ZALEN June 10, 2024; Assembly Speaker Bungalow kawta a thingkih a nih chungchangah dan angin PWD in Rs. 5000 a chawi.

Thingkih a nih chungchangah hian mipui leh sawrkar department te ngei pawhin tree felling guidelines an bawhchhiat avangin hremna an lo tawk fo tawh thin a, Speaker Bungalow kawta thil thleng hi CESJ chuan dan pawisak lohna lian takah ngaiin Ni.4.06.2024 khan DFO Aizawlah action la tura ngenna an thehlut a. An ngenna te ngaipawimawh a dan anga hma lak sak tu Forest Dept chungah CESJ chuan lawmthu an sawi a. PWD Dept pawhin an tihsual pawm thiama dan ang taka hremna an zawm hi lawmawm an ti takzet tih CESJ chuan an tarlang.

India danpui-in "Ram leilung pianpui boruak, ramngaw, dil leh lui leh ramsa humhalh leh vawnhim tumna kawnga hma lakna leh nungchate chunga lainatna lan tir turin a ti a. Heng hi kan ram hruaitute pawhin dah pawimawh hmasakah nei zel se. Danin a phut vang ngawt ni lova, an tel lovin kan awm theilo tih hriaa venhim leh humhalh hi kan tih tur anih bakah ramngaw thing leh mau humhalh nachang hria ni zel turin ramhruaitute chu CESJ chuan an beisei tlat tih an tarlang bawk.