Aizawl: Chief Minister Lalduhoma chuan, "Mizote hi kan pi leh pute atang tawha kutthemthiam thil lama sang tak kan ni a. Mahse kan dehchhuah thilte kalsanin, hnam dangte dehchhuah thil kan hmang nasa tawh hle a. Kan kutthemthiam thil tam tak chu an thi thaw thang tawh a, chuvangin kan uar thar leh a, thilsiam chhuah lama tan kan lak a ngai a ni," a ti.

Vawina-a Chawnpui venga PM Ekta Mall lung a phumnaah thu sawiin Chief Minister chuan, "Bel vuak (pottery) te, thiamhnang deh te, puantah leh la deh te, lo leh huan enkawlna hmanraw chher leh siam te, ei tur lam chi te leh in chhung sekrek bungruaah te Mizopa kutchhuak hi state hrang hranga miten han lei ve chur chur mai se tih hi kan duhthusam a ni," a ti a. 

PM Ekta Mall chu ram chhunga kan thilsiam chhuahte pho chhuahna hmunpui, International Market hawlh phaka kan kutchhuakte zawrhna tur a ni tiin, "Mizoram Ekta Mall-ah state hrang hrangin stall an rawn nei ang a, keini pawhin state hrang hrangte Ekta Mall-ah stall kan nei ve bawk ang a. State tinah ‘India in one Mall’ kan sa thluah dawn a. Make in India chawilarna a ni nghal dawn a. Mall-ah hian Mizoram chhunga district tinin stall an nei ang a, state leh UT te stall tur 36 leh kan district tinte stall tur 11, a vaiin stall 47 tal a awm dawn a ni," a ti bawk.

PM Ekta Mall sakna atan Mizoram chu Rs. vaibelchhe 127 pek a ni a, heta tang hian March ni 12,2024 khan vaibelchhe 63.5 dawn a ni tawh a, sak zui mai tur a niin hei hi sak zawh anih chuan thalai 220 tan hna thar a siam thei tura ngaih a ni. Unity Mall sa tur hian Central sawrkar Ministry of Health & Family Welfare hnuaia Public Sector Undertaking lar tak, HLL Infra Tech Services (HITES) te chu ruat an ni. PM Ekta Mall sakna hmun tur hi Printing & Stationery Department ram thin a ni.