Mizoramah kum 23 liam ta, 1999 atang khan thingphun uar thar tur leh Mizoram ti hring thar leh turin Green Mizoram Day hman tan a ni a. Sawrkar chuan June ni 11 chu Green Mizoram Day atan hman ni se a tih angin hman thin a ni a. Mahse kumin ah erawh chuan June ni 11 hi Inrinni anih avangin Zirtawpni khan Mizoram hmun hrang hrangah Green Mizoram Day hi hman a niin thing tiak pawh thahnem tak phun a ni.

Mizoramah hian Environment, Forests and Climate Change department bultumin thing tiak engemaw zat hi phun a lo ni tawh a. Kan thing phun tawh zat ngaihtuah chuan Mizoram hi hring dup tawh tura ngaih anih laiin vawiina kan ram dinhmun chu kan hria a, kan ram chereu zel dan ngaihtuah hian engti kawng emaw tala tan kan lak a ngai hle tih chiang takin a lang a ni. Kumin Green Mizoram day hmanna a Chief Minister rawtna kan thing phun te a hming chauh a phun mai lova, a nung zui ngei tur thing tiak thlan uluk a tul thu leh thlithlai zui a pawimawh thu a sawi te hi thingphuntu leh enkawl zui zel tur te hian hriatthar a pawimawh hle mai.

Boruak tha siam tur te, tuihna pechhuak tura thing leh mau pawimawhzia chu inhrilh nawn ngai lovin kan hre vek awm e. Khawvel puma thing leh mau chereu in kan sik leh sa a khawih danglam nasat zia te, mihring in kan tawrh nasat zia te hriain mithiam te an mangang tawh a. Mizoramah erawh ramngaw te kan la nei tha a, min awt hle a ni. Chutih rual erawh chuan kan thing leh mau te hi kan humhalh loh chuan nakin lawkah harsatna tawk thei mai kan ni thung.

Thing leh mau chereu zel vangin kan ramah ngei pawh tuihna a kangchat zel a, kan lui tui te pawh a tlem tial tial a. Thal ah phei chuan harsatna kan tawk nasa thei hle anih hi. Chumai ni lovin sik leh sa pawhin awmzia a nei lo tial tial a, nipui ah a lum tawlh tawlh a, thlasik a vawt tawlh tawlh bawk a. Ruah tui nise a mumal lo tial tial bawk. Heng te hi thing leh mau kan tih chereu nasat vanga thleng a ni. Kan ram sik leh sa nuam tak, ram dangin min awh thin em em te chu kan ti bo tawlh tawlh zel anih hi!

Tunhma atanga kan thingphun te hi kan humhalh tha tawk lo hle niin a lang a. Kan thingphun ngaihtuah chuan Mizoram hi hring dup tawh tur anih laiin mi kuthlei thenkhat te chuan kawng sira thingphun te chu kut thak hnawih nan te an lo hmang a. Chumai bakah kan ranvulh te hian an tichhe thin bawk. Kan rama thing leh mau te a chereu hian a tuartu tur chu keimahni a chenga te hi kan ni tih kan hriatthar leh a pawimawh hle a. Chuvangin Green Mizoram Day puala kan thingphun thinah hian kan duhtawk mai ang tih a hlauhawm a, a enkawl zui kawngah hian mitin te hian mawh kan phur vek a ni tih kan hriatthar leh hi a pawimawh hle.