin neihtir chauh ila that zawkna tam tak a neih a rinawm. Tunlaiah chuan kan fate kan duat lutukna lamah naupang tete an nihlai atangin mobile kan leisak a, hei hi a pawi thui zia kan hre pha lo a ni. Thil mak ve deuh thleng thin hi chu nu leh paten fate koh haw kan duh chang a lo tam a, chhungkua thilah eng emaw thil lo thleng thut a awm bawk thin a, heng mamawh hun lai tak hian han phone ila, “Aw ka lo haw” dawn ti chung rengin haw lam chu an ngai pawimawh duh lo viau. Tam zawk chu han phone ila, ‘switch off’ tih te, ‘not reachable’ tih te, ‘ busy’ tihte hi a ni tlangpui. A awmzia ber chu mobile phone an neihna chhan dik tak kha kan hmang tangkai thei lo tihna a ni. An duh hunah an inkharkhip leh hmak a, an la haw duh loh chuan biak theih lova awm dan an thiam leh viau lawi si. An duhna chu an be thei, an duh lo chu biakpawh theih lovin an awm a ni ber e. Ram lo changkang zelin a ken chu a ni teh meuh mai a, chhungkua pawhin kan mamawh a, kan in leisak a; mahse, sikul kal laite hi chuan an mamawh ber em em lo, an thu kan hnial ngam loh vang leh kan duat lutukna lamah tul lo takin kan leisak mai thin a ni. Nakinah an nunah harsatna hrang hrang lo thleng ta sela, sualna chhanah khan mobile kan leisakte kha kan puh duh leh miah lo nia mawle! Kan piangsual zo tawh a ni ber e. Hei hian Pathian kan biakna kawngah chak lohna nasa tak min pe a, kan Kriatian ethics kan vawnna leh humhimna kawngah pawh nasa takin min pawt hniam tihte hi kan pawm thei em? 4. Thuthar thehdarhtu kan tam mah mah a ni: Mahni eizawnna pawh ni lo, mahni mawhphurhna pawh ni lo, kan tih tur pawh ni lo, mi eizawnna leh mumal taka thuthar thehdarhtu tur, thuthar puang chhuaktu tur an awm reng laia a mi nazawngin remchang apiang kan lo thehdarh ve zung zung hi chu kan tih loh tawp tur a ni a, kan tih loh tawp tur kan tih avang hian thubuai pawh kan awrh thei ani tih hi kan hriat a pawimawh. He lamah hian duh aiin kan hawihhawm mah mah niin a lang. TV lama thu thar thehdarhtute, Nitin chanchinbu, weekly, monthly magazine-ah te report rinthlak, thu leh hla zirtir nei te hi bih ngun peih ila, a rintlak em em zawk a ni. Lehkhathiam tamna kan inti a, ziak leh chhiar thiam kan tam a; mahse, kan chanchinbute hi a la darh zau tawk lo, keimahni ram chhung ngeiah pawh, a chhan chu ziak hlut nachang kan la hre tawk lo a ni. Thil dangah pawisa tam tak kan hmang a, kan ui lem lo va, lehkhabu, chanchinbu lak nan chuan to kan ti hma viau si, kan tana tangkai tur pawh hi kan thliar thiam tawk lo hi thiamna lamah pawh belhchian kan dawl teh chiam lo. Sap tawnga tawng vut vut ringawt hi changkanna tluantling a ni lem lo, lehkhate hi chhiar zau ila; tichuan, kan tih tur leh mawhphurhna te hi kan thliar thiam ang. Thil danglam tak tak kan tawng chho zel dawn a,lirte pawh a la nghing ang a,accident te pawh a la thleng zel ang a,rikrum thil kan hriat bakte pawh a lo la thleng ang,hengah hian tunlai media chakna kan kuta kan lo hum ve fir fer tawh si a,report hi i pe zung zung tawh lo the ang u. Thlalak lek phei chu thawndarh tawh lo ila, Hetianga thil danglam tak a lo thlen chang hi awm dan kan thiam tawk lo. Media chakna rah hi kan hman thiam tawkloh avangin awm dan kan thiam lo va,mipui tam tak min ti chiai thin hi a pawi tak tak a ni. Helama kan inzir that tawkloh chuan nakin thubuai kan la awrh fur hlawm ang tih a hlauhawm. Thubuai thling tur ni awm tak hi kan duh duh kan ti ve mai thin. Inenfiah a tha hle a ni.